រាជធានីភ្នំពេញ៖ បន្ទប់ស្នាក់នៅរបស់បុគ្គលិកសម្អាតអនាម័យ តូចៗ ចំនួន៧បន្ទប់ នៃមន្ទីរពេទ្យរុស្សីុ ត្រូវបានអណ្តាតភ្លើង កាលពីវេលាព្រឹកថ្ងៃទី០៧ ខែកុម្ភះ ឆ្នាំ២០១៦ ឡេបត្របាក់អស់ហ្មត់ទាំងស្រុង សល់តែគ្រោងឆ្អឹង ដោយសារ ម្ចាស់បន្ទប់មួយក្នុងចំណោមបន្ទប់ទាំង៧ ដុតធូបសែនទុកចោល ។ ហេតុការណ៍នេះកើតឡើងនៅចំណុចក្នុងបរិវេណមន្ទីរពេទ្យមិត្តភាពខ្មែរ-សូវៀត ( មន្ទីរពេទ្យរុស្សីុ ក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ ។  

យោងតាមសម្តីរៀបរាប់របស់ក្រុមអ្នកអនាម័យដូចគ្នា ដែលរស់ក្បែរនេាះ បានរៀបរាប់អោយដឹងថា នៅមុនពេលកើតហេតុ គឺគេសង្គេតឃើញអណ្តាតភ្លើងឆាបឆេះចេញពីបន្ទប់ស្នាក់នៅមួយ នៃ បន្ទប់ទាំង៧ដែលត្រូវឆាបឆេះ ខណះដែលម្ចាស់ទីតាំងអុជធូបសែនក្នុងពិធីបុណ្យចូលឆ្នាំប្រពៃណីចិន ទុកចោលហើយមិននៅមើល បង្កអោយអណ្តាតភ្លើងឆាបឆេះ យ៉ាងសន្ធោរសន្ធៅខ្លាំងឡើង រហូតរាលដាលដល់បន្ទប់ចំនួន ៦ទៀតដែលសង់ជាប់គ្នាត្រដាត់ ជាបន្តបន្ទាប់តែម្តងទៅ ។

ភ្លាមនេាះ កម្លាំងអាជ្ញាធរមូលដ្ឋាន និង សមត្ថកិច្ចជំនាញអគ្គីភ័យ ក៏ដូចជារថយន្តពន្លត់អគ្គីភ័យចំនួន ៥គ្រឿង បានចុះទៅដល់កន្លែងកើតហេតុភ្លាមៗ ផងដែរ ដើម្បីបាញ់ទឹកទប់ស្កាត់អណ្តាតភ្លើង ។ យ៉ាងណាមិញអណ្តាតភ្លើងត្រូវបានរលត់ទៅវិញផងដែរ ក្នុងរយះពេលជាងកន្លះម៉ោង ដោយសមត្ថកិច្ចជំនាញប្រើប្រាស់ឡានទឹកអស់ទាំង ៥គ្រឿងតែម្តង ក្នុងការគ្រប់គ្រងអណ្តាតភ្លើងអោយរលត់សូន្យសុងទៅវិញបាន ១០០ភាគរយ មិនបណ្តាលអោយអណ្តាតភ្លើងឆាបឆេះរាលដាលបន្តទៀត ។

លោកវរសេនីយ៍ទោ ព្រហ្ម យ៉ន ប្រធានការិយាល័យពន្លត់ និង បង្ការគ្រឿងមហន្តរាយអគ្គីភ័យ នៃស្នងការដ្ឋាននគរបាលរាជធានីភ្នំពេញ បានប្រាប់អោយដឹងថា ក្នុងគ្រេាះអគ្គីភ័យខាងលើនេះ គឺបានបណ្តាលអោយបន្ទប់ឈើតូចៗ ដែលសង់ជាប់គ្នាចំនួន ៧បន្ទប់ ស្មើរនឹង៧គ្រួសារ ត្រូវអណ្តាតភ្លើងឆាបឆេះអស់ហ្មត់ទាំងស្រុង រួមជាមួយទ្រព្យសម្បត្តិរបស់បុគ្គលិកអនាម័យ ដែលស្នាក់នៅមួយចំនួនផងដែរ ។ ហើយមូលហេតុ នៃការឆាបឆេះ គឺបណ្តាលមកពីបន្ទប់មួយ ក្នុងចំណោមបន្ទប់ទាំង ៧ដែលឆាបឆេះ ត្រូវម្ចាស់អុជធូបសែនចិន ទុកចោល រួចទៅលេងស្រុក ដោយមិនបានពន្លត់ធូបអោយរលត់ ឬរងចាំអោយរលត់អស់ជាមុនសិន ទើបបណ្តាលអោយជើងធូបត្រូវខ្យល់បក់ បង្កអោយមានភ្លើងឆាបឆេះរាលរោលខ្លាំងឡើង  រួចរាលដាលជាបន្តបន្ទាប់តែម្តងទៅ ៕

• អគ្គីភ័យ
• មន្ទីរពេទ្យរុស្ស៊ី
• ចូលឆ្នាំចិន