|
 |
MENU
|
|
|
|
MENU
|
លោក John Kerry រដ្ឋមន្ត្រីក្រសួងការបរទេសអាមេរិក នៅក្នុងសន្និសីទសារព័ត៌មានរបស់លោកក្នុងប្រទេសកម្ពុជានារសៀលថ្ងៃទី២៦ មករានេះ បានលើកឡើងពីបញ្ហាជាច្រើនទាក់ទងនឹងទំនាក់ទំនងអាមេរិក និងកម្ពុជា ហើយបានសរសើរកម្ពុជាចំពោះការរីកចម្រើនផ្នែកសេដ្ឋកិច្ច។ តែទោះជាយ៉ាណាក៍ដោយ ប្រមុខការបរទេសអាមេរិករូបនេះ ក៏បានសម្តែងក្តីព្រួយបារម្ភយ៉ាងខ្លាំងចំពោះបញ្ហាសិទ្ធិមនុស្សនៅក្នុងប្រទេសកម្ពុជាផងដែរ។
ដំណើរទស្សនៈកិច្ចរបស់រដ្ឋមន្ត្រីក្រសួងកាបរទេសអាមេរិកលោក John Kerry បានបិទបញ្ចប់ហើយនៅកម្ពុជាកាលពីថ្ងៃអង្គារទី២៦មករាម្សិលមិញនេះ។លោកបានថ្លែងនៅក្នុងសន្និសីទសារព័ត៌មាននោះថា លោកបានទទួលស្គាល់ពីការជឿនលឿនលើសេដ្ឋកិច្ចរបស់កម្ពុជាសើ្ទតែគ្រប់វិស័យ ហើយថាមិនយូរទេប្រជាពលរដ្ឋកម្ពុជានឹងក្លាយជាប្រទេស ដែលមានប្រាក់ចំនូលកម្រិតមធ្យម។ ប៉ុន្តែយ៉ាងណាក៏ដោយ អាមេរិកនៅតែយកចិត្តទុកដាក់យ៉ាងខ្លាំងចំពោះការគោរពសិទ្ធិមនុស្ស សេរីភាពជាសាកល និងអភិបាលកិច្ចល្អក្នុងប្រទេសកម្ពុជា។ លោកបានសង្កត់ធ្ងន់ថា គោលការណ៍គ្រឹះរបស់រដ្ឋាភិបាលក្នុងសង្គមប្រជាធិបតេយ្យ គឺរដ្ឋាភិបាលត្រូវធ្វើឲ្យប្រាកដថា អ្នកតំណាងរាស្ត្រជាប់ឆ្នោតទាំងអស់ធ្វើសកម្មភាពបំពេញតួនាទីរបស់ខ្លួនបំរើប្រជាពលរដ្ឋ ដោយគ្មានការភ័យខ្លាច ការវាយធ្វើបាប និងការចាប់ខ្លួនជាដើម។
ការបញ្ជាក់របស់លោក John Kerry យ៉ាងដូច្នេះ ប្រហែលសំដៅទៅលើបញ្ហានយោបាយថ្មីៗ របស់ប្រទេសកម្ពុជា ដែលប្រធានគណបក្សប្រឆាំង លោក សម រង្ស៊ី និងជាតំណាងរាស្ត្រមួយរូប ត្រូវបានតុលាការកម្ពុជាចេញដីកាចាប់ខ្លួនជាបន្តបន្ទាប់នាចុងឆ្នាំ២០១៥។ ក្រៅពីចេញដីកាចាប់ខ្លួនប្រធានគណបក្សប្រឆាំង តំណាងរាស្ត្រពីររូបរបស់គណបក្សប្រឆាំងក៏ត្រូវជនមិនស្គាល់មុខបានវាយដំយ៉ាងដំណំថែមទៀតផង។ ក្រៅពីនោះក៏មានដែរ ការដកតំណែងលោកកឹម សុខាចេញពីអនុប្រធានសភា។
ការថ្លែងយ៉ាងដូចនេះរបស់លោក John Kerry គឺធ្វើឡើងបន្ទាប់ពីលោក បានជួបដាច់ដោយឡែកផ្សេងគ្នាជាមួយរដ្ឋាភិបាល គណបក្សសង្គ្រោះជាតិ និងក្រុមសង្គមស៊ីវិល។
នៅថ្ងៃទី២៦ មករាម្សិលមិញ លោក Kerry បានជួបជាមួយលោកនាយករដ្ឋមន្ត្រីហ៊ុន សែន លោកហោ ណាំហុង រដ្ឋមន្ត្រីក្រសួងការបទេសកម្ពុជា ប្រធានស្តីទីគណបក្សសង្គ្រោះជាតិ លោក កឹម សុខា និងតំណាងអង្គការសង្គមស៊ីវិលផងដែរ។
ក្នុងជំនួបជាមួយប្រមុខរដ្ឋាភិបាលកម្ពុជា លោក John Kerry បានលើកពីបញ្ហាសន្តិសុខ បញ្ហាសេដ្ឋកិច្ច ជាពិសេសអាមេរិកក៏បានសន្យាចូលរួមលុបបំបាត់អំពើពុករលួយនៅកម្ពុជាផងដែរ។ បើតាមហ្វេសប៊ុកផ្លូវការលោកនាយករដ្ឋមន្ត្រីហ៊ុន សែនវិញ ក្នុងបញ្ហាសន្តិសុខ កម្ពុជាបានសន្យាសហការជាមួយអាមេរិក ដើម្បីពង្រឹងទំនាក់ទំនងរវាងប្រទេសទាំងពីរក្នុងការប្រយុទ្ធប្រឆាំងអំពើភេរវកម្មគ្រប់យ៉ាង ដើម្បីសុខសន្តិភាពនៃប្រទេសក្នុងតំបន់ និងក្នុងពិភពលោកទាំងមូល។
ដោយឡែកជំនួបរវាងលោក ចន ឃែរី និងប្រធានស្តីទីគណបក្សប្រឆាំង ប្រមុខការទូតអាមេរិក មិនបានបង្ហើបឱ្យដឹងពេលថ្លែងក្នុងសន្និសីទសារព័ត៌មាននោះទេ។ប៉ុន្តែសារព័ត៏យើងបានដកស្រង់ពីគេហទំព័ររបស់ឯកឧត្តម កឹម សុខា ដែលលើកឡើងថាស្ថានភាពនយោបាយបច្ចុប្បន្ន និងបរិយាកាសមុនការបោះឆ្នោតមានការគំរាមកំហែងអ្នកនយោបាយ ការប្រើអំពើហិង្សា ការចាប់ខ្លួនសកម្មជននយោបាយ និងការប្រើប្រាស់ប្រព័ន្ធតុលាការ ដើម្បីកៀបសង្កត់ខាងនយោបាយជាដើម។
កិច្ចការបោះឆ្នោតលោកបានសុំឲ្យសហរដ្ឋអាមេរិក និងសហគមន៍អន្ដរជាតិ ផ្ដោតការយកចិត្តទុកដាក់ឲ្យកាន់តែខ្លាំងដើម្បីឲ្យការបោះឆ្នោតឆ្នាំ២០១៧ ឆ្នាំ២០១៨ ប្រព្រឹត្ដទៅដោយសេរី ត្រឹមត្រូវ និងយុត្ដិធម៌ ជៀសវាងអំពើហិង្សាជាពិសេស សូមសហរដ្ឋអាមេរិកបញ្ជូនអ្នកសង្កេតការណ៍មកសង្កេតមើលការបោះឆ្នោតឲ្យបានច្រើនទូរទាំងប្រទេស និង បញ្ហារំលោភសិទ្ធិមនុស្សទូទៅ លើប្រជាពលរដ្ឋហើយលោកបានលើក
ឡើងផងដែរថាគណបក្សសង្គ្រោះជាតិធ្វើដំណើរឆ្ពោះទៅរកការបោះឆ្នោតដោយអហិង្សា
និងបន្ដការជជែកគ្នាជាមួយភាគីគណបក្សកាន់អំណាចដើម្បីដោះស្រាយបញ្ហាដោយសន្ដិវិធី។
ចំណែកឯជំនួបជាមួយសង្គមស៊ីវិល លោក John Kerry បានលើកឡើងពីតួនាទីរបស់សង្គមស៊ីវិលនៅកម្ពុជាស្តីពីបញ្ហាការកាប់បំផ្លាញព្រៃឈើ និងបញ្ហាបរិស្ថានជារួមផងដែរ។
សូមបញ្ជាក់ឲ្យដឹងផងដែរថា ក្រោយបំពេញទស្សនៈកិច្ចនៅកម្ពុជារយៈពេលពីរថ្ងៃពីថ្ងៃទី២៥ ដល់ថ្ងៃទី២៦ មករា លោក John Kerry រដ្ឋមន្ត្រីក្រសួងការបរទេសអាមេរិកបានធ្វើដំណើរទៅកាន់ប្រទេសចិនដើម្បីពិភាក្សាពីបញ្ហាសន្តិសុខពិសេសបញ្ហាកូរ៉េខាងជើង និងបញ្ហាមួយចំនួនទៀត។
អាមេរិកបានសន្យាពង្រឹងទំនាក់ទំនងរវាងកម្ពុជា និងអាមេរិកឱ្យកាន់តែរឹងម៉ាំផងដែរបើ
ទោះបីជាសហរដ្ឋអាមេរិកបានសម្តែងក្តីព្រួយបារម្ភពីបញ្ហាការគោរពសិទ្ធមនុស្សក៏ដោយ៕
