MENU
|
Google បានទម្លាយប្រាប់ពីចំនួនប្រាក់រង្វាន់ ដែលបានផ្តល់អោយអតីតបុគ្គលិករបស់ខ្លួន ដែលបានក្លាយជាម្ចាស់ Domain google.com ដោយសារបញ្ហាបច្ចេកទេស។
គួរបញ្ជាក់ថា លោក Sanmay Ved បានទិញឈ្មោះវេបសាយ google.com តាមរយៈ ប្រព័ន្ធលក់ឈ្មោះវេបសាយផ្ទាល់របស់ Google (Google Domains Service) កាលពី ខែតុលា ឆ្នាំ២០១៥ ក្នុងតម្លៃត្រឹម ១២ ដុល្លា ប៉ុណ្ណោះ។
ពីដំបូងគាត់បានគិតថា ការបង្ហាញលក់នោះ គឺជាកំហុសបច្ចេកទេស ប៉ុន្តែគាត់ពិតជាភ្ញាក់ផ្អើលបំផុត នៅពេលដែលការបង់ប្រាក់សម្រាប់ទិញឈ្មោះវេបសាយនេះ បានជោគជ័យ ជាមួយសារបញ្ជាក់ប្រាប់វិញថា គាត់ពេលនេះ គឺជាម្ចាស់នៃឈ្មោះវេបសាយ Google.com។
សិទ្ធិជាម្ចាស់លើ google.com របស់គាត់ បានត្រឹមរយៈពេលប្រហែល ១នាទីប៉ុណ្ណោះ ដោយនៅពេលនោះ គាត់ក៏បានចូលទៅផ្នែកខាងក្នុងនៃការគ្រប់គ្រងវេបសាយនោះផងដែរ ប៉ុន្តែ ភ្លាមៗនោះ Google ក៏បានដឹងពីកំហុសបច្ចេកទេសនោះ រួចក៏ធ្វើការសងប្រាក់ ដែលគាត់បានទិញនោះវិញផងដែរ។
បន្ទាប់ពីឧបទ្ទហេតុនោះ Google បានទាក់ទង លោក Ved និងបានផ្តល់អោយគាត់នូវប្រាក់រង្វាន់ ជាការលើកទឹកចិត្តចំពោះ ការចាប់បាននូវកំហុសបច្ចេកទេសផ្នែកសុវត្ថិភាពរបស់ខ្លួន។
នៅពេលនោះ ទាំង Google និង Ved មិនដែលបានបង្ហើបអោយដឹងពីចំនួនប្រាក់រង្វាន់នោះទេ ប៉ុន្តែថ្មីៗនេះ ក្រុមហ៊ុន បានទម្លាយអោយដឹងនៅលើ អត្ថបទមួយនៅលើគេហទំព័ររបស់ខ្លួន។
ប្រាក់រង្វាន់ដែល Ved ទទួលបានគឺ 6,006.13 ដុល្លា។ អ្វីដែលមិនគួរអោយជឿនោះគឺថា លោក Ved បានបរិច្ចាកប្រាក់រង្វាន់នោះទាំងអស់ ទៅអោយមូលនិធីសប្បុរសធម៌នៃការអប់រំឥណ្ឌាមួយ។ ក្រោយពីទទួលបានព័ត៌មាននៃការបរិច្ចាកនេះ Google ក៏បានបន្ថែមប្រាក់រង្វាន់នោះមួយទ្វេរជាពីរ ដូច្នេះប្រាក់រង្វាន់សរុបនោះគឺ 12,012.26 ដុល្លា។
គួរបញ្ជាក់ផងដែរថា Google ជារឿយៗតែងតែផ្តល់នូវប្រាក់រង្វាន់ដល់ អ្នកស្រាវជ្រាវកុំព្យូទ័រ ដែលអាចរកឃើញកំហុសបច្ចេកទេស ឬដំណើរការមិនប្រក្រតីផ្សេងៗ នៃសេវារបស់ខ្លួន។ Google បានទម្លាយថា ពួកគេបានចំណាយប្រាក់ប្រមាណជាង ២លានដុល្លា ដល់អ្នកស្រាវជ្រាវជាង ៣០០នាក់ កាលពីឆ្នាំ២០១៥ នេះ។
អ្នកស្រាវជ្រាវកុំព្យូទ័រ លោក Tomasz Bojarski គឺជាអ្នកស្វែងរកកំហុសបច្ចេកទេសអោយ Google បានច្រើនជាងគេ សម្រាប់ឆ្នាំ ២០១៥។ គាត់បានរកឃើញ ៧០ កំហុសបច្ចេកទេសនៅលើវេបសាយ Google។
ប្រែសម្រួលដោយ៖ សិរីវុធ
ប្រភព៖ THE INDEPENDENT