MENU
|
ហេតុផលមួយ ដែលរថយន្ត Tesla ម៉ូដែល S ផ្សំផ្គុំដោយលក្ខណៈពិសេសដែលនឹកស្មានមិនដល់ជាច្រើន ដោយសារតែ ការអភិវឌ្ឍន៍ប្រព័ន្ធសុវត្ថិភាពក្នុងរថយន្តគឺជាចំនុចរសើបបំផុតនៃការប្រកួតប្រជែងរថយន្តទំនើបនាពេលបច្ចប្បន្ន។ ដោយបានពិនិត្យមើលពីការប្រកួតប្រជែងផ្នែកនេះកាន់តែខ្លាំង Volvo បានធ្វើការព្យាករណ៍ឡើងថា រថយន្តរបស់ខ្លួននឹងក្លាយជារថយន្តដែលអាចការពារសុវត្ថិភាពបាន ១០០% (deathproof) ចាប់ពីឆ្នាំ ២០២០។
CEO នៃក្រុមហ៊ុន Volvo អាមេរិកខាងជើង លោក ឡិច គឺស្មេកឃើស៍ បានរំពឹងទុកយ៉ាងមុតមាំថា ត្រឹមតែរយៈពេល ២-៣ ឆ្នាំទៀតប៉ុណ្ណោះ នឹងមិនមានអ្នកដំណើរណាម្នាក់ត្រូវបានស្លាប់ ឬគ្រោះថ្នាក់ធ្ងន់ធ្ងរដោយសារ គ្រោះថ្នាក់ចរាចរណ៍ពេលប្រើប្រាស់រថយន្ត Volvo ទៀតឡើយ។
គម្រោងរបស់ Volvo ដើម្បីសម្រេចការរំពឹងទុកនេះ គឺស្តាប់ទៅដូចជាធម្មតាតាមទ្រឹស្តី ប៉ុន្តែវានឹងបង្ហាញពីការប្រកួតប្រជែងខ្លាំងបំផុតពេលអនុវត្តន៍ផ្ទាល់។ ជាដំបូង ក្រុមហ៊ុនគ្រោងនឹងធ្វើអោយរថយន្តរបស់ខ្លួន មានកំលាំងខ្លាំង រឹងមាំ និងមានសុវត្ថិភាពបំផុតតាមដែលអាចធ្វើបាន។ បន្ទាប់មក ក្រុមហ៊ុននឹងបញ្ចូលនូវបច្ចេកវិទ្យាទំនើបៗបំផុតជាច្រើន ដើម្បីការពារការបុក រួមបញ្ចូលប្រព័ន្ធពិនិត្យគំនូសផ្លូវ និងសត្វធំៗ ដោយស្វ័យប្រវត្តិ។
តើនេះគឺជាអ្វីដែលយើងមិនដែលបានឃើញពីមុនឬ? វាពិតជាពិបាក ប៉ុន្តែរបាយការណ៍របស់ CNN បង្ហាញថា គ្មានក្រុមហ៊ុនណា សូម្បីតែ Tesla ក៏មិនបានបង្ហាញពីកំរិតជឿជាក់ខ្ពស់លើប្រព័ន្ធការពារសុវត្ថិភាពដូច្នេះដែរ។
របាយការណ៍បានបន្ថែមថា៖
អ្នកអភិវឌ្ឍប្រព័ន្ធសុវត្ថិភាពនៃក្រុមហ៊ុន Volvo លោក អ៊ីរីក ខូលីង បាននិយាយថា “ជាមួយនឹងការអភិវឌ្ឍន៍នៃប្រព័ន្ធស្វ័យប្រវត្តិពេញលេញ យើងនឹងឈានជើងអោយហួសពីព្រំដែន នៃប្រព័ន្ធសុវត្ថិភាពរបស់រថយន្ត។ ពីព្រោះ ប្រសិនបើយើងគិតពី ស្វ័យភាពពេលលេញរបស់រថយន្ត យើងត្រូវតែគិតអោយអស់នូវអ្វីដែលអាចកើតមានឡើងចំពោះរថយន្ត។”
នេះមិនមែនមានន័យថា អ្នកបើកបរត្រូវកំណត់រថយន្តអោយរើសយកមុខងារស្វ័យភាពនេះ (autonomous driving mode) ដើម្បីមានសុវត្ថិភាពនោះទេ។ ទោះបីជាអ្នកបើកបរកំពុងគ្រប់គ្រងរថយន្តដោយខ្លួនឯងក៏ដោយ ក៏ប្រព័ន្ធទាំងនេះនឹងមានដំណើរការជានិច្ច (run in the background) ហើយវានឹងត្រៀមការពារសុវត្ថិភាពគ្រប់ពេលវេលា ។
ប្រែសម្រួលដោយ៖ សិរីវុធ
ប្រភព៖