រាជធានីភ្នំពេញ ៖ តូបលក់សម្លៀកបំពាក់តូចៗ ចំនួន ៤តូបដែលសង់ឡើងពីដែក សង់ជាប់ៗគ្នា នៅក្នុងផ្សារឯករាជ្យ៣ មានទីតាំងតាមបណ្តោយផ្លូវវ៉េងស្រេង ក្នុងក្រុមទី២ ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ត្រូវបានអគ្គីភ័យឆាបឆេះអស់ហ្មត់គ្មានសល់ កាលពីវេលាម៉ោង ៦ និង ១៥នាទីព្រឹកថ្ងៃទី១៨ ខែមករា ឆ្នាំ២០១៥ ដោយសារទុស្សេចរន្តអគ្គីសនី ។តូចដែលត្រូវអគ្គីភ័យឆាបឆេះ មានតូបលេខ ៣៥  ៣៦  ៣៧  និង លេខ៣៨  ដែលតូបទាំង៤ សង់ឡើងជាប់ៗគ្នា ជាតូបលក់សម្លៀកបំពាក់បុរសនារីទូទៅ  និងមានកម្មសិទ្ធចំនួន ២ម្ចាស់ ដែលជាបងប្អូនបង្កើតនិងគ្នា ។

ប្រភពព័ត៌មានពីអាជីវករនៅផ្សារឯករាជ្យខាងលើ បានរៀបរាប់អោយដឹងថា ដំបូងឡើយ គេសង្គេតឃើញមានផ្សែងហុយខ្មួរខ្មាញ់ចេញពីតូចលេខ ៣៧ នៅវេលាម៉ោង ប្រមាណ ៦ និង ០០នាទី ដែលជាថេរវេលា ដែលអាជីវករគ្រប់គ្នា មិនទាន់បើកទ្វារអាជីវកម្មផងនោះ ។ ប្រភពដដែលបន្តថា ក្រោយមានផ្សែងហុយខ្មួរខ្មាញ់ហើយនោះ ស្រាប់តែមានជាអណ្តាតភ្លើងឆាបឆេះឡើងយ៉ាងសន្ធោរសន្ធៅរតែម្តង បង្កអោយមានការភ្ញាក់ផ្អើលដល់អាជីវករដែលលក់ដូរក្បែរនោះ ភ័យស្លន់ នាំគ្នារត់ជាន់ជើងគ្នាប្រសាច ស្រវាទៅយកទឹក និងបំពង់ពន្លត់អគ្គីភ័យ មកបាញ់ និងជះ ពន្លត់អណ្តាតភ្លើង ប៉ុន្តែគ្មានលទ្ធិផល ទើបធ្វើការរាយការណ៍ជូនសមត្ថកិច្ចមូលដ្ឋាន អោយចុះអន្តរាគមន៍ ។ ភ្លាមៗនោះ រថយន្តពន្លត់អគ្គីភ័យចំនួន ៦គ្រឿង ក្នុងនោះ របស់ស្នងការដ្ឋាននគរបាលរាជធានីភ្នំពេញ ចំនួន ៥គ្រឿង និង របស់កងរាជអាវុធហត្ថរាជធានីភ្នំពេញ ចំនួន ១គ្រឿង បានចុះអន្តរាគមន៍ បាញ់ពន្លត់អណ្តាតភ្លើងអោយរលត់សូន្យសុងទៅវិញភ្លាមៗផងដែរ មិនបណ្តាលអោយមានការឆាបឆេះរាលដាលដល់តូប ដទៃទៀតដែលនៅក្បែរនោះ ។ ប៉ុន្តែក្នុងនោះសមត្ថកិច្ចប្រើប្រាស់រថយន្តទឹកអស់តែ ៥គ្រឿងប៉ុណ្ណោះ ដោយប្រើប្រាស់ពេលវេលាជាងកន្លះម៉ោង ទើបអាចគ្រប់គ្រងស្ថានការណ៍បាន ១០០ភាគរយ ។

សូមបញ្ជាក់ថា ក្នុងគ្រោះអគ្គីភ័យខាងលើនេះដែរ គឺបណ្តាលអោយតូបទាំង៤ ត្រូវឆាបឆេះហ្មត់ទាំងស្រុង ក្នុងនោះដែរទ្រព្យសម្បត្តិមួយចំនួន ដូចជា សម្លៀកបំពាក់ តុ ទូ កៅអីជាដើម ក៏ត្រូវអណ្តាតភ្លើងដុតបំផ្លាញអស់គ្មានសល់ផងដែរ ។ សមត្ថកិច្ចជំនាញអោយដឹងថា ក្រោយការធ្វើកោសល្យវិច្ច័យរួចមក ការឆាបឆេះខាងលើ គឺបណ្តាលមកពីទុស្សេចរន្តអគ្គីសនី ទើបបង្កអោយមានជាអណ្តាតភ្លើងឆាបឆេះឡើងតែម្តងទៅ ។

សូមបញ្ជាក់បន្ថែមថា ករណីគ្រោះអគ្គីភ័យខាងលើនេះ គឺជាករណីលើកដំបូងគេបង្អស់ហើយ សម្រាប់ដើមឆ្នាំ ២០១៦  ដែលជាការឆាបឆេះតែទ្រព្យសម្បត្តិតែមិនបានបណ្តាលអោយមានមនុស្សណាម្នាក់រងរបួស ឬ ស្លាប់ឡើយ ក្នុងភ្លុកភ្លើងឡើយ ៕

• អគ្គីសនី
• ំ
• ភ្លើងឆាបឆេះ