រាជថានីភ្នំពេញ៖ កាលពីថ្ងៃទី១៥ ខែមីនា ឆ្នាំ២០១៧ អនុប្រធានសហព័ន្ធកីឡាចំបាប់សាធារណរដ្ឋកូរ៉េ បានធ្វើដំណើរមកទស្សនកិច្ចកម្ពុជា ដើម្បីពិនិត្យនិងជួយលើសហព័ន្ធចំបាប់កម្ពុជាដែលខ្វះខាត។ លោក Kenneth Lee ដែលជាអនុប្រធានោះ បានបញ្ជាក់ថា កម្ពុជាចង់បានគ្រូចំបាប់ជួយកម្ពុជាប្រភេទណាក៏បាន មានទាំងគ្រូ ប្រភេទចំបាប់សេរី (Free Style) ឬ ប្រភេទចំបាប់ក្រិកកូ(Greco) ប៉ុន្តែនៅ ប្រទេសកូរ៉េសំបូរគ្រូចំបាប់សេរី ដែលងាយផ្តល់។
លោក ធិន វិចិត្រ អគ្គលេខាសហព័ន្ធចំបាប់កម្ពុជា បានបញ្ជាក់ថា បច្ចុប្បន្ននេះកម្ពុជាត្រូវការការបណ្ដុះបណ្ដាលបន្ថែមសម្រាប់អត្តពលិក វ័យក្មេងនិងបូករួមសំភារៈហ្វឹកហាត់ជាច្រើនផងដែរ ។ កម្ពុជាស្នើរសុំដល់ប្រទេសកូរ៉េ មេត្តពិនិត្យនិងជួយកម្ពុជា លើបញ្ហាទាំងនេះ ហើយពិសេសជួយបណ្ដុះបណ្ដាលដល់ថ្នាលនឹងផ្ដល់ការហ្វឹកហាត់រយៈពេលយូរនៅប្រទេសកូរ៉េសម្រាប់ត្រៀមការចូលរួមប្រកួតកីឡាអាស៊ីនាពេលខាងមុខនេះ ។
អគ្គលេខាសហព័ន្ធចំបាប់កម្ពុជារូបនេះបានប្រាប់ថា អនុប្រធានចំបាប់កូរ៉េ រូបនេះក្នុងដំណើរទស្សនកិច្ចកម្ពុជាលើកនេះ លោកចង់ឲ្យកីឡាចំបាប់កម្ពុជាខ្លាំងផងដែរក្នុងតំបន់អាស៊ីអាគ្នេយ៍ដើម្បីក្លាយជាដៃគូល្អជាមួយប្រទេសកូរ៉េនិងធ្វើការចែករំលែកបទពិសោធន៍គ្នាទៅវិញមក។
លោក ធិន វិចិត្រ បាននិយាយថា សម្រាប់ឆ្នាំនេះការប្រកួតកីឡាចំបាប់ជើងឯកអាស៊ីនឹងធ្វើនៅប្រទេសឥណ្ឌាហើយកម្ពុជាមានបំណងចង់ទៅចូលរួមក្នុងព្រឹត្តិការណ៍នេះប៉ុន្តែកម្ពុជាជួបបញ្ហាខ្វះខាតថវិកាដើម្បីរៀបចំបេសកម្មចេញទៅប្រកួត ។ ទោះបីជា លោក Kenneth Lee មិនទាន់ឆ្លើយតប ភ្លាមៗតាមសំណើររបស់កម្ពុជារបស់កម្ពុជាក៏ពិតមែន ប៉ុន្តែលោកបានសន្យានឹងយកបញ្ហានេះ ទៅពិភាក្សាជាមួយសហព័ន្ធរបស់កូរ៉េពេលត្រឡប់វិញភ្លាម ៕ ដោយ បូរិន