MENU
|
រាជធានីភ្នំពេញ៖ លោក តាន ហេងឈួ (Tan Heng Cheu)ប្រធានក្រុមហ៊ុន Tan Choung Group មានបំណងមកបណ្តាក់ទុនវិនិយោគតម្លើងរថយន្តនៅកម្ពុជា ក្នុងគោលដៅបើកទីផ្សារនៅតាមបណ្តាប្រទេសជាសមាជិកអាស៊ានទាំងមូល។
ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ បានប្រាប់ក្រុមអ្នកសារព័ត៌មាននៅ ក្រោយជំនួបរវាងសម្តេច តេជោ ហ៊ុន សែន នាយករដ្ឋមន្ត្រីកម្ពុជា ជាមួយ លោក តាន ហេងឈួ (Tan Heng Cheu) ប្រធានក្រុមហ៊ុន Tan Choung Group នៅវិមានសន្តិភាពនារសៀលថ្ងៃទី៧ ខែវិច្ចិកានេះថា លោក តាន ហេងឈួ បានជំរាបជូនសម្តេចអំពី បំណងចង់មកវិនិយោគនៅក្នុងព្រះរាជាណាចក្រកម្ពុជាលើការតម្លើងរថយន្ត។
លោកតានបានឲ្យដឹងថាក្រុមហ៊ុន Tan Choung Groupមានប្រវត្តិក្នុង ការតម្លើងរថយន្ត អស់រយៈពេល៦០ឆ្នាំមកហើយ ហើយក៏មានបទពិសោធន៍ក្នុងការផលិតបំណែករថយន្ត អស់រយៈពេល៤៥ឆ្នាំផងដែរ។ សព្វថ្ងៃនេះក្រុមហ៊ុន មានរោងចក្រតម្លើងរថយន្ត នៅប្រទេសវៀតណាម, ម៉ាឡេស៊ី និងមីយ៉ាន់ម៉ាហើយ ទៅអនាគត់ ក្រុមហ៊ុន នឹងមកតម្លើងងចក្រនៅកម្ពុជាបន្ថែមទៀត ។
លោកប្រធានក្រុមហ៊ុនក៍បានស្នើសុំ ការគាំទ្រពីសម្តេចនាយករដ្ឋមន្ត្រី ដើម្បីធ្វើយ៉ាងណាឲ្យមានការបង្កើតរោងចក្រ តម្លើងរថយន្តផង និងផលិតបំណែករថយន្តផង នៅក្នុងប្រទេសកម្ពុជា។ ជាការឆ្លើយតបសម្តេចតេជោនាយករដ្ឋមន្ត្រី បានស្វាគមន៍ ចំពោះបំណងក្នុងការវិនិយោគ នៃការតម្លើងរថយន្ត និងផលិតបំណែករថយន្ត នៅក្នុងព្រះរាជាណាចក្រកម្ពុជា។
សម្តេចមានប្រសាន៍ថា បើសិនជារោងចក្រនេះអាចផលិតឬអាចបង្កើតបាននៅក្នុងព្រះរាជាណាចក្រកម្ពុជាមែនោះវាជាជោគជ័យមួយទៀត ក្នុងគោលនយោបាយ ឧស្សាហកម្មកម្ពុជា ២០១៥-២០២៥។ សម្តេចបានជំរាបជូនលោក តាន ហេងឈួ ថា ការតម្លើងរថយន្ត ម៉ាក នីសាន់ នៅកម្ពុជានេះ គឺមិនត្រឹមតែបម្រើក្នុងទីផ្សារប្រទេសកម្ពុជាប៉ុណ្ណោះទេគឺអាចបំរើឲ្យទីផ្សារនៅក្នុងតំបន់អាស៊ានទាំងមូលតែម្តង។បច្ចុប្បន្ននេះប្រទេសជាសមាជិកអាស៊ានទាំង១០បានរួមគ្នាជាសហគមសេដ្ឋកិច្ចអាស៊ានតែមួយទៅហើយ។ សម្តេចបានឲ្យដឹងទៀតថាទីផ្សារអាស៊ាននេះមានទំហំធំណាស់គឺមានពលរដ្ឋរហូតទៅដល់៧០០លាន នាក់ ដូច្នេះ ការដាក់រោងចក្រនៅក្នុងព្រះរាជាណាចក្រកម្ពុជា អាចបម្រើឲ្យទីផ្សារទាំងកម្ពុជាផង និងទីផ្សារអាស៊ានផង ហើយក៍អាចបំរើឲ្យទីផ្សារដទៃ ទៀត នៅលើពិភពលោកផងដែរ។ សម្តេចបានលើកទឹកចិត្តឲ្យមានការរៀបចំដើម្បីឲ្យមានការតម្លើងរោងចក្រនៅកម្ពុជាក្នុងពេលឆាប់ៗខាងមុខ៕