MENU
|
ខេត្តស្ទឹងត្រែង៖ ជាឆ្នាំទី៣ហើយ ដែលគណៈកម្មាធិកាជាតិអូឡាំពិកកម្ពុជា សហការជាមួយនឹងក្រសួងទេសចរណ៍រៀបចំការប្រកួតកីឡា សម្រាប់ធ្វើការអបអរពិធីបុណ្យទន្លេ ខណៈដែលលើកទី៣នេះ គ្រោងបានចាប់ផ្ដើមនាថ្ងៃទី២៤ ដល់ថ្ងៃទី២៦ ខែមិនា ឆ្នាំ២០១៧នេះ នៅលើទឹកដីខេត្តស្ទឹងត្រែង។ នាព្រឹកនេះ មានក្រុមយុវជនជាច្រើនពីបណ្តាខេត្តនិងរាជធានីចូលរួមរត់ប្រណាំង នៅតំបន់មាត់ទន្លេមេគង្គ។
សូមបញ្ចាក់ថា មានក្រុមក្មេងៗជាច្រើន បានចូលរួមរត់ប្រណាំង ចង្ងាយ៥គីឡូ និង ៣ គីឡូ ដើម្បីអបអរពិធីបុណ្យទន្លេឆ្នាំ២០១៧ ដែលប្រារព្ធជាលើកទី៣ ខណៈចំនួនអ្នកចូលរួម បានអោយដឹងថា ក្រុមយុវវ័យសម្រាប់ឆ្នាំនេះមានមនុស្ស១២០០នាក់។
អគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានឲ្យដឹងថា ររៀបចំពិធីបុណ្យទន្លេនេះគឺផ្សព្វផ្សាយពីទេសចរណ៍សហគមន៍ តាមតំបន់ទន្លេមេគង្គដែលជាគោលដៅទេសចរណ៍ដ៏សំខាន់មួយរបស់ព្រះរាជាណាចក្រកម្ពុជា ។ បុណ្យទន្លេត្រូវបានរៀបចំឡើងដោយក្រសួងទេសចរណ៍ ក្រោយទទួលបានអនុញ្ញាតពីរាជរដ្ឋាភិបាលកម្ពុជា ដើម្បីរៀបចំព្រឹត្តិការណ៍នេះឲ្យក្លាយជាបុណ្យប្រចាំឆ្នាំមួយក្នុងប្រទេសកម្ពុជា ដោយកំណត់យកខែមិនា ដើម្បីរៀបចំជារៀងរាល់ឆ្នាំ ។
លោកបានបញ្ជាក់ថា ក្នុងចំណោមប្រភេទកីឡាខាងលើ គឺមានកីឡាមួយចំនួន នឹងបើកឲ្យមហាជនចូលរួមដោយសេរី ហើយក៏ជាឱកាសស្វែងរកថ្នាលកីឡាឆ្នើម ដើម្បីជ្រើសរើសមកបណ្ដុះបណ្ដាលឲ្យក្លាយជាកីឡាអាជីពផងដែរ។
តាមគម្រោងកីឡាត្រូវបង្ហាញវត្តមានក្នុងពិធីបុណ្យទន្លេ នៅខេត្តស្ទឹងត្រែងក៏មិនខុសពីបុណ្យទន្លេលើកមុនដែរ គឺប្រហែល ១០ប្រភេទកីឡា បូករួមទាំងកីឡាប្រជាប្រិយ និងកីឡាប្លែងៗមួយចំនួនទៀត ដែលកំពុងរៀបចំ ។
ចំពោះប្រភេទកីឡាត្រូវបានកំណត់រួចរាល់នោះ រួមមានកីឡារត់ប្រណាំងលក្ខណៈកម្សាន្ដ ប្រដាល់ក្បាច់គុនបុរាណខ្មែរ ចំបាប់បុរាណ ប្រណាំងទូក អុកចត្រង្គ ហែលទឹក បាល់ទះ ទូកក្ដោង និងកីឡាហោះហើរជាដើម ៕ ដោយ បូរិន