ខេត្តតាកែវ ៖ នាព្រឹកថ្ងៃទី២៦ ខែមករា ឆ្នាំ២០១៦ នៅសាលប្រជុំសាលាខេត្តតាកែវ ឯកឧត្តម ឡាយ វណ្ណៈ អភិបាលខេត្តតាកែវបានជួបជាមួយបងប្អូនអ្នករត់រឺម៉កម៉ូតូ ដើម្បីសំណេះសំណាល និងពិភាក្សាពីការរៀបចំបង្កើតជាសមាគមអ្នករត់រឺម៉កម៉ូតូនៅក្នុងខេត្តតាកែវដែលឯកឧត្តមបានផ្តួចផ្តើមគំនិតជាមួយបងប្អូនកាលពីចុងឆ្នាំ២០១៥កន្លងមក។ 
ឯកឧត្តមបានមានប្រសាសន៍សមាគមនេះនឹងក្លាយជាកន្លែងដែលផ្តល់ប្រាក់កំចីការប្រាក់ទាបបំផុតដល់បងប្អូនដែលជាសមាជិកសម្រាប់ជួយសម្រួលដល់ជីវភាព និងដោះស្រាយបញ្ហាបន្ទាន់នានា ដូចជាព្យាបាលជំងឺ ប្រពន្ធសម្រាលកូន ....។ល។ ហើយការប្រាក់ដែលទទួលបានមកនឹងក្លាយជាចំណូលដែលធ្វើឱ្យសមាគមកាន់តែមានភាពរឹងម៉ាំខាងផ្នែកហិរញ្ញវត្ថុបន្ថែមទៀត។
ឯកឧត្តមអភិបាលខេត្តបានបន្តទៀតថា ពេលនេះយើងចាប់ផ្តើមជំហានដំបូងនៅក្នុងក្រុងដូនកែវ និងស្រុកត្រាំកក់សិន ហើយនឹងបន្តទៅតាមស្រុកផ្សេងៗទៀតនៅពេលក្រោយ ហើយលោកនឹងពិភាក្សាជាមួយអ្នកជំនាញដើម្បីរៀបចំលក្ខខន្តិកៈចាំបាច់នានា រួចហើយនឹងយកមកអានម្តងមួយៗដើម្បីឱ្យបងប្អូនបានស្តាប់ និងពិភាក្សាបន្ថែមដើម្បីឱ្យទទួលបាននូវអត្ថប្រយោជន៍ខ្ពស់បំផុតសម្រាប់បងប្អូន ហើយនៅពេលដែលសមាគមចាប់ផ្តើមឯកឧត្តមនឹងឧបត្ថម្ភថវិកាផ្ទាល់ខ្លួនមួយចំនួនចូលទៅក្នុងសមាគមនោះដោយមិនយកវិញឡើយ។
ជាកិច្ចឆ្លើយតប បងប្អូនអ្នករត់រឺម៉កម៉ូតូបានសំដែលនូវសេចក្តីត្រេកអរឥតឧបមា និងបានបញ្ជាក់ថាពេលនេះមានបងប្អូនអ្នករត់រឺម៉កម៉ូតូចំនួន ២៩០នាក់ហើយបានយល់ព្រមបង្កើតសមាគមនេះ និងយល់ព្រមចូលរួមជាសមាជិក ហើយពួកគាត់ជឿជាក់ថាសមាគមនេះនឹងមានអត្ថប្រយោជន៍ ព្រមទាំងជួយសម្រួលដល់ជីវភាពរបស់គាត់បានជាច្រើនទៅថ្ងៃអនាគត។
ជាចុងក្រោយបងប្អូនអ្នករត់រឺម៉កម៉ូតូបានថ្លែងអំណរគុណចំពោះឯកឧត្តមអភិបាលខេត្តដែលបានដឹកនាំខេត្តតាកែវមានការរីចម្រើនយ៉ាងគួរឱ្យកត់សម្គាល់ ជាពិសេសតែងតែយកចិត្តទុក្ខដាក់ចំពោះប្រជាពលរដ្ឋគ្រប់ៗគ្នានៅក្នុងខេត្ត និងបានជូនពរឯកឧត្តមទទួលបានសុខភាពល្អ កម្លាំងខ្លាំងក្លាដើម្បីដឹកនាំខេត្តតាកែវកាន់តែរីកចំរើនបន្ថែមទៀត។

• ពិភាក្សា
• ំ
• អ្នករត់រឺម៉កម៉ូតូ