រាជធានីភ្នំពេញ ៖ នារីរូបស្រស់វ័យ ២៥ឆ្នាំម្នាក់ ត្រូវបានកម្លាំង សមត្ថកិច្ច នៃនាយកដ្ឋានសន្តិសុខផ្ទៃក្នុង ក្រសួងមហាផ្ទៃ ធ្វើការឃាត់ខ្លួននកាលពីវេលាម៉ោង ៨ និង ៤៥នាទីព្រឹកថ្ងៃទី២៥ ខែមករា ឆ្នាំ២០១៦ នៅចំណុចផ្ទះជួលគ្មានលេខ ក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ ពាក់ព័ន្ធនឹងករណី បរិហាកេរ្តិ៍ និងជេរប្រមាថ សម្តេចតេជោតាមបណ្តាញទំនាក់ទំនងសង្គមហ្វេសបុកកាលពីពេលថ្មីៗ កន្លងទៅ ។

នារីរូបនេះមានឈ្មោះ ដែត ម៉េងគាង អាយុ២៥មុខរបរជាបុគ្គលិកធនាគារ បច្ចុប្បន្នស្នាក់នៅក្រុងតែខ្មៅ ខេត្តកណ្តាល ។

មន្ត្រីនគរបាលអោយដឹងថា មុនឈានដល់ការឃាត់ខ្លួន គឺកម្លាំងសមត្ថកិច្ចជំនាញ នៃនាយកដ្ឋានសន្តិសុខ បានបើកការតាមដានស្រាវជ្រាវ តាមចាប់ខ្លួនរូបនាងមកជាយូរហើយ បន្ទាប់ពីនាងតែងតែបានបង្ហោះជារូបភាព និង សរសេរជាឃ្លោងឃ្លាពាក្យពេជចន៍ មើលងាយដល់ថ្នាក់ដឹកនាំរដ្ឋាភិបាល ក៏ដូចជាសម្តេចតេជោ ហ៊ុន សែន នាយករដ្ឋមន្ត្រី ជារឿយៗកាលពីពេលកន្លងទៅ ។ ទើបរហូតមកទល់នឹងម៉ោង៨ និង៤៥នាទីព្រឹកថ្ងៃទី ២៥ ខែឆ្នាំដដែល ដោយសមត្ថកិច្ចទទួលដំណឹងថា ជនរូបនេះបានទៅលេងផ្ទះបងប្អូននៅទីតាំងកើតហេតុខាងលើ ទើបសហការជាមួយ នគរបាលខណ្ឌមានជ័យ ចុះមកធ្វើការឃាត់ខ្លួនបានជាក់ស្តែងតែម្តងទៅ ។

ក្រោយការឃាត់ខ្លួន នារីរូបនេះត្រូវបានបញ្ចូនខ្លួនភ្លាមៗ ទៅកាន់នាយកដ្ឋានសន្តិសុខផ្ទៃក្នងក្រសួងមហាផ្ទៃ ដើម្បីធ្វើការសាកសួរនាំបន្ថែម និង ត្រៀមចាត់ការទៅតាមផ្លូវច្បាប់នៅពេលក្រោយ ។

មន្ត្រីនគរបាលថ្លែងថា ការចាប់ខ្លួននារីជើងឆើតម្នាក់នេះ ពេលនេះ គឺជាបទពិសោធន៏ល្អមួយសម្រាប់ធ្វើការអប់រំដល់ បងប្អូនប្រជាពលរដ្ឋដែលនិយមលេងបណ្តាញសង្គមហ្វេសបុកទាំងអស់ត្រូវលេង ប្រកបដោយក្រមសីលធម៌ និងត្រឹមត្រូវ ជៀសវៀងការតិះដៀល ជេរប្រមាថ ប៉ះពាល់ដល់កត្តិយស និង កត្តិស័ព្ទអ្នកដទៃ មិនថា បុគ្គលណា ឬ នណាម្នាក់ឡើយ ជាពិសេសដូចករណីខាងលើនេះជាដើម ៕

• សម្តេចតេជោ
• បណ្តាញសង្គមហ្វេសបុក