តំណាងអាជីវករផ្សារងិនអាង

  រាជធានីភ្នំពេញ ៖ ជាថ្មីម្តងទៀតហើយ នៅព្រឹកថ្ងៃទី២០ ខែមករា ឆ្នាំ២០១៦ ដែលក្រុមអាជីវករផ្សារ « ងិន អាង ហៅផ្សារទំនប់ »  ជិត ១០០ បានបន្តលើកគ្នាមកផ្តុំតវ៉ានៅមុខសាលាដំបូងរាជធានីភ្នំពេញ ដើម្បីសុំអោយតុលាការជួយអន្តរាគមន៍ ដោះលែងតំណាងអាជីវករផ្សារចំនួន ២នាក់ដែលត្រូវកម្លាំងនគរបាល នៃនាយកដ្ឋានព្រហ្មទណ្ឌក្រសួងមហាផ្ទៃចាប់ឃាត់ខ្លួនកាលពីវេលាព្រឹកថ្ងៃទី ១៩ ខែមករា ឆ្នាំ២០១៦ ម្សិលមិញ ។ តំណាងអាជីវករដែលត្រូវចាប់ខ្លួនទាំង២នាក់ ទី១មានឈ្មោះ គឹម ប៊ុនអាន ភេទប្រុស អាយុ៣៨ឆ្នាំ មុខរបរជាអ្នកលក់បបរ.ស និងទី២ឈ្មោះ សេង សុងនី ភេទប្រុស អាយុ៣០ឆ្នាំ មុខរបរលក់ទឹកកក ។ ទាំង២នាក់ជាអាជីវករលក់ដូរ ក្នុងផ្សារ « ងិន អាង ហៅផ្សារទំនប់ » ខាងលើ  ។

សូមបញ្ជាក់ ការតវ៉ានេះជាលើកទី២ហើយ បន្ទាប់ពីលើកទី១ក្រុមអាជីវករប្រមាណជិត ១០០នាក់ខាងលើ បានលើកគ្នាទៅតវ៉ានៅមុខក្រសួងមហាផ្ទៃ កាលពីវេលារសៀលថ្ងៃម្សិលមិញ ក្នុងការសុំអោយសមត្ថកិច្ចដោះលែងតំណាងទាំង២នាក់ម្សិលមិញនោះ គ្មានលទ្ធិផលវិជ្ជមានអ្វីឡើយ ទើបនៅព្រឹកថ្ងៃខែដដែលនេះ ពួកគាត់បន្តលើកគ្នាមកតវ៉ា មុខសាលាដំបូងរាជធានីភ្នំពេញតែម្តងទៅ ដើម្បីសុំអន្តរាគមន៍រកយុត្តិធម៌ ។

។ គួរបញ្ជាក់ថា ក្នុងកំឡុងការតវ៉ាលើកទី១នោះ ក៏បានឈានដល់ការ បិទផ្លូវបង្កអោយចរាចរណ៍ត្រូវកកស្ទះមួយសន្ទុះធំផងដែរ ។

គួររំលឹកថា ក្រុមអាជីវករជាច្រើនរយនាក់ ក្នុងផ្សារ « ងិន អាង ហៅផ្សារទំនប់ » ដែលមានទីតាំងក្នុងសង្កាត់ទួលសង្កែ ខណ្ឌឬស្សីកែវនោះ កន្លងមកកាលពីអំឡុងចុងឆ្នាំ២០១៥ ធ្លាប់បានផ្ទុះការតវ៉ាជាច្រើនដងរួចមកហើយ ក្នុងការទាមទារអោយម្ចាស់ផ្សារថ្មី ដែលគ្រប់គ្រងដោយ ក្រុមហ៊ុន « ញ៉ូរីច » បញ្ចុះតម្លៃតូបរបស់អាជីវករទាំងអស់ ដែលមុនពេលក្រុមហ៊ុនថ្មីមួយនេះចូលមកដល់ ម្ចាស់ក្រុមហ៊ុនចាសយកតម្លៃតូបតែ ៣៥ដុល្លារប៉ុណ្ណោះក្នុងមួយខែ ប៉ុន្តែក្រោយពេលប្តូរក្រុមហ៊ុនថ្មីចូលមក តូបនីមួយៗត្រូវបង់ពី ១២០ដុល្លារ ដល់ ១៥០ដុល្លារ ទៅតាមបទដ្ឋានសាងសង់នៃតូប ។ ប៉ុន្តែការតវ៉ាជាច្រើនលើកច្រើនសាររបស់អាជីវករ គឺគ្មានលទ្ធិផលអ្វីទាំងអស់ បានត្រឹមតែ « ខ្យល់ » ហើយតម្លៃតូបត្រូវបានក្រុមហ៊ុនតំហិតអោយបង់ពី ១២០ ដល់ ១៥០ដដែល បើពុំដូចនោះ គឺនឹងត្រូវបញ្ឈប់មិនអោយអាជីវករលក់តទៅទៀត ។ សូមបញ្ជាក់បន្ថែមថា ការតវ៉ាជាច្រើនលើកច្រើនសារខាងលើនេះ គឺដឹកនាំដោយ អាជីវកម្ម២នាក់ ដែលត្រូវចាប់ខ្លួនកាលពីវេលាព្រឹកមិញ ដែលទី១ឈ្មោះ គឹម ប៊ុនអាន និងម្នាក់ទៀតមានឈ្មោះសេង សុងនី ។លុះរហូតមកត្រឹមនឹងព្រឹកថ្ងៃទី១៩ ខែមករា នេះ តំណាងអាជីវករទាំង២នាក់ ត្រូវបានកម្លាំងនគរបាល នៃនាយកដ្ឋានព្រហ្មទណ្ឌក្រសួងមហាផ្ទៃ ចាប់ឃាត់ខ្លួនយកមកកាន់នាយកដ្ឋានភ្លាមៗ ដោយមិនទាន់ដឹងថាការចាប់ខ្លួននោះពាក់ព័ន្ធនឹងករណីអ្វីឡើយ ។

• អាជីវករផ្សារ
• ផ្សារទំនប់