ភ្នំពេញ ៖ នៅវេលាម៉ោង ២៣ និង ២០នាទីយប់ថ្ងៃទី១៧ ខែមករា ឆ្នាំ២០១៥ ស្នូរផ្ទុះអាវុធចំនួន ១គ្រាប់បានបន្លឺឡើង នៅចំណុចមុខបុរីពិភពថ្មី តាមបណ្តោយផ្លូវវ៉េងស្រេង ក្នុងសង្កាត់ចោមចៅ ខណ្ឌពោធិ៍សែនជ័យ បង្កឡើងដោយខ្មាន់កាំភ្លើងមិនស្គាល់អត្តសញ្ញាណម្នាក់ ជិះម៉ូតូមួយគ្រឿងម៉ាក  FZ  មិនចាំពណ៌នឹងស្លាកលេខ  ជិះមកឈប់រួចធ្វើសកម្មភាពបាញ់មួយគ្រាប់បង្កការភ្ញាក់ផ្អើលតែម្តងទៅ ។

ប្រភពព័ត៌នៅកន្លែងកើតហេតុ អោយដឹងថា មុនពេលមានហេតុការណ៍កើតឡើង គឺ គេសង្គេតឃើញ បុរសម្នាក់ស្លៀកឯកសណ្ឋានឈុតខ្មៅ ជិះម៉ូតូមួយគ្រឿងម៉ាក ហុងដា FZ  មិនចាំពណ៌ និងស្លាកលេខ តាមបណ្តោយផ្លូវវ៉េងស្រេង ទិសដៅពីជើងទៅត្បូង ។ ខណៈមកដល់ចំណុចកើតហេតុ ជនរូបនោះក៏បានដកកាំភ្លើងខ្លីចេញពីចង្កេះ រួចធ្វើសកម្មភាពបាញ់មួយគ្រាប់ឡើងលើវេលា ដោយមិនដឹងមូលហេតុ បង្កអោយមានការភ្ញាក់ផ្អើលតែម្តងទៅ  ។ ក្រោយបាញ់មួយគ្រាប់ហើយនោះ ខ្មាន់កាំភ្លើងបានជិះម៉ូតូឆ្ពោះសំដៅទៅខាងរង្វង់មូលចោមចៅ បាត់ស្រមោលសូន្យឈឹង ។

ភ្លាមៗនោះ កម្លាំងនគរបាលប៉ុស្តិ៍ចោមចៅ បានចុះអន្តរាគមន៍ដល់កន្លែងកើតហេតុ ប៉ុន្តែបានត្រឹមតែរើសសម្បកកំទុះតែប៉ុណ្ណោះ ខណៈជនល្មើសជិះម៉ូតូរត់គេចខ្លួនបាត់ស្រមោល ៕

• ខ្មាន់កាំភ្លើង
• ពោធិ៍សែនជ័យ