អ្នកបង្កើត Email និងនិមិត្តសញ្ញា @ លោក Ray Tomlinson បានស្លាប់ហើយក្នុងអាយុ ៧៤ឆ្នាំ

បច្ចេកវិទ្យា | ថ្ងៃច័ន្ទ ទី០៧ មីនា ២០១៦, ១១:៤៤ | ២,៧៧៥ ដង | ចុចបញ្ចេញមតិ (០)

អ្នកចូលរួមអភិវឌ្ឍន៍ប្រព័ន្ធអ៊ីនធើណែត លោក Ray Tomlinson ដែលជាមនុស្សដំបូងបានបង្កើត Email បានស្លាប់ហើយ ក្នុងអាយុ ៧៤ឆ្នាំ។

លោកជាអ្នកសរសេរកម្មវិធីកុំព្យូទ័រជនជាតិអាមេរិក ដែលមានគំនិតផ្តួចផ្តើមបង្កើតសារអេឡិចត្រូនិច (Email) ដែលអាចផ្ញើរតាមបណ្តាញកុំព្យូទ័រ ពីកុំព្យូទ័រមួយទៅកុំព្យូទ័រមួយទៀត កាលពីឆ្នាំ ១៩៧១។

គាត់ក៏បានបង្កើតនិមិត្តសញ្ញា @ សម្រាប់ប្រើក្នុងអាសយដ្ឋានសារអេឡិចត្រូនិច (Email Address) ផងដែរ ដែលបច្ចុប្បន្នត្រូវបានគេប្រើជាស្តង់ដាទៅហើយ។

បើតាមរបាយការណ៍ លោក Tomlinson បានស្លាប់ដោយសារ ជម្ងឺគាំងបេះដូង កាលពីថ្ងៃសៅរ៍ ទី៥ ខែមិនានេះ។

រូបលោក Ray Tomlinson ថតកាលពីថ្ងៃទី ២២ ខែតុលា ឆ្នាំ២០០៩ (AFP Photo/Miguel Riopa)

គាត់បានបង្កើតស្នាដៃគេស្គាល់ថា ជាសារអេឡិចត្រូនិច (Email) ដំបូងបង្អស់ ខណៈគាត់បានកំពុងធ្វើការនៅ ទីក្រុង Boston តូនាទីជា អ្នកស្រាវជ្រាវ អោយក្រុមហ៊ុន Bolt Beranek និង Newman។

ក្រុមហ៊ុននោះមានតូនាទីសំខាន់ ក្នុងការអភិវឌ្ឍន៍ប្រព័ន្ធអ៊ីធើណែតជំនាន់ដំបូង ដែលមានឈ្មោះថា Arpanet ។

គួរបញ្ជាក់ថា បើតាមវេបសាយ wikipedia លោក Ray Tomlinson ជាជនជាតិអាមេរិក កើតនៅថ្ងៃទី ២៣ ខែមេសា ឆ្នាំ១៩៤១ នៅក្រុង Amsterdam ទីក្រុងញូវយ៉ក សហរដ្ឋអាមេរិក។ លោករៀននៅ វិទ្យាសា្ថនបច្ចេកវិទ្យានៃរដ្ឋម៉ាសាជូស៊ែត (Massachusetts Institute of Technology)។ គាត់មានមុខរបរជាអ្នកសរសេរកម្មវិធីកុំព្យួទ័រ អ្នកឆ្នៃប្រឌិតបច្ចេកវិទ្យា និងជាវិស្វករអគ្គីសនី។ គាត់ត្រូវបានគេស្គាល់ និងល្បីឈ្មោះ តាមរយៈការបង្កើតប្រព័ន្ធសារអេឡិចត្រូនិច (Email) ៕

ប្រែសម្រួលដោយ៖ សិរីវុធ

ប្រភព៖ BBC News