រាជធានីភ្នំពេញ ៖ របាំងថ្មពុះចែកទ្រូងផ្លូវចំនួន ៤កង់ត្រូវរងការខូចខាតដាច់ចេញពីគ្នា ពន្ទាប់ពីជនជាតិចិន២នាក់ បើករថយន្តមួយគ្រឿងម៉ាកឡិចស៊ិស៤៧០ ក្នុងល្បឿនលឿន និងក្នុងសភាពស្រវឹង បានបើករេចង្កូតបុករះពេញទំហឹងកាលពីវេលាម៉ោង ២៣ និង ១៥នាទីយប់ថ្ងទី២៧ ខែមករា ឆ្នាំ២០១៦ នៅតាមបណ្តោយមហាវិថី ព្រះសីហនុ ទល់មុខនឹងវត្តមហាមន្ត្រី ស្ថិតក្នុងសង្កាត់វាលវង់ ខណ្ឌ៧មករា ។

ប្រភពព័ត៌មានពីកន្លែងកើតហេតុ អោយដឹងថា ដំបូងឡើយ គេសង្គេតឃើញរថយន្តឡិចស៊ិសមួយគ្រឿង ពណ៌ស្ករ ពាក់ស្លាកលេខ បើកបរដោយជនជាតិចិន២នាក់ ធ្វើដំណើរតាមបណ្តោយផ្លូវព្រះសីហនុ ទិសដៅពីលិចទៅកើត ក្នុងល្បឿនលឿន។ លុះមកដល់ចំណុចកើតហេតុ រថយន្តបានបើកចង្កូតបំណងបត់ឡើងទៅផ្លូវលេខ ១៦៣ ប៉ុន្តែបួងមិនផុត ក៏បានរេចង្កូតបុករះឡើងលើរបាំងថ្មពុះចែកទ្រូងផ្លូវពេញទំហឹង​តែម្តង បណ្តាលអោយរបាំងថ្មចំនួន ៤កង់ត្រូវរងការខូចខាតដាច់ចេញពីគ្នា ដោយឡែក រថយន្តត្រូវរងការខូចខាតផ្នែកខាងមុខ ។

ក្រោយកើតហេតុភ្លាមៗ សមត្ថកិច្ចមូលដ្ឋាន បានសហការជាមួយជំនាញចុះអន្តរាគមន៍វាស់វែង ស្ទូចយករថយន្តបង្ក និងឃាត់ខ្លួនទាំងម្ចាស់ យកទៅកាន់ការិយាល័យចរាចរណ៍ជើងគោករាជធានីភ្នំពេញ រងចាំដោះស្រាយទៅតាមផ្លូវច្បាប់នៅពេលក្រោយ ៕

• របាំងថ្មចែកទ្រូងផ្លូវ
• ជនជាតិចិន
• ស្រវឹង