រាជធានីភ្នំពេញ៖ មុខសញ្ញាចែកចាយថ្នាំញៀនជាជនជាតិវៀតណាម ២នាក់ប្តីប្រពន្ធ ត្រូវបានកម្លាំងកងរាជអាវុធហត្ថខណ្ឌច្បារអំពៅ ក្រោមបញ្ជារផ្ទាល់របស់លោកវរសេនីយ៍ទោគិត សុផល មេបញ្ជការកងរាជអាវុធហត្ថខណ្ឌ បានធ្វើការបង្ក្រាប កាលពីវេលាម៉ោង ១១ និង៤៥នាទី ថ្ងៃទី០២ ខែកុម្ភះ ឆ្នាំ២០១៥ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។ជនសង្ស័យជាប្តីប្រពន្ធទាំង២នាក់ មានឈ្មោះ ង្វៀង យុំាងសាង ភេទ ប្រុស អាយុ៣៥ឆ្នាំ មុខរបរ មិនពិតប្រាកដ មានទីលំនៅ ផ្ទះគ្មានលេខ ក្រុម ៣ ភូមិកោះនរា សង្កាត់និរោធ ខណ្ឌច្បារអំពៅ និងស្ត្រីជាប្រពន្ធឈ្មោះ ជប់ ភេទ ស្រី អាយុ៣០ឆ្នាំមុខរបរមិនពិតប្រាកដ ។ មន្ត្រីអាវុធហត្ថអោយដឹងថា មុនឈានដល់ការបង្ក្រាប គឺ នៅវេលាម៉ោង ១១ និង ៣០នាទីថ្ងៃខែឆ្នាំដដែលកម្លាំងអាវុធហត្ថបានស្រាវជ្រាវចាប់ខ្លួនជនសង្ស័យជាប្តីបាននៅចំណុចក្រុម៣ ភូមិកោះនរា សង្កាត់និរោធ ខណ្ឌច្បារអំពៅ ដោយរកឃើញថ្នាំញៀន១២កញ្ចប់ជាប់នឹងខ្លួន ។ ក្រោយការចាប់ខ្លួនហើយនោះ នៅវេលាម៉ោង ១ និង ៣០នាទីថ្ងៃខែដដែល សមត្ថកិច្ចអាវុធហត្ថបាន សហការជាមួយអាជ្ញាធរសង្កាត់និរោធ បន្តចុះទៅឆែកឆេរលំនៅឋានរបស់ជនសង្ស័យ នៅភូមិកោះនរា  ដោយបានរកឃើញថ្នាំញៀន ៣កញ្ចប់បន្ថែមទៀត និងឃាត់ខ្លួនស្ត្រីជាប្រពន្ធម្នាក់ទៀតផងដែរ នៅចំណុចលំនៅឋានខាងលើ ដែលជាប់ពាក់ព័ន្ធនឹងការជួញដូរថ្នាំញៀន ។

ក្នុងការបង្ក្រាបមុខសញ្ញាទាំង២នាក់នេះ សមត្ថកិច្ចអាវុធហត្ថ បានដកហូតថ្នាំញៀនសរុប ១៥កញ្ចប់តូច ដាវចំនួន០៣ដើម  កន្ត្រៃមួយចំនួនធំ ដំបង២កំណាត់ចំនួន១ កាំបិតមួយចំនួនធំ ដែកទីបចំនួន១ និង ឧបករណ៍សំរាប់ប្រើប្រាស់ថ្នាំញៀនមួយចំនួនធំផងដែរ ។ក្រោយការឃាត់ខ្លួនជនសង្ស័យ ក៏ដូចជាវត្ថុតាង ត្រូវបានញ្ចូនទៅកាន់ការិយាល័យប្រឆាំងបទល្មើសគ្រឿងញៀន នៃទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីសាកសួរនាំបន្ថែម និងត្រៀមកសាងសំណុំរឿងបញ្ចូនទៅតុលាការចាត់ការទៅតាមនីតិវិធី នៃច្បាប់ ៕

• គ្រឿងញៀន
• ខណ្ឌច្បារអំពៅ