១ ភាគ ៧ នៃចំនួនប្រជាជនលើពិភពលោក កំពុងប្រើប្រាស់ WhatsApp

បច្ចេកវិទ្យា | ថ្ងៃអង្គារ ទី០២ កុម្ភៈ ២០១៦, ១៩:២៩ | ៧៥៩ ដង | ចុចបញ្ចេញមតិ (០)

WhatsApp បានបំបែកកំណត់ត្រាប្រវត្តិសាស្រ្តរបស់ខ្លួនកាលពីថ្ងៃច័ន្ទម្សិលមិញនេះ ដោយក្រុមហ៊ុននេះបានបង្ហាញពីចំនួនអ្នកប្រើប្រាស់កម្មវីធីរបស់ខ្លួន ដែលកើនឡើងដល់ជាង ១ពាន់លាន នាក់។ កាលពីជាង១ឆ្នាំមុន WhatsApp បានប្រារព្ធពិធីអបអរ នៃការទទួលបានអ្នកប្រើប្រាស់ចំនួន ៥០០លាន នាក់។

ក្រុមហ៊ុនមិនត្រឹមតែ បានសម្រេចគោលដៅ ដែលមានមនុស្ស ១/៧ នៃចំនួនប្រជាជនសរុបនៃពិភពលោក កំពុងប្រើប្រាស់កម្មវិធីនេះប៉ុណ្ណោះទេ ថែមទាំង ថ្មីៗនេះ ក្រុមហ៊ុនក៏បានប្រកាសថា នឹងមិនគិតថ្លៃសេវាប្រចាំឆ្នាំ នៃការប្រើប្រាស់ទៀតឡើយ។

ក្នុងអត្ថបទដែលបានផ្សព្វផ្សាយថ្មីៗនេះ WhatsApp បានទម្លាយថានឹងផ្តោតលើ តម្លៃស្នូលនៃអាជីវកម្មរបស់ខ្លួន ដោយលើកឡើងថា៖

WhatsApp បានចាប់ផ្តើមនូវគំនិតសាមញ្ញមួយ៖ ធានាអោយបានថា មនុស្សគ្រប់គ្នាអាចនៅជិតស្និទ្ធ នឹងគ្រួសារ និងមិត្តភក្រ គ្រប់ទីកន្លែងនៃផែនដី ដោយមិនគិតប្រាក់ ឬបង់ថ្លៃសេវាបន្ថែមអ្វីឡើយ។

ការប្រឹងប្រែងនៅពេលនេះ គឺដើម្បីស្វែងរកវិធីពង្រីកវិសាលភាពនៃសេវាកម្ម ល្បឿន និងសុវត្ថិភាព និងដើម្បីស្វាគមន៏ទទួលអ្នកប្រើប្រាស់ថ្មី ដែលនៅសេសសល់ជាង ៦ពាន់លាន នាក់ទៀតលើពិភពលោក។

គួរបញ្ជាក់ថា WhatsApp គឺជាកម្មវិធីទំនាក់ទំនងសង្គមមួយ ដែលអ្នកប្រើប្រាស់អាចផ្ញើរសារជាអក្សរ សំលេង រូបភាព វីឌីអូ និងឯកសារផ្សេងៗទៀត ទៅវិញទៅមកដោយប្រើប្រាស់សេវាអ៊ីនធើណែត។ WhatsApp មានមុខងារប្រហាក់ប្រហែល នឹងកម្មវិធីផ្សេងជាច្រើនដូចជា៖ Facebook Messenger Viber Skype Line និង WeChat ជាដើម។

ប្រែសម្រួលដោយ៖ សិរីវុធ

ប្រភព៖ TECH RADAR