MENU
|
រាជធានីភ្នំពេញ៖ សម្តេចហ៊ុនសែនប្រមុខដឹកនាំកម្ពុជានិងនាយកឡាវ ច្រានចោល ពាក្យយចរចាមអារាម ថា មានការ ប៉ះទង្គិចគ្នារវាងកម្ពុជានិងឡាវ នៅតំបន់ព្រំដែនគឺគ្រាន់តែជាការភាន់ច្រលំតែប៉ុណ្ណោះ។
ការលើកឡើងរបស់សម្តេចតេជោនៅក្នុងជំនួប រវាងសម្តេចតេជោ ហ៊ុន សែន នាយករដ្ឋមន្ត្រីកម្ពុជាជាមួយ ឯកឧត្តម ថងលួន ស៊ីសូលីត នាយករដ្ឋមន្ត្រីឡាវ នៅវិមានសន្តិភាពនារសៀលថ្ងៃទី១០ ឧសភានេះ ប្រមុខរដ្ឋាភិបាលប្រទេសទាំងពីរ បានលើកឡើងថា ពាក្យចរចាមអារាមកន្លងមកដែលថា មានការ ប៉ះទង្គិចគ្នារវាងកម្ពុជានិងឡាវ នៅតាមតំបន់ព្រំដែននោះ គឺពុំមានអ្វីកើតឡើងដូច ពាក្យចរចាមអារាមនោះឡើយ ។
ភាគីទាំងពីរក៍បានអះអាងដូចគ្នាថា កម្ពុជានិងឡាវ សព្វថ្ងៃកំពុងតែមានកិច្ចសហការគ្នាយ៉ាងល្អ ជាពិសេសគណៈកម្មការព្រំដែន គឺកំពុងតែជួបជុំគ្នាធ្វើការងារយ៉ាងរលូន។ រីឯថ្នាក់ដឹកនាំទាំងនៃប្រទេសពីរ នៅពេលនេះដែរ ក៏កំពុងតែព្រមព្រៀងគ្នា ជម្រុញការងារដែលសេសសល់ ដែលបានព្រមព្រៀងគ្នាហើយ ធ្វើយ៉ាងណា ឲ្យមានការវិវឌ្ឍន៍ទៅមុខថែមទៀត និងកំពុងជម្រុញក្នុងការសាងសង់ស្ពាន ឆ្លងកាត់ទន្លេរពៅ នៅតំបន់ព្រំដែនកម្ពុជា-ឡាវ។
ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ បានប្រាប់ឲ្យដឹងថា ឯកឧត្តម នាយករដ្ឋមន្ត្រីឡាវ បាន លើកឡើងពីការងារ ពាក់ព័ន្ធនឹងកិច្ចសហប្រតិបត្តិការ ទ្វេរភាគីរវាងប្រទេសទាំងពីរ កម្ពុជា-ឡាវ ដែលមានកិច្ចសហប្រតិបត្តិការគ្នាល្អ ជាបងប្អូន ហើយអ្វីដែលថ្នាក់ដឹកនាំកំពូល បានចុះហត្ថលេខា ព្រមព្រៀងគ្នាហើយ ការងារទាំងនោះ កំពុងតែដំណើរការ។
គួរបញ្ជាក់យោងតាមសេចក្តីប្រកាសព័ត៌របស់អ្នកនាំពាក្យក្រសួងការពារដែលសារព័ត៍មានបានទទួលនៅថ្ងៃទី៨ខែឧសភាឆ្នាំ២០១៧បានលើកឡើងថាអ្នកនាំពាក្យក្រសួងការពារជាតិសូមប្រកាសនិងច្រានចោលទាំងស្រុងនូវព័ត៌មានផ្សាយតាមវិទ្យុអាស៊ីសេរីកាលពីថ្ងៃទី៤ខែឧសភាឆ្នាំ២០១៧ដែលថាយោធាឡាវបានបន្ថែមកម្លាំងនិងជីកលេនដ្ឋានថ្មីៗតាមខ្សែបន្ទាប់ព្រំដែនត្រង់ចំណុចតំបន់អូរតាង៉ាវ និងអូរតាឡៃ ស្រុងសៀងប៉ាង ខេត្តស្ទឹងត្រែង។
អ្នកនាំពាក្យក្រសួងការពារជាតិបានចាត់ទុកថាព័ត៌មានដែលបានផ្សាយនោះថាជាដំណឹង គ្មានមូលដ្ឋានដែលមានចេតនាញុះញង់ ដែលធ្វើឲ្យមានការភាន់ក្រឡំដល់សារណៈជន មុនពេលលការបោះឆ្នោតឃុំសង្កាត់ព្រមទាំងធ្វើឲ្យប៉ះពាល់ដល់ទំនាក់ទំនងល្អរវាងប្រទេសជិតខាងទាំងពីរ។
អ្នកនាំពាក្យក្រសួងការពារជាតិបានលើកឡើងដោយបញ្ជាក់ថា ”សូមជម្រាបសាធារណជនជ្រាបថាបច្ចុប្បន្នកងយោធពលខេមរភូមិន្នកំពុងតាំងឈេជើងយ៉ាងរឹងមាំតាមបណ្តោយព្រំដែនកម្ពុជាឡាវក៍ដូចជាព្រំដែនជាប់ជាមួយប្រទេសជិតខាងដ៍ទៃទៀតដោយប្រកាន់ខ្ជាប់នូវភារកិច្ចការពារជាតិមាតុភូមិយ៉ាងម៉ឺងម៉ាត់មិនបណ្តោយឲ្យទាហានឡាវឬកងទ័ពប្រទេសណាមួយមកតាំងមូលដ្ឋាននៅក្នុងទឹកដីនៃព្រះរាជាណាចក្រកម្ពុជាដូចការផ្សាយដោយគ្មានមូលដ្ឋានខាងលើនោះឡើយ។
លោកឧត្តមសេនីយត្រី ស្វាយ ញ៉ន មេបញ្ជាការប្រតិបត្តិការសិករងខេត្តស្ទឹងត្រែងបានថ្លែងប្រាប់តាមទូរស័ព្ទកាលពីរសៀលថ្ងៃទី៨ខែឧសភាថា កម្លាំងកងទ័ពឡាវបានដាក់យូរហើយមិនមែនទើបមកទេ។លោកថា ”មិនមានបញ្ហាអ្វីទេយើងកំពុងតែសម្របសម្រួលគ្នាហើយដែរ”។ការងារនេះមិនប៉ះពាល់អីដល់ការបោះឆ្នោតឃុំសង្កាត់យើងនៅពេលខាងមុខនេះទេខណៈដែលយើងបានកំពុងសម្របសម្រួលគ្នា។
លោកមេបញ្ជាការប្រតិបត្តិការសិករងបានអះអាងថាកម្លាំងកងយោធពលខេមរភូមិន្ទបានធ្វើការងារក្នុងការសម្របសម្រួលនិងមិនមានកងទ័ពឡាវថ្មីមកចូលជីកលេនដ្ឋានទេ។លោកថាការលើកឡើងរបស់ក្រសួងការពារជាការត្រឹមត្រូវព្រោះមិនបានវត្តមាននៃកម្លាំងទ័ពឡាវថ្មីមកឈរជើងនៅលើអធិបតេយ្យភាពរបស់ព្រះរាជាណាចក្រកម្ពុជានៅឡើយទ។
អ្នកតាមដានបញ្ហាព្រំដែនបានលើកឡើងថាកាលពីពេលថ្មីនេះថ្នាក់ដឹកនាំប្រទេសទាំងពីរកម្ពុជាឡាវបានជួបពិភាក្សាគ្នាលើការបោះបង្គោលសីម៉ានៃប្រទេសពីរក្នុងជំនួបនៅក្នុងរាជធានីភ្នំពេញ។គេមើលឃើញថាបញ្ហាព្រំដែនរវាងប្រទេសកម្ពុជានិងប្រទេសឡាវមិនសូវបានការស្មុកស្មាញលើការបោះបង្គោលដូចជាមួយថៃនោះទេ។
អ្នកតាមដានដដែលបានលើកឡើងថាកម្ពុជានៅមានបញ្ហាព្រំដែនជាមួយប្រទេសជិតខាងរបស់ខ្លួនមិនទាន់បានបោះបង្គោលកំណត់ខ័ណ្ឌសីម៉ាច្បាស់លាស់នោះទេ។រាជរដ្ឋាភិបាលកម្ពុជាបច្ចុប្បន្នដឹកនាំដោយគណបក្សប្រជាជនកម្ពុជាបានកំំពុងបន្តការកសាងព្រំដែនមិត្តភាព សន្តិភាពនិងអភិវឌ្ឍន៍រវាងប្រទេសជិតខាងរបស់ខ្លួន។ប្រសិនគេមើលទៅសម័យអតីតកាលវិញសង្រ្គាមបានធ្វើឲ្យបង្គោលព្រំដែននៃព្រះរាជាណាចក្រកម្ពុជាត្រូវបានគេបង្ខិតចូលក្នុងទឹកដីកម្ពុជានៅចំណុចខ្លួនមិនទាន់មានបង្គោលសីមាគ្រប់ចំនួននៅឡើយ៕