ប្រធានាធិបតីអាមេរិកកាលពីថ្ងៃទី​១០ខែកុម្ភៈបានប្រកាសថា សម្ព័ន្ធមិត្តយោធាអាមេរិក​ជប៉ុនគឺជាសសរ នៃសន្តិសុខ ស្ថេរភាពនៅក្នុងតំបន់។

នៅក្នុងតំណើរទស្សនកិច្ចរយៈពេល​២ថ្ងៃ នាយករដ្ឋមន្ត្រីជប៉ុននិងប្រ​ធានា​ធិបតីអាមេរិកបានបង្ហាញភាពស្និតស្នាល ចាប់ដៃគ្នា មុនពេលអង្គុយពិភាក្សា។  

នៅក្នុងសន្និសីទកាសែតរួម​ ប្រធានាធិបតីអាមេរិកដូណាលត្រាំមិនបានលើកឡើងពីគោលនយោបាយពេលឃោសនាបោះឆ្នោតនោះឡើយ​ ដោយពេលនោះលោកត្រាំបានចោទប្រកាន់ជប៉ុនថា គេងបន្លំជំនួយរបស់អាមេរិកនិង ប្លន់យកការងារបស់ពលរដ្ឋអាមេរិកទៀតផង។

ប្រធានាធិបតីដូណាលត្រាំបានបញ្ចាកថា «ខ្ញុំសូមសន្យាការពារ​សន្តិសុខ​ដល់ជប៉ុននិងនៅតំបន់ទាំងមូល ក៏ដូចជាបង្កើនឲ្យកាន់តែជិតស្និត​នៅក្នុងទំនាក់ទំនងរវាងប្រទេសទាំងពី»។ នៅក្នុងសេចក្តីប្រកាសរួម គឺអាមេរិកបានបញ្ចាក់យ៉ាងច្បាស់ពីការសន្យាការពារសម្ព័ន្ធមិត្តជប៉ុន គេចផុតពីការគំរាមកំហែងរបស់សត្រូវ។

នេះជាជោគជ័យរបស់នាយករដ្ឋមន្ត្រីជប៉ុន ស៊ីនហ្ស៊ូអាបេ​ ក្នុងពេលបំពេញទស្សនកិច្ចនៅទីក្រុងវ៉ាស៊ីនតោន លើកនេះដោយប្រទេសទាំងពីរបាន​បង្កើនទំនុកចិត្តគ្នាទៅវិញទៅមក។ជាមួយគ្នានោះប្រធានាធិបតីអាមេរិកបានបញ្ចាក់ថា​សម្ព័ន្ធមិត្តអាមេរិកជប៉ុនមិនមានការប្រែប្រួលឡើយ។

នៅក្នុងសេចក្តីប្រកាសរួម មេដឹកនាំប្រទេសទាំងពីរបានបញ្ចាក់ទៅពីមាត្រាទី​៥នៃសន្ធិសញ្ញាការពារសន្តិសុខរួម ក្នុងនោះមានប្រជុំកោះសែនកាកូ ដែលជប៉ុនកំពុង​តែគ្រប់គ្រង ប៉ុន្តែភាគីចិនក៏បានប្រកាសថា កោះនោះគឺជារបស់ខ្លួនផងដែរ។ វិវាទប្រជុំកោះសែនកាគូ បានធ្វើឲ្យជប៉ុននិងចិនប្រឈមមុខដាក់គ្នានាពេលកន្លងមក។

ក្រោយជំនួបពិភាក្សា​នៅសេតវិមាន មេដឹកនាំប្រទេសទាំងពី នឹងធ្វើដំណើរទៅកាន់​ទីក្រុង​ Floridaលម្ហែកាយចុងសប្តាហ៍ ក្នុងតំបន់​ Mar A Lago ផងដែរ។

• ដូណាលត្រាំ
• ជប៉ុន