ខេត្តព្រះសីហនុ ៖  លំនៅដ្ឋានពលរដ្ឋមួយខ្នងផ្ទះសង់ឡើងពីថ្មក្រោមឈើលើ ត្រូវអគ្គីភ័យឆាបឆេះស្ទើរអស់ហ្មត់ទាំងស្រុង បង្កអោយមានការភ្ញាក់ផ្អើលឡើង កាលពីវេលាម៉ោង៨ ព្រឹកថ្ងៃទី០៤ ខែឧសភា ឆ្នាំ២០១៧ នៅក្រោយសាលារៀនអនុវិទ្យាល័យសម្តេចឪ ស្ថិតក្នុងសង្កាត់លេខ3 ក្រុងនិងខេត្តព្រះសីហនុ ។

ក្នុងការឆាបឆេះ នេះមិនបានបណ្តាលអោយមានមនុស្សណាម្នាក់រងរបួសឡើយ ក៏មិនរីករាលដាលប៉ះពាល់ទៅដល់លំនៅឋានក្បែរខាងផងដែរ ។ ចំពោះមូលហេតុ នៃការឆាបឆេះ សមត្ថកិច្ចនៅមិនទាន់អាចបញ្ជាក់បាននៅឡើយទេ ។

ប្រភពព័ត៌មានអោយដឹងថា មុនកើតហេតុគេសង្គេតមានផ្សែងហ៊ុយខ្មួរខ្មាញ់ពីលំនៅឋានខាងលើ លុះមិនបានប៉ុន្មាននាទីផង ស្រាប់តែមានជាអណ្តាតភ្លើងឆាបឆេះឡើង បង្កអោយមានការភ្ញាក់ផ្អើល ដល់ពលរដ្ឋក្បែរខាង រាយការណ៍ជូនសមត្ថកិច្ច និងរថយន្តពន្លត់អគ្គីភ័យចុះអន្តរាគមន៍ភ្លាមៗ ។ បើទោះបីជាមានការខិតខំប្រឹងប្រែងអន្តរាគមន៍យ៉ាងណា ក៏លំនៅឋានខាងលើ ត្រូវអណ្តាតភ្លើងបំផ្លាញអស់ស្ទើរទាំងស្រុង រួមជាមួយទ្រព្យសម្បត្តិមួយ៕

• អគ្គីភ័យ
• ប្រជាពលរដ្ឋ