ខេត្តបន្ទាយមានជ័យ៖  តាមរបាយការណ៍ពីមន្ត្រីបំរើការងារនៅទីតាំងទទួលពលករបញ្ជូនពីថៃក្បែរច្រកទ្វារអន្តរជាតិប៉ោយប៉ែតប្រាប់ថាក្នុងខែកុម្ភៈឆ្នាំ2017នេះពលករខ្មែរដែលភាគីថៃបញ្ជូនត្រឡប់មានការកើនឡើងដោយក្នុង1ថ្ងៃៗយ៉ាងតិច5ទៅ6រថយន្តទ្រុងមិនក្រោមពីជិត300នាក់ឡើយ។

មន្ត្រីច្រកទ្ធារអន្តរជាតិដដែលបន្តថាពលករដែលភាគីថៃបញ្ជូនត្រឡប់នៅដើមឆ្នាំ2017នេះភាគច្រើនជាពលករទើបចេញពីកម្ពុជាតាមច្រករបៀងហើយត្រូវគេចាប់ក្រោយឆ្លងព្រំដែននិងខ្លះកំពុងជិះរថយន្តទៅខាងក្នុងប្រទេសថៃត្រូវគេចាប់តាមដងផ្លូវពោលគឺខុសពីពេលមុនៗគឺពលករដែលភាគីថៃចាប់ភាគច្រើនពេលពួកគេវិលត្រឡប់មកប្រទេសវិញ។

ប្រភពដដែលបន្តថាគិតត្រឹមម៉ោងជាង2រសៀលថ្ងៃទី9កុម្ភៈ2017ចំនួនពលករដែលថៃបញ្ជូនត្រឡប់តាមរថយន្តទ្រុងមកកម្ពុជាតាមច្រកទ្វារអន្តរជាតិប៉ោយប៉ែតមាន6រថយន្តជិត300នាក់។យោងរបាយការណ៍ខាងលេីមានន័យថាចំនួនពលករឆ្លងដែនខុសច្បាប់តាមច្រករបៀងកាន់តែកេីតមានឡើងហើយសង្ស័យភាគីថៃក៍ពង្រឹងការត្រួតពិនិត្យលើបញ្ហាលំហូរចូលខុសច្បាប់នៃជនអន្តោប្រវេសន៍ក្នុងប្រទេសរបស់គេផងដែរ។

គួរបញ្ជាក់ថាចំនួនពលករឆ្លងដែនខុសច្បាប់ដែលភាគីថៃបញ្ជូនត្រឡប់តាមច្រកទ្វារអន្តរជាតិប៉ោយប៉ែតក្នុងមួយឆ្នាំៗមិនក្រោមជាង5ម៉ឺននាក់ឡើយ។ជាក់ស្តែងនៅឆ្នាំ2015ពលករបញ្ជូនត្រឡប់មានចំនួន59569នាក់និងឆ្នាំ2016មានចំនួន50345នាក់ដោយឡែកក្នុងឆ្នាំ2017មន្ត្រីថាទេីបដេីមឆ្នាំមិនទាន់មានរបាយការណ៍លម្អិតប្រចាំឆ្នាំនោះទេ៕

• ថៃ
• ពលករខ្មែរ
• ច្រកទ្វារ