ខេត្តស្ទឹងត្រែង៖ ពិធីបុណ្យទន្លេលើកទី៣ក្នុងទឹកដឹងនៃខេត្ត ស្ទឹងត្រែង បានរៀបចំការប្រកួតប្រដាល់គុនខ្មែរជាច្រើនគូរសម្រាប់ភ្ញៀវចូលទស្សនា។ ថ្ងៃទី១នៃពិធីបុណ្យនេះ(ថ្ងៃទី២៤ខែមីនាឆ្នាំ២០១៧) ការប្រកួតគុនខ្មែនេះបានគៀងគរមនុស្សច្រើននាក់ទៅមើលនិងនាំគ្នាស្រែកគាំទ្រគុនខ្មែរ។

សូមបញ្ជាក់ថា ព្រឹត្តិការណ៍នេះរៀបចំឡើងដោយទទួលបានការគាំទ្រពីគណៈកម្មាធិការជាតិអូឡាំពិកកម្ពុជា(NOCC) សហការជាមួយសហព័ន្ធកីឡាប្រដាល់គុនខ្មែរ ដោយមានកីឡាករ ១០នាក់ស្មើនឹង ៥គូចូលរួម ដែលសុទ្ធសឹងជាកីឡាករមានសមត្ថភាព និងល្បីក្នុងប្រទេសកម្ពុជា ។

វត្តមាននិងលទ្ធផលគឺ កីឡាករ ឡាញ់ វិចិត្រ ឈ្នះពិន្ទុ សំណាង ចៅចិត្ត  វុត្ថា សានលីញ ឈ្នះពិន្ទុ សារ៉ាក់ ផល្លី, អ៊ូច ធារិទ្ធ ឈ្នះពិន្ទុ លី តឿន ។ កីឡាករ តក សោភ័ណ្ឌ ប្រកួតស្មើពិន្ទុកីឡាករ ឃឹម ពេជ្រ និងកីឡាករ នឿង រ៉ា ប្រកួតស្មើពិន្ទុ សល់ អាមូល ។

ជាមួយគ្នានោះ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និង ជាប្រធានគណៈកម្មការជាតិអូឡាំពិចកម្ពុជា បានបញ្ជាក់ផងដែរកាលពីព្រឹកថ្ងៃទី២៥ ខែមីនា ឆ្នាំ២០១៧ថា សម្រាប់ពិធីបុណ្យថ្ងៃទី១ ទទួលបានជោគជ័យ និង បានរៀបចំយ៉ាងល្អដោយប៉ានស្មានថា មានភ្ញៀវជាតិនិងអន្តរជាតិ បានមកលេងពិធីបុណ្យនេះប្រមាណជិត៣ម៉ឺននាក់ ខណៈពិធីបុណ្យនឹងបន្តកម្មវិធីរហូតដល់ថ្ងៃទី២៦ ខែមីនា ឆ្នាំ២០១៧។

សូមរំលឹកថា បុណ្យទន្លេឆ្នាំ២០១៧ ត្រូវបានធ្វើឡើងរយៈពេល ៣ថ្ងៃ ចាប់ពីថ្ងៃទី២៤-២៦ ខែមីនានេះ នៅខេត្តស្ទឹងត្រែង  ដោយ NOCC បានកំណត់យកកីឡា ១១ប្រភេទ សម្រាប់ប្រកួត និងសម្ដែងជូនភ្ញៀវទេសចរណ៍ទស្សនាកម្សាន្ដ រួមមានកីឡារត់កម្សាន្ដ កីឡាជិះកង់ បាល់ទាត់ បាល់ទះ វាយសី ទាញព្រ័ត្រ, ប្រដាល់គុនខ្មែរ កីឡារាំ ល្បុក្កតោ ចំបាប់ និងកីឡាទូកកា ៕ដោយ  បូរិន

• គុនខ្មែរ
• បុណ្យទន្លេ
• ស្វាគមន៍