រាជធានីភ្នំពេញ៖  ជាការពិតដែលយើងធ្លាប់បានដឹងកន្លងមកហើយថា សារព័ត៌មានគឺជាកញ្ចក់ ឆ្លុះបញ្ចាំងពីទិដ្ឋភាពទូទៅរបស់សង្គម មានទាំងភាពវិជ្ជមាន និងអវិជ្ជមាន ដើម្បីបង្ហាញពីព័ត៌មានទូទៅ ការកម្សាន្ត ការអប់រំ និង ការរិះគន់ ស្ថាបនាផ្សេងៗ ជូនទៅដល់ប្រជាពលរដ្ឋ និងថ្នាក់ដឹកនាំទូទៅ ទទួលយកទៅគិតពិចារណា និងធ្វើការកែតម្រូវនូវចំណុចខ្វះខាត ។

ឆ្លើយតបបន្ថែមចំពោះបញ្ហាខាងលើនេះនៅថ្ងៃទី២៦ ខែ មេសា ឆ្នាំ២០១៧ នៅស្នាក់ការ សហភាពសហព័ន្ធអ្នកកាសែត កម្ពុជា ហៅកាត់ ស.ស.ស.ក លោក ហ៊ុយ វណ្ណៈ បានលើកឡើងថា “ អ្នកសារព័ត៌មានភ្លឺ សង្គម ក៏ភ្លឺដែរ ” ។ ក្នុងន័យនេះមិនមែនមានន័យថា អ្នកសារព័ត៌មាន គឺជាចង្គៀង មាំងសុង ប្រេងកាតហើយរិតតែមិនមែនជា អំពូលម៉ែត្រទៀត តែក្នុងអត្តន័យនេះ ប្រហែលជាលោកផ្តោតសំខាន់ថា ក្នុងនាមជាអ្នកសារព័ត៌មាន មានតួនាទីជាកញ្ចក់សម្រាប់ឆ្លុះបំភ្លឺ សម្រាប់ បង្ហាញ ពីទិដ្ឋភាពសង្គមទាំងមូល ដូច្នេះហើយអ្នកសារព័ត៌មានត្រូវមាន វិជ្ជាជីវៈផ្ទាល់ខ្លួនអោយបានត្រឹមត្រូវ ជាអ្នកព័ត៌មាន ទាំងការយកព័ត៌មាន ការសរសេរព័ត៌មាន និងពាក្យសម្តី ឬកពារដ៏ប្រពៃរបស់ខ្លួន ក្នុងការសាកសួរនាំដើម្បីបានព័ត៌មានពីបុគ្គលណាម្នាក់ ដែលជាគោលដៅ នៃព័ត៌មានដែលយើងចង់បានយកមកផ្តល់ជូនសង្គមបានដឹង បានឃើញ ទាំងអាក្រក់ ល្អ សខ្មៅ ជាដើម ។

ក្នុងន័យដដែលនេះហើយ ក្នុងនាមលោកប្រធាន សហភាពសហពន្ធ័អ្នកសារព័ត៏មានលោកបានខិតខំផ្តួចផ្តើមបង្កើតកម្មវិធីសិក្សា ឬហៅថា កម្មវិធីចែករំលែកទាំង ចំណេះដឹង ចំណេះធ្វើ និងពិសោធន៍ នៃជំនាញសារព័ត៌មានក៏ដូចគោលការនៃការដឹកនាំស្ថាប័នព័ត៏មានព្រមទាំងបានអញ្ជើញវាក្មិនជើងចាស់មានទាំងជំនាញនិងបទពិសោធន៌យូរឆ្នាំដើម្បីធ្វើបទបង្ហាញការចែករំលែកដល់សិក្ខាកាមជាង២០០នាក់ក្នុងការពង្រឹងនូវសក្កានុពល ផ្នែកព័ត៌មានរបស់ប្រទេស ជាតិអោយកាន់តែរីកចម្រើនទ្វេឡើង ពិសេសដើម្បីពង្រឹងធនធានមនុស្សជំនាន់ក្រោយ អោយទទួលបាននូវអ្វីដែលជាភាព ជោគជ័យ យកមកអនុវត្តន៌បន្ត ដើម្បីបន្តផ្តល់ព័ត៌មានចែកជូនដល់ប្រជាក្នុងសង្គមជាតិ បានទទួលនូវ ព័ត៌មាន ដែលពោរពេញទៅដោយក្រមសីលធម៌ វិជ្ជាជីវៈ ភ្ជាប់ជាមួយអក្ខរាវិរុទ ក៏ដូចជា ពាក្យពេចន៍ដែលមានការគោរពត្រឹមត្រូវ អោយស្របតាមពាក្យដែលលោក បានថ្លែងថា “ អ្នកសារព័ត៌មាន ភ្លឺ សង្គមជាតិ ក៏ភ្លឺ ដែរ ” ៕

• ហ៊ុយ វណ្ណៈ
• សារព័ត៌មាន
• សង្គមជាតិ
• ំ