រាជធានីភ្នំពេញ៖  កីឡាករ ទូច បញ្ចរ៉ុង របស់ក្លឹបបឹងកេតត្រូវបានគ្រូបង្វឹកដាក់ពិន័យកាត់ប្រាក់ខែដោយបានសាងកំហុសពេលប្រកួតក្លឹប ភ្នំពេញក្រោន ដែលយកក្បាលទៅបោកទង្កិចនឹងផ្ទៃមុខអាជ្ញាកណ្តាលខណៈខឹងសម្បារបានកាតក្រហម។ ក្លឹបបឹងកេត បានបង្ហោះ សេចក្ដីថ្លែងការណ៍ស្ដីពីការ ដាក់ទណ្ឌកម្មទៅលើកីឡាករ ទូច បញ្ចរ៉ុង កាលពីថ្ងៃទី២៧ ខែឧសភា ឆ្នាំ២០១៧លើហ្វេសប៊ុកឱ្យដងថា 

“អំឡុងការប្រកួតទល់នឹងក្លិបភ្នំពេញក្រោន ខ្សែការពារ ទូច បញ្ចរ៉ុង របស់ក្លិបបឹងកេត ត្រូវបានអាជ្ញាកណ្ដាលបណ្ដេញចេញពីទីលាន និង បានបង្ហាញអាកាប្បកិរិយា មិនអាចទទួលយកបាន ថ្វីបើទង្វើនោះកើតចេញអំពីកំហឹងមួយឆាវមិនបានគិតវែងឆ្ងាយហើយ សាមីកីឡាករបានសុំទោសជាសាធារណះរួចហើយក៏ដោយ”។

សេចក្ដីថ្លែងការណ៍បានបញ្ជាក់ថា  ក្លឹបបឹងកេត ប្រកាន់គោលការណ៍វិជ្ជាជីវះ ស្មារតីកីឡា និង ការលេងដោយយុត្តិធម៌ ដូច្នេះ ក្លិបមិនគាំទ្រទង្វើដែល បញ្ចារ៉ុង បានប្រព្រឹត្តនោះឡើយ ដ្បិតវាជាគំរូមិនល្អដល់យុវជន និងមិត្តរួមក្រុមឡើយ។ អាស្រ័យហេតុនេះ ក្លិបបឹងកេត សូមប្រកាសអំពីការដាក់ទណ្ឌកម្មលើកីឡាករ ទូច បញ្ចរ៉ុង ដោយកាត់ប្រាក់ខែមួយផ្នែក និង ព្រមានមិនឲ្យមានសកម្មភាពខុសឆ្គងបែបនេះទៀតនៅពេលអនាគត។

សូមរំលឹកថា លទ្ធផលការប្រកួតកាលថ្ងៃទី២៥ ខែឧសភា ឆ្នាំ២០១៧ ក្លឹបបឹងកេត បន្តចាញ់ ភ្នំពេញក្រោន ទៀតក្នុងលទ្ធផល ១-២ ប៉ុន្តែលើកនេះប៉ះទង្កិចគ្នាខ្លាំងជាងមុន ដែលធ្វើឱ្យអ្នកគាំទ្រនិងអ្នកទស្សនាមានការភ្ញាក់ផ្អើលនិងមិនពេញចិត្តចំពោះបញ្ហាកីឡាករមួយរូបត្រូវកាតក្រហមដើរចេញបន្សល់១០នាក់លេង។

ភ្នំពេញក្រោនបាននាំមុខទៅលើម្ចាស់ផ្ទះបឹងកេត តាមរយៈការតែតបាល់ដោយកីឡាករវ័យ១៧ ឆ្នាំ ស៊ិន កក្កដា តាមរយៈការបញ្ចូនបាល់ជ្រុងពីកីឡាករ កែវ សុខផេង។ ការប្រកួតលើកនេះកាន់តែខ្លាំងជាមុនៗទៀតដោយរហូតដល់នាទីទី៣១ មានការប៉ះទង្គិចក៏កើតមានឡើងរវាងកីឡាករ ទូច បញ្ចារ៉ុង ជាមួយកីឡាករ ប្រាក់ ធីវ៉ា របស់ភ្នំពេញក្រោនដោយអាជ្ញាកណ្ដាលផ្ដល់កាតលឿង២ ដងស្មើនឹងកាតក្រហមបណ្តេញកីឡាករ ទូច បញ្ចារ៉ុង ចេញពីការប្រកួតបង្កជារឿងខឹងសម្បារយ៉ាងខ្លាំង ទូច បញ្ចារ៉ុង ហើយពេលនោះកីឡាកររូបនេះបានយកក្បាលទៅបាកលើផ្ទៃមុខអាជ្ញាកណ្តាលបណ្តាលដួលលើដី កាន់តែបង្កកំហុសធ្ងន់ទៀត ទើបមានការឃាតដើរចេញទីលានប្រកួតតែមិនអស់ចិត្តនោះទេ៕ដោយ បូរិន

• កីឡាករ
• ទូច បញ្ចរ៉ុង
• ទទួពិន័យ
• ប្រកួត