រថភ្លើងមួយខ្សែបានធ្លាក់កងចេញពីផ្លូវនៅពេលដែលបុកទៅនឹងរបាំងនៅខាងចុងនៃស្ថានីយ រថភ្លើងតំបន់​ Brooklyn ក្នុងពេលដែលមានមនុស្សកុះករ នាថ្ងៃទី​៤ខែមករា បណ្តាលឲ្យមនុស្ស​១០៣នាក់រងរបួស។

ក្រុមពន្លិតអគ្គិភ័យ និងជួយសង្គ្រោះ ញ៉ូវយ៉កបានទៅដល់កន្លែងកើតហេតុភ្លាមៗ នៅស្ថានីយ  Atlantic ក្រោយពេលរថភ្លើង  Long Island ធ្លាក់កងចេញពីផ្លូវនៅតំបន់ដែលមានមនុស្សច្រើន នៅវេលាម៉ោង ៨និង​២០នាទី ថ្ងៃទី​៤ខែមករា (ម៉ោងក្នុងតំបន់)។

នៅក្នុងហេតុការនោះ មិនមានអ្នកដំណើរណាម្នាក់ស្លាប់នោះឡើយ  ប៉ុន្តែក៏មានអ្នករងរបួសធ្ងន់ ១១នាក់បានបញ្ចូនទៅកាន់មន្ទីពេទ្យ ។ នៅពេលហេតុការខាងលើកើតឡើង រថភ្លើងដឹកអ្នកដំណើរប្រមាន​៦០០-៧០០នាក់។

សារព័ត៌មានរ៉យទ័របានផ្សាយថា អភិបាលក្រុងញ៉ូវយ៉ក បានឲ្យដឹងថា រថភ្លើង ចាកចេញពីតំបន់​ Far Rockaway ហើយមិនបានទៅដល់កន្លែង ចំពេលវេលាកំណត់ទុក។ រថភ្លើងធ្វើដំណើរក្នុងល្បឿនយឺត ហើយធ្លាក់កងចេញពីផ្លូវដែក នៅចុងបញ្ចប់នៃផ្លូវដែក​ក្នុងស្ថានីយ។

តាមព័ត៌មាននៅលើបណ្តាញសង្គម​ Twitter  ក្រុមជួយសង្គ្រោះក្រុង បានបញ្ចាក់ថាមានអ្នករងរបួស ១០៣នាក់ ទូររថភ្លើង​២នៅខាងមុខ​រងការខូចខាតយ៉ាងតំណាំ ។ ចំណែកសម្ភារៈសម្រាប់បិទផ្លូវចរាចរណ៍ពេលរថភ្លើងឆ្លងកាត់ក៏ត្រូវខូចខាតផងដែរ។

អ្នកដំណើរឈ្មោះ​ Aaron Neufeld អាយុ​២៦ឆ្នាំបានឲ្យដឹងថា អ្នកដំណើរភ័យស្លន់ស្លោរដោយភ័យខ្លាចក្រោយពេលឃើញឈាម ហូរច្រើននៅពេលរថភ្លើង​ធ្លាក់ផ្លូវ។ មនុស្សមួយចំនួនបាស្រែកយំ ។លោកបន្តទៀតថា​រថភ្លើងធ្វើដំណើរធម្មតារហូតដល់មានហេតុការអាក្រក់ខាងលើកើតឡើង។

កាលពីចុងខែកញ្ញឆ្នាំ​២០១៦ រថភ្លើងមួយខ្សែ បានបុកទៅនឹង​របាំងនៅចុងផ្លូវក្នុងតំបន់​ Hoboken ទីក្រុងញ៉ូវជឺស៊ី បណ្តាលឲ្យស្ត្រីម្នាក់ស្លាប់និង​១១៤នាក់រងរបួស ។

សមាគមន៍ចរាចរណ៍សាធារណអាមេរិកបានឲ្យដឹងថា រថភ្លើង​ Long Island ជា​បណ្តាញដឹកជិញ្ជូនមនុស្សច្រើនបំផុត របស់ប្រទេសនេះ  ដោយបានដឹកអ្នកដំណើរ ជាង ៣៣០ពាន់នាក់ក្នុងមួយថ្ងៃ ។ ក្នុងពេលជាមួយគ្នានោះ ស្ថានីយ​ Atlantic ជាកន្លែងដែលមានមនុស្សធ្វើដំណើរច្រើនបំផុតនៅក្នុងទីក្រុងញ៉ូវយ៉ក ដោយមានខ្សែរថភ្លើងដល់ទៅ​៩ តផ្ជាប់ទៅកាន់តំបន់ផ្សេងៗ៕

• រថភ្លើង
• របួស
• ក្រុងញ៉ូវយ៉ក