ក្រុមហ៊ុនហ្វេសបុកជឿថា ឆ្នាំ ២០១៦ នេះគឺជាឆ្នាំដែលការប្រើប្រាស់លេខទួរស័ព្ទនឹងត្រូវបានបញ្ចប់ ដែលទាំងអស់នេះត្រូវអរគុណលើ កម្មវិធី Messenger។
បណ្តាញសង្គមយក្សនេះ បានពន្យល់ថា “វាដូចគ្នាទៅនឹងទូរស័ព្ទដៃ ប្រភេទបត់អញ្ចឹងដែរ ព្រោះប្រភេទទូរស័ព្ទនេះ គេបានឈប់ប្រើទៀតហើយ រួមទាំងវិធីទាក់ទងគ្នាជំនាន់មុន ក៏គេបានផ្លាស់ប្តូរផងដែរ”។ ដូចនេះ ចំពោះលេខទូរស័ព្ទក៏នឹងមានជោគវាសនាដូចគ្នាអញ្ចឹងដែរ។
នៅក្នុងការបង្ហាញ អំពី ហ្វេសបុក សម្រាប់ឆ្នាំ២០១៦ (Facebook into 2016) ក្រុមហ៊ុនយក្សនេះបានលើកឡើងថា កម្មវិធី Messenger មានសមត្ថភាពមិនត្រឹមតែបញ្ជូនសារជាអក្សរនោះទេ ប៉ុន្តែវាក៏អាចបញ្ជូនសារជា សំលេង រូបភាព និង វីឌីអូ ក៏ដូចជា Business Card និង ផ្ទេរប្រាក់ផងដែរ ដែលតាមរយៈនេះ ការទាក់ទងគ្នា មិនបានទាមទារអោយអ្នកដឹង ពីលេខទូរស័ព្ទគ្នាឡើយ។ អ្វីដែលអ្នកត្រូវធ្វើនោះគឺ ភ្ជាប់ “Friend” ជាមួយពួកគេ។
ទោះបីជា ហ្វេសបុកបានបង្កើត និងលើកឡើងពី កម្មវិធី Messenger របស់ខ្លួនដែលជាហេតុផលមួយ សម្រាប់ការបញ្ឈប់ការប្រើប្រាស់លេខទូរស័ព្ទយ៉ាងណាក្តី ក៏នៅមានកម្មវិធីស្រដៀងនេះផ្សេងៗទៀតជាច្រើន ដែលអាចធ្វើការបញ្ជូនសារជា អក្សរ វិឌីអូ និងសំលេង បានដូចគ្នា ដោយមិនទាមទារលេខទូរស័ព្ទឡើយ។
ទោះជាយ៉ាងនេះក្តី វាជាការអះអាងបែបស្មុកស្មាញរបស់ហ្វេសបុក ដោយហេតុថា លេខទូរស័ព្ទនៅតែត្រូវបានប្រើសម្រាប់ ការគ្រប់គ្រងគណនី និងការដាក់អោយដំណើរការកម្មវិធីទាំងនោះ ដែលមានដូចជា Whatsapp, Viber, Skype និង FaceTime ជាដើម។ ក្រៅពីនេះ ក្រុមហ៊ុនខ្លះផ្សេងទៀត ទាមទារលេខទូរស័ព្ទ ក្នុងហេតុផលសុវត្ថិភាពផ្សេងៗរបស់គណនីផងដែរ។
ដូច្នេះ ខណៈដែលហ្វេសបុកបានលើកឡើងពីនិន្នាការមួយសម្រាប់ឆ្នាំ ២០១៦នេះ ដែលថាលេខទួរស័ព្ទនឹងត្រូវឈប់ប្រើ ហើយនឹងមិនចាំបាច់ប្រើសម្រាប់ការ Call និងការផ្ញើសារតទៅទៀតនោះ គោលដៅនៃការប្រើប្រាស់លេខទូរស័ព្ទ នឹងត្រូវបានផ្លាស់ប្តូរតាមរយៈការវិវត្តន៍នៃបច្ចេកវិទ្យា ហើយវាអាចនឹងត្រូវបានប្រើសម្រាប់គោលបំណងផ្សេងប៉ុណ្នោះ។ ដូច្នេះហើយ លេខទូរស័ព្ទប្រហែលជា អាចនៅមានតម្រូវការប្រើប្រាស់មួយរយៈបន្តទៀត៕
ប្រភព៖ TECH RADAR