លោក សុខ ប៊ុន មិនអាចរួចខ្លួនទេ ទោះសងសំណងក៏ដោយ

ព័ត៌មានជាតិ | ថ្ងៃអង្គារ ទី២៦ មករា ២០១៦, ១២:០០ | ៧៧២ ដង | ចុចបញ្ចេញមតិ (០)

ភ្នំពេញៈ លោក ពុធ ធាវី មេធាវីតំណាងកញ្ញាឯក សុជាតា ហៅសាសា បានបញ្ជាក់ថា លោក សុខ ប៊ុន ពុំអាចរួចខ្លួនបានទេបើទោះបីជាបានសងសំណង ដែលលោកបដិសេធមិនប្រាប់ចំនួន ជាថ្នូរនឹងការដកពាក្យបណ្ដឹងក៏ដោយ ។ លោកមេធាវី សង្កត់ធ្ងន់ ថា ភស្តុតាងជាវីដេអូឃ្លីបបង្ហាញយ៉ាងច្បាស់ថា លោក សុខ ប៊ុន និង អង្គរក្សពិតជាមានចេតនាប្រើអំពើហិង្សាលើកូនក្តី ប្រាកដមែន ។ ការថ្លែងរបស់លោកមេធាវី នាពេលនេះធ្វើឡើងកាលពីព្រឹកថ្ងៃទី២៦ ខែមករា ឆ្នាំ២០១៦ បន្ទាប់ពីសវនាការត្រូវបានបញ្ចប់ ហើយសាលក្រមគ្រោងនឹងប្រកាសនៅរសៀលថ្ងៃទី១៥ ខែកុម្ភៈ ឆ្នាំ២០១៦ ខាងមុខនេះ ។

លោក សុខ ប៊ុន អតីតមានងារជា ឧកញ៉ា និង ជាអតីតប្រធានក្រុមអ្នកវាយតម្លៃអចលនទ្រព្យនៅកម្ពុជា ជាប់ចោទពីបទហិង្សាដោយចេតនាមានស្ថានទម្ងន់ទោស តាមមាត្រា២១៨ នៃក្រមព្រហ្មទណ្ឌ ហាក់មានបំណងគេចវេះមិនចូលរួមសវនាការ នាព្រឹកថ្ងៃទី២៦ ខែមករា ។ បើតាមការបញ្ជាក់របស់មន្ត្រីអនុរក្សពន្ធនាគារព្រៃស លោក សុខ ប៊ុន បច្ចុប្បន្នកំពុងសម្រាកព្យាបាលជម្ងឺនៅមន្ទីរពេទ្យមិត្តភាពខ្មែរសូវៀតឬពេទ្យរុស្ស៊ី ដោយសារសម្ពាធឈាមឡើងខ្ពស់ ។

លោកមេធាវី ពុធ ធាវី បានផ្ដល់បទសម្ភាសន៍ជាមួយអ្នកសារព័ត៌មានមុខអគារតុលាការ ថា កូនក្តីលោកបានសម្រេចដកពាក្យតាំងពីថ្ងៃទី៤ ខែធ្នូ ឆ្នាំ២០១៥ មកម្ល៉េះ ។ ទោះបីយ៉ាងណា លោកមេធាវី បានបដិសេធមិនប្រាប់ចំនួនប្រាក់នៃទឹកប្រាក់ជាថ្នូរនៃការដកពាក្យបណ្ដឹង នោះទេ ។ លោកមេធាវី បន្តថា បើទោះបីជា កូនក្តីបានដកពាក្យបណ្ដឹងក៏ដោយ តែលោក សុខ ប៊ុន ពុំអាចរួចខ្លួនបានទេ ព្រោះភស្តុតាងជាវីដេអូឃ្លីបបង្ហាញយ៉ាងច្បាស់ថាលោកសុខ ប៊ុន និង អង្គរក្ស ពិតជាមានចេតនាប្រើអំពើហិង្សាលើកូនក្តី ប្រាកដមែន ។ ប៉ុន្ដែការសម្រេចយ៉ាងណានោះ វាជាឆន្ទានុសិទ្ធិរបស់លោកស្រីចៅក្រម សូ លីនណា ជាអ្នកសម្រេច ។ ដោយឡែក នាពេលសវនាការ មេធាវីការពារលោក សុខ ប៊ុន បានទទួលស្គាល់ថា លោក សុខ ប៊ុន ពិតជាបានប្រព្រឹត្តអំពើហិង្សាលើកញ្ញាសាសា ប្រាកដមែន ។ ប៉ុន្ដែ លោកមេធាវីបញ្ជាក់ថា ការប្រើអំពើហិង្សានេះ គឺកើតចេញពីកំហុសអចេតនាប៉ុណ្ណោះ ព្រោះតែលោក សុខ ប៊ុន ស្រវឹង ។ លោកមេធាវី ស្នើឲ្យតុលាការជួយបន្ធូរបន្ថយទោសដល់កូនក្តីផង ។ ទោះបីយ៉ាងណា លោក ហ៊ឹង ប៊ុនថន ជាតំណាងអយ្យការ នៅតែស្នើឲ្យតុលាការរក្សាបទចោទប្រកាន់នេះទុកជាបានការដដែល ។

លោក សុខ ប៊ុន អាយុ៣៧ឆ្នាំ មានទីលំនៅផ្ទះលេខ១០៩ផ្លូវ៩៩កែងផ្លូវលេខ៤៩៨សង្កាត់បឹងត្របែក ខណ្ឌចំការមន បានត្រូវកញ្ញាសាសា ដាក់ពាក្យបណ្តឹងមកសមត្ថកិច្ចនគរបាលព្រហ្មទណ្ឌក្រសួងមហាផ្ទៃមហាផ្ទៃ ដោយចោទប្រកាន់ពីបទ ប្រើអំពើហិង្សា ដោយភ្ជាប់យកហេតុការណ៍ដែលកើតឡើងកាលពីរំលងអាធ្រាតឈានចូលថ្ងៃទី២ ខែកក្កដា ឆ្នាំ២០១៥ នៅចំណុចក្លឹបកំសាន្តឡាហ្គេនបា ក្នុងសង្កាត់ទន្លេបាសាក់ ខណ្ឌចំការមន ជាដើមចម ដាក់បន្ទុកក្នុងការចោទប្រកាន់នេះ៕