ហិង្សារវាងអតីតអ្នកបើកបររថយន្តក្រុងកាពីតូលនិងក្រុមរ៉ឺម៉កកង់បី ចាប់ខ្លួនមនុស្សពីរនាក់ បញ្ចូនមកតុលាការ

ព័ត៌មានជាតិ | ថ្ងៃច័ន្ទ ទី០៨ កុម្ភៈ ២០១៦, ១៥:៣១ | ៤៤៧ ដង | ចុចបញ្ចេញមតិ (០)

ភ្នំពេញ: ករណីហិង្សា រវាងក្រុមអតីតអ្នកបើកបររថយន្តក្រុងកាពីតូល ដែលឈរលើកបដាតវ៉ាជាច្រើនថ្ងៃមកហើយ និង ក្រុមរ៉ឺម៉កកង់បី ឈានដល់ការចាប់ខ្លួនមនុស្សពីរនាក់ បញ្ជូនមកតុលាការ កាលពីរសៀលថ្ងៃទី៨ ខែកុម្ភៈ ឆ្នាំ២០១៦ ដើម្បីចាត់ការតាមច្បាប់ ។ បច្ចុប្បន្នជនសង្ស័យទាំងពីរនាក់ កំពុងស្ថិតក្រោមការសាកសួររបស់លោកព្រះរាជអាជ្ញារង ស្រី ម៉ាលីន ។ ស្របពេលជាមួយគ្នានេះ ក្រុមអ្នកតវ៉ាដែលជាអតីតអ្នកបើកបររថយន្តក្រុងកាពីតូល បានឈរលើកបដាទាមទារឲ្យមានការដោះលែងមនុស្សទាំងពីរនាក់នេះ ។

សូមបញ្ជាក់ថា របាយការណ៍របស់សមត្ថកិច្ចនគរបាលខណ្ឌ៧មករា បង្ហាញថា មនុស្សទាំងពីរនាក់នេះឈ្មោះ ណន វណ្ណា អាយុ៣៨ឆ្នាំ មុខរបរជាអតីតអ្នកបើកបររថយន្តក្រុងកាពីតូល មានទីលំនៅផ្ទុះជួល ផ្លូវលំ សង្កាត់ភ្នំពេញថ្មី ខណ្ឌសែនសុខ និង ឈ្មោះ រស់ ស៊ីផៃ អាយុ៣៣ឆ្នាំ មានមុខរបរជាអ្នករត់ម៉ូតូឌុប មានទីលំនៅផ្ទុះលេខ៥៨០ ផ្លូវឡកំបោ សង្កាត់ស្វាយប៉ាក ខណ្ឌព្រែកព្នៅ ត្រូវបានសមត្ថកិច្ចឃាត់ខ្លួនកាលពីថ្ងៃទី៦ ខែកុម្ភៈ ឆ្នាំ២០១៦ យោងតាមពាក្យបណ្ដឹងរបស់ឈ្មោះ ឆែល វណ្ណណេង អាយុ២៣ឆ្នាំ ជានគរបាលប៉ុស្តិ៍វាលវង់ និង ឈ្មោះ អ៊ូ ពៅ អាយុ៤២ឆ្នាំ ជាអធិការរងនគរបាលខណ្ឌ៧មករា ។

អធិការរងនគរបាលខណ្ឌមករា លោក អ៊ូ ពៅ បានរៀបរាប់ក្នុងពាក្យបណ្ដឹង ថា កាលវេលាម៉ោង៧ព្រឹក ថ្ងៃទី៦ ខែកុម្ភៈ ឆ្នាំ២០១៦ ខ្លួនត្រូវបានអង្គភាពចាត់តាំងឲ្យការពារក្រុមបាតុករជាមួយក្រុមហ៊ុនកាពីតូលជាមួយកម្លាំងរបស់អធិការដ្ឋាននគរបាលខណ្ឌ៧មករា ស្រាប់តែពេលនោះ ក្រុមបាតុករ ក្រុមរ៉ឺម៉កកង់បី និង ក្រុមរត់ម៉ូតូឌុបមួយក្រុមទៀត ប្រតាយប្រតប់ប៉ះទង្គិចគ្នា ជាមួយសមត្ថកិច្ចផ្សេងទៀត ខ្លួនក៏ចូលជួយអន្តរាគមន៍ក៏ត្រូវក្រុមបាតុករគប់ដុំថ្ម បណ្តាលឲ្យរបួសភ្នែកខាងឆ្វេង ។

ចំណែកនគរបាលប៉ុស្តិ៍វាលវង់ លោក ឆែល វណ្ណណេង ត្រូវបានក្រុមបាតុករគប់ដុំថ្មបណ្តាលឲ្យរបួសបែកមាត់ និង រង្គើធ្មេញ៤ ព្រមទាំងបាត់ទូរស័ព្ទ IPhone 6 មួយគ្រឿង ។

ទោះបីយ៉ាងណា នៅដំណាក់កាលសមត្ថកិច្ច ជនសង្ស័យទាំងពីរនាក់ បានបដិសេធថា ខ្លួនពុំបានប្រព្រឹត្តហិង្សាលើសមត្ថកិច្ចដូចការចោទប្រកាន់នោះទេ ៕