ភ្នំពេញៈ នៅព្រឹកថ្ងៃទី១៦ ខែ មករា ឆ្នាំ២០១៦ នៅមជ្ឈមណ្ឌលសហប្រតិបត្តិការកម្ពុជា-កូរ៉េ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងពាណិជ្ជកម្ម បានថ្លែសុន្ទរកថាក្នុងសិក្ខាសាលា ស្តីពី ភាពជាអ្នកដឹកនាំ ដែលរៀបចំដោយក្រុមបញ្ញវ័ន្ត មកពីសាកលវិទ្យាល័យ Harvard University, MIT Sloan, and Tufts Fletcher School of Law and Diplomacy ដែលមានចូលរួមសរុប ២៧១នាក់ មកពីសាកលវិទ្យាល័យ គ្រឹះស្ថានអប់រំជាន់ខ្ពស់ អង្គការសង្គមស៊ីវិល និងស្ថាប័នវិជ្ជាជីវៈនានា។

ថ្លែងក្នុងសុន្ទរកថា ឯកឧត្តមទេសរដ្ឋមន្ត្រី បានលើកឡើងអំពីប្រវត្តិ និងបទពិសោធន៍វិជ្ជាជីវៈរបស់ឯកឧត្តមដែលទាក់ទងនឹងភាពជាអ្នកដឹកនាំ ហើយឯកឧត្តម បានលើកឡើងបញ្ជាក់ ជាភស្តុតាង អំពី កំណែទម្រង់របស់ក្រសួងពាណិជ្ជកម្ម ដែលសម្រេចបានកន្លងមក និងកំពុងអនុវត្តនាពេលបច្ចុប្បន្ន ដើម្បីធ្វើឲ្យប្រសើរឡើងដល់កិច្ចសម្រួលពាណិជ្ជកម្ម និងការវិនិយោគ។

ឯកឧត្តមទេសរដ្ឋមន្ត្រី បានចែករំលែកទស្សនវិជ្ជា សំខាន់ៗមួយចំនួនដែលទាក់ទងនឹងភាពជាអ្នកដឹកនាំ ដែលឯកឧត្តមបានអនុវត្តក្នុងការបំពេញការងារវិជ្ជាជីវៈ ក្នុងនោះ ឯកឧត្តម រដ្ឋមន្ត្រី បានគូសបញ្ជាក់ពីសារៈសំខាន់ នៃការកំណត់គោលដៅរបស់ខ្លួន ដោយបានលើកឡើងនូវឃ្លាមួយថា៖ “ប្រសិនបើអ្នកមិនដឹងថាទីណាដែលអ្នកត្រូវទៅនោះទេ ផ្លូវណាក៏ដោយក៏នាំអ្នកទៅកាន់ទីនោះដែរ ពោលគឺ យើងទៅដោយគ្មានគោលដៅណាមួយពិតប្រាកដ”។ ដើម្បីជោគជ័យក្នុងភាពជាអ្នកដឹកនាំរបស់យើង យើងត្រូវមានគោលដៅជាក់លាក់ និងការពិនិត្យតាមដានជាប់ជានិច្ច ព្រមទាំងត្រូវធ្វើខ្លួនជាគំរូរបស់អ្នកដទៃ។

ឯកឧត្តមទេសរដ្ឋមន្ត្រី បានបញ្ចប់បាឋកថា ដោយរំឭកដល់ក្រុមនិស្សិត អំពីសម្រង់សំដីមួយឃ្លាដ៏ល្បីល្បាញរបស់ អតីតប្រធានាធិបតី សហរដ្ឋអាមេរិក លោក John F. Kennedy ដែលមានប្រសាសន៍ថា៖ ”កុំសួរថា តើប្រទេសរបស់អ្នកអាចធ្វើអ្វីខ្លះដើម្បីអ្នក ត្រូវសួរវិញថា តើអ្នកអាចធ្វើអ្វីខ្លះដើម្បីប្រទេសរបស់អ្នក”។ ឯកឧត្តមទេសរដ្ឋមន្ត្រី បានកែឃ្លានោះសម្រាប់ពលរដ្ឋកម្ពុជាគួរធ្វើគឺ៖ "កុំសួរថាតើកម្ពុជាអាចធ្វើអ្វីខ្លះដើម្បីអ្នក ត្រូវសួរថាតើអ្នកអាចធ្វើអ្វីខ្លះដើម្បីកម្ពុជា”។ ឯកឧត្តម បានជំរុញឲ្យអ្នកចូលរួមទាំងអស់ គោរពច្បាប់ចរាចរណ៍ កុំប្រើប្រាស់គ្រឿងញៀន និងកុំបង្ករទុក្ខទោស ឬបញ្ហាដល់សង្គម នោះបានន័យថា យើងគ្រប់គ្នាបានជួយដល់ប្រទេសកម្ពុជាយើង។

ឯកឧត្តមទេសរដ្ឋមន្ត្រី បានមានប្រសាសន៍បន្ថែមថា៖ “យើងមិនអាចរស់នៅ លើកោះដែលសម្បូរ ទៅដោយទ្រព្យសម្បត្តិ ហើយហ៊ុំព័ទ្ធដោយ សមុទ្រនៃភាពក្រីក្រនោះទេ” ។ វាគឺជាការទទួលខុសត្រូវ របស់យើងគ្រប់គ្នា ដែលយើងត្រូវធ្វើការ ជាមួយគ្នាដើម្បីពង្រីកកោះដែលពោរពេញដោយទ្រព្យសម្បត្តិ ឲ្យកាន់តែធំទៅៗ និងធ្វើឲ្យសមុទ្រនៃភាពក្រីក្រនេះកាន់តែរួមតូចទៅៗ” ដើម្បីជាប្រយោជន៍ដល់ប្រជាជន និងមនុស្សជាតិរបស់យើង។

• ឯកឧត្តមទេសរដ្ឋមន្ត្រី ស៊ុន ចាន់ថុល
• ថ្លែងសុន្ទរកថា
• ភាពជាអ្នកដឹកនាំ