រាជធានីភ្នំពេញ ៖ ជនអន្តោប្រវេសន៍ប្រុសស្រីខុសច្បាប់ ១៦នាក់ ក្នុងចំណោម ១៧៣នាក់ ដែលធ្វើការនៅក្នុងរោងចក្រផលិតស្រាបៀរ ថៃហ្គ័រ មានទីតាំងស្ថិតសង្កាត់ព្រែកឯង ខណ្ឌច្បារអំពៅ ត្រូវបានកម្លាំងនគរបាល នៃនាយកដ្ឋានអន្តោប្រវេសន៍ធ្វើការឃាត់ខ្លួនភ្លាមៗ យកមកកាន់នាយកដ្ឋានដើម្បីចាត់ការតាមនីតិវិធី ក្រោយរកឃើញថា ពួកគេចូលមករស់នៅ និងធ្វើការដោយខុសច្បាប់ ។

ប្រតិបត្តិការនេះ ធ្វើឡើងកាលពីវេលាម៉ោង ២ និង ០០នាទីរសៀលថ្ងៃទី១៩ ខែមករា ឆ្នាំ២០១៦ ក្រោមការដឹកនាំកម្លាំងផ្ទាល់ពីសំណាក់ឧត្តមសេនីយ៍ទោអ៊ុក ហៃសីឡា ប្រធាននាយកដ្ឋានសើុបអង្គេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ និងមានការសម្របសម្រួលពីព្រះរាជអាជ្ញាររងអមសាលាដំបូងរាជធានីភ្នំពេញ លោកមាស ច័ន្ទពិសិដ្ឋ ផងដែរ ។

ឧត្តមសេនីយ៍ទោអ៊ុក ហៃសីឡា បានអោយដឹងថា ជនបរទេសទាំង១៧៣នាក់នេះ ស្មើរនឹង១០សញ្ជាតិ ក្នុងនោះជនជាតិវៀតណាមមាន ៩៩នាក់ ស្រីម្នាក់ ។ លោកឧត្តមសេនីយ៍ទោ បន្តថា ក្នុងចំណោមពួកគេ ១៥៧នាក់មានលិខិតឆ្លងដែនត្រឹមត្រូវ តែគ្មានលិខិតការងារ ដូចនេះពួកគេត្រូវធ្វើការផាកពិន័យ ៥០មឺុនរៀលចូលរដ្ឋ រួចណែនាំអោយទៅធ្វើសៀវភៅការងារអោយបានត្រឹមត្រូវ ដើម្បីបន្តរស់នៅ និងធ្វើការក្នុងកម្ពុជា ។ ដោយឡែក ១៦នាក់ផ្សេងទៀតគ្មានលិខិតពាក់ព័ន្ធអ្វីទាំងអស់ នឹងត្រូវឃាត់ខ្លួនយកទៅកាន់នាយកដ្ឋានភ្លាមៗ ដើម្បីកសាងនីតិវិធី ធ្វើការបណ្តេញចេញពីកម្ពុជា នៅពេលក្រោយ ៕

• ជនបរទេស
• រោងចក្រផលិតស្រាបៀរ ថៃហ្គ័រ