រាជធានីភ្នំពេញ៖  ចៅក្រមសាលាដំបូងរាជធានីភ្នំពេញលោក អ៊ឹម វណ្ណៈ ប្រធានក្រុមប្រឹក្សា ជំនុំ ជំម្រះ នៅព្រឹកថ្ងៃទី៩ខែឧសភាឆ្នាំ២០១៧បានប្រកាសសាលក្រមផ្តន្ទាទោសជនជាប់ចោទ ១.ឈ្មោះ Varadi Adrian Calin ភេទប្រុសអាយុ៣៥ឆ្នាំជនជាតិROMANIA ២.ឈ្មោះ Ibe Chukwuemeka ភេទប្រុសអាយុ៤០ឆ្នាំជនជាតិNIGERIAN ដាក់ពន្ធនាគារម្នាក់ៗអស់មួយជីវិត នឹងពិន័យជា ប្រាក់ចំនួនម្នាក់ៗ៤០លានរៀលចូរថវិការដ្ឋ។

តុលាការបានសម្រេចដូចនេះក្រោមការចោទប្រកាន់ពីបទ ដឹងជញ្ជូនដោយខុសច្បាប់នូវសារធាតុញៀនប្រព្រឹត្តនៅព្រលានយន្តហោះអន្តរជាតិភ្នំពេញកាលរសៀលថ្ងៃទី ១៤ ខែសីហា ឆ្នាំ២០១៦ដកហូតគ្រឿងញៀន កាកូអ៉ីន ជិត៥គីឡូក្រាម នឹងទុកសិទ្ធិ ឲ្យប្តឹង ឧទ្ធរណ៍ តាមកំណត់ច្បាប់។

ជនជាប់ចោទទាំង២នាក់ត្រូវបានចៅក្រមសាលាដំបូងរាជធានីភ្នំពេញសម្រេចឃុំខ្លួនកាលថ្ងៃទី១៨ខែសីហាឆ្នាំ២០១៦។ សូមជម្រាបថាកម្លាំងសមត្ថកិច្ចដែលប្រចាំការនៅព្រលានយន្តហោះអន្តរជាតិភ្នំពេញនៅរសៀលថ្ងៃទី១៤ ខែសីហា ឆ្នាំ២០១៦នេះ បានចាប់ខ្លួនជនជាតិ ROMANIA ម្នាក់ ហើយរកឃើញកាកូអ៉ីន ជិត៥គីឡុក្រាម។

លោកនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានអបអរសាទរនិងកោតសសើរដល់សមត្ថកិច្ចបំពេញការងារនៅព្រលានយន្តហោះអន្តរជាតិភ្នំពេញដោយបានសហការបង្រ្កាបករណីជួញដូរគ្រឿងញៀនឆ្លងដែនមួយនេះ។

លោកបានបន្តទៀតថា កម្លាំងសមត្ថកិច្ចបានឃាត់ជនជាតិ ROMANIA ម្នាក់ធ្វើដំណើរ តាម ជើងយន្តហោះQR៩៧០ ថ្ងៃទី១៤ ខែសីហា ឆ្នាំ២០១៦ម៉ោង១៥និង៥០នាទី រកឃើញ កូកាអ៊ីនចំនួន៤៩៦០.៦៩ក្រាមចូលមកកម្ពុជា។សម្រាប់ជនសង្ស័យរូបនេះត្រូវបាននាំខ្លួន យកទៅសួរនាំនៅមន្ទីរប្រឆាំងគ្រឿងញៀនក្រសួងមហាផ្ទៃ ហើយក៏បានឈានទៅដល់ការឃាតខ្លួនជនជាតិNIGERIANទៀត៕                       

• តុលាការ
• ផ្តន្ទាទោស
• គ្រឿងញៀន