ឥណ្ឌូនេស៊ី៖ ប៉ូលីសក្នុងតំបន់ Brebes នៃភាគពាយ័ព្យនៃខេត្ត Central Java បានបញ្ជាក់ថាមានមនុស្ស ១៨នាក់បានស្លាប់ក្នុងហេតុការណ៍ស្ទះចរាចរណ៍ដ៏អាក្រក់មួយដែលនៅត្រឹងអស់រយៈពេលជាង ២០ម៉ោង កាលពីថ្ងៃអង្គារនេះ។

អ្នកធ្វើដំណើរពីចាកាតាទៅកាន់ Tegal តាមភាគខាងកើតតំបន់ Brebes ដែលមានកុងត្រូលបង់លុយថ្លៃធ្វើដំណើរឆ្លងកាត់ ដែលវាធ្វើអោយស្ទះអស់រាប់ម៉ោង។ របាយការណ៍ជាច្រើនបានបង្ហាញទិន្នន័យខុសៗគ្នាទាក់ទង់នឹងរយៈពេលដែលអ្នកធ្វើដំណើរត្រូវនៅស្ទះទៅណាក៏មិនរួច ដែលមានអ្នកខ្លះថាស្ទះរហូតដល់ទៅជាង ៣៥ម៉ោង ឯណោះ។

មន្រ្តីមណ្ឌលសុខភាពនៃតំបន់ Brebes លោក Sri Gunadi Parwoko បាននិយាយថា ១២នាក់នៃជនរងគ្រោះបានស្លាប់ដោយការអស់កំលាំងខ្លាំងពេក ហើយ៥នាក់ បានស្លាប់ដោយសារគ្រោះថ្នាក់នៅផ្លូវខ្វែងគ្នា និងម្នាក់ទៀតបានស្លាប់ដោយមិនដឹងមូលហេតុច្បាស់លាស់។

តាមរយៈសារព័ត៌មាន Lensa Indonesia ក្នុងចំណោមអ្នកដែលបានស្លាប់ដោយអស់កំលាំង មានអ្នកខ្លះមានជំងឺក្នុងខ្លួន ដែលវាកាន់តែធ្វើអោយធ្ងន់ធ្ងរឡើងដោយសារការធុញថប់ (Stress)  និងកំដៅដែលកើតចេញពីការស្ទះចរាចរណ៍ដ៏អាក្រក់នេះ។

លោក Sri បានបន្ថែមថា វាពិតជាពិបាកក្នុងការជ្រៀតទៅក្បែរជនរងគ្រោះ ដោយរថយន្តសង្គ្រោះបន្ទាន់មិនអាចទៅក្បែរពួកគេបាន ហើយភ្នាក់ងារសង្គ្រោះក៏មិនអាចកំណត់សំគាល់ទីតាំងរបស់ជនរងគ្រោះក្នុងចរាចរណ៍ដ៏ចង្អៀតនោះបានឡើយ។

ភាគច្រើននៃអ្នកធ្វើដំណើរទាំងនោះគឺបានកំពុងព្យាយាមធ្វើដំណើរទៅកាន់ស្រុកកំណើតរបស់គេដើម្បីចូលរួមពិធីបុណ្យជាតិរបស់ពួកគេដែលមានឈ្មោះថា Eid ។

ប្រធានាធិបតី Joko “Jokowi” Widodo បាននិយាយកាលពីថ្ងៃច័ន្ទថា រដ្ឋាភិបាលមានសង្ឃឹមយ៉ាងមុតមាំថានឹងដោះស្រាយបញ្ហានេះអោយបានក្នុងរយៈពេល២ឆ្នាំទៀត៕

ប្រែសម្រួលដោយ៖ សិរីវុធ

• ស្ទះចរាចរណ៍
• ឥណ្ឌូនេស៊ី