រាជធានីភ្នំពេញ ៖  ថ្នាក់ដឹកនាំសហព័ន្ធស្រូវអង្ករកម្ពុជានៅថ្ងៃទី១ ខែសីហា ឆ្នំា២០១៦បានចូលជួបសម្តែងការគួរសមជាលើកដំបូងជាមួយឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ដើម្បីពិភាក្សាការងារពាក់ព័ន្ធនឹងការងារវាយតម្លៃហេតុប៉ះពាល់បរិស្ថានរួមមានការរៀបចំផែនការគ្រប់គ្រងបរិស្ថាន គោលការណ៍ណែនាំនិងស្តង់ដារបចេ្ចកទេសបរិស្ថានជាដើម។

នៅក្នុងជំនួបលើកដំបូងនេះឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជាបានជំរាបជូនឯកឧត្តមរដ្ឋមន្ត្រីអំពីវត្ថុបំណងសំខាន់ៗដែលសមាជិករបស់សហព័ន្ធស្រូវអង្ករកម្ពុជាបានស្នើមកកាន់សហព័ន្ធដើម្បីជួយដោះស្រាយដូចជា

១- ការគាំទ្រក្នុងការកែច្នៃអង្កាមមកជាអគ្គិសនី

២-ការគាំទ្រក្នុងការបង្កើតក្រុមការងារវាយតម្លៃមួយដែលមានលក្ខណ:សមស្របនឹងវិស័យស្រូវអង្ករ ដែលអាចងាយស្រួលក្នុងការវាយតម្លៃ ស្រដៀងគ្នានឹងអ្វីដែលក្រសួងធ្វើជាមួយ GMAC

៣- ការធ្វើ Eco Label សម្រាប់បង្កើនតម្លៃដល់ផលិផលដែលមានស្តង់ដារស្របតាមគោលការណ៍បរិស្ថាន។

ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានបានស្វាគមន៍យ៉ាងកក់ក្តៅចំពោះថ្នាក់ដឹកនាំសហព័ន្ធស្រូវអង្ករកម្ពុជាហើយឯកឧត្តមបានសន្យាជួយដោះស្រាយបញ្ហានេះឲ្យមានភាពយោគយល់គ្នាខ្ពស់និងជិតស្និទ្ធជាមួយគ្នា។

នៅក្នុងឱកាសនោះដែរឯកឧត្តមរដ្ឋមន្ត្រីក៏បានផ្តួចផ្តើមឲ្យមានកិច្ចសហប្រតិបត្តិការឲ្យកាន់តែទូលំទូលាយរវាងក្រសួងបរិស្ថាន និង សហព័ន្ធស្រូវអង្ករកម្ពុជាដោយស្នើឲ្យមានការចុះអនុស្សារណៈយោគយល់គ្នារវាងស្ថាប័នរដ្ឋនិងឯកជនមួយនេះ ដើម្បីបើកផ្លូវសម្រាប់បង្កើតក្រុមការងារធ្វើការងារជាមួយគ្នាទៅក្នុងថ្ងៃអនាគតឲ្យមានភាពយោគយល់គ្នា។

លើសពីនេះទៀតឯកឧត្តមរដ្ឋមន្ត្រីក៏បានគាំទ្ររាល់សកម្មភាពកែច្នៃអង្ករជាពិសេសការប្រើប្រាស់អង្កាមសម្រាប់បង្កើតថាមពលដើម្បីបម្រើឲ្យសកម្មភាពក្នុងរោងម៉ាស៊ីនផងនិងសល់ត្រូវលក់ឲ្យអគ្គិសនីកម្ពុជាវិញ។ ឯកឧត្តមសន្យាជួយចរចារជាមួយស្ថាប័នពាក់ព័ន្ធក្នុងការធ្វើការងារទាក់ទិននឹងបម្រែបម្រួលអាកាសធាតុ។

ក្រសួងបរិស្ថាននឹងគាំទ្រដល់ដំណើរការរោងម៉ាស៊ីនកិនស្រូវដែលគិតគូរដល់បរិស្ថាន ហើយ ក្រសួងនឹងគាំទ្រដាក់ស្លាកសញ្ញាណាមួយដែលបញ្ជាក់ថា ផលិតផលដែលចេញពីសមាជិករបស់សហព័ន្ធស្រូវអង្ករ  បានគិតគូរដល់បរិស្ថាន ហើយម្ចាស់ផលិតផលនោះនឹងបានទទួលនូវផលប្រយោជន៍អ្វីពីការដាក់ស្លាកសញ្ញានោះ (incentive) ពីរដ្ឋាភិបាល។

ថ្នាក់ដឹកនាំសហព័ន្ធ រួមមាន ប្រធាននិងក្រុមប្រឹក្សាភិបាលនិង មន្ត្រីលេខាធិការដ្ឋានមានក្តីសប្បាយរីករាយជាមួយលទ្ធផលប្រកបដោយភាពវិជ្ជមាននិងការបើកផ្លូវសម្រាប់កិច្ចសហប្រតិបត្តិការទៅថ្ងៃអនាគត់ ៕

• ក្រសួងបរិស្ថាន
• ប្រតិបត្តិការ