រាជធានីភ្នំពេញ ៖ នៅវេលាម៉ោង ៧ និង២០នាទីព្រឹក ថ្ងៃទី២៨ ខែមករា ឆ្នាំ២០១៦នេះ អាជីវករលក់ពូកម្នាក់ រស់នៅ ផ្ទះលេខ៩៣២ ផ្លូវជាតិលេខ៥ ក្រុម២ ភូមិមិត្តភាព សង្កាត់ឬស្សីកែវ ខណ្ឌឫស្សីកែវ ត្រូវបានចោរលបចូលផ្ទះធ្វើកម្មភាពវាយដំជនរងគ្រោះដោយដៃ ប្លន់យកលុយជាង ៦ពាន់ដុល្លារ និងខ្សែកខ្សែដៃទម្ងន់ ៥ជី ផងដែរ ។សមត្ថកិច្ចបានឲ្យដឹងថា ស្ត្រីជាជនរងគ្រោះក្នុងអំពើប្លន់ខាងលើមានឈ្មោះ ចាយ សុគុន ភេទស្រី អាយុ៣៣ឆ្នាំ មុខរបរលក់ពូកស្នាក់នៅផ្ទះកើតហេតុខាងលើ ។

យោងតាមការរៀបរាប់របស់ស្ត្រីរងគ្រោះអោយដឹងថា នៅវេលាម៉ោង ៧ព្រឹក គឺប្តីរបស់ខ្លួនបានជូនកូនទៅកាន់សាលារៀន ដោយរូបនាងនៅផ្ទះតែម្នាក់ឯង ។ លុះមកដល់វេលាម៉ោងកើតហេតុ ស្រាប់តែលិចមុខជនសង្ស័យម្នាក់ បានចូលមកបោចសក់ និងវាយដំ ដោយដៃនិងជើង មកលើរូបរាងការរបស់នាង ដោយគំរាមមិនអោយរូបនាងស្រែក និងបានអោយនាងយកលុយ និងគ្រឿងអលង្ការដែលមានមកអោយគេ បើពុំ ដូច្នោះទេ រូបគេនឹងវាយសម្លាប់ចោល ។ ភ្លាមនោះស្ត្រីរងគ្រោះបានបើកហិបយកលុយជាង ៦ពាន់ដុល្លារ និងគ្រឿងអលង្ការមួយចំនួន ( ខ្សែក ខ្សែដៃ ) អោយជនល្មើស រួចរត់គេចខ្លួនបាត់ស្រមោលសូន្យឈឹង ។

ក្រោយពេលកើតហេតុ សមត្ថកិច្ចមូលដ្ឋាន និងកម្លាំងអាវុធហត្ថចុះអន្តរាគមន៍ ដល់កន្លែង ដើម្បីត្រួតពិនិត្រជាក់ស្តែង ។ ក្នុងនោះដែរ សមត្ថកិច្ចក៏បាន ជួយបញ្ចូនស្ត្រីរងគ្រោះ ទៅសង្គ្រោះនៅឃ្លីនិចឯកជនក្បែរនោះផងដែរ ដោយសមត្ថកិច្ច ក៏បានសាកសួរនាំព័ត៌មានបន្ថែមពីជនរងគ្រោះនៅមន្ទីរពេទ្យតែម្តង ដើម្បីជាតំរុយក្នុងការតាមចាប់ជនល្មើសយកមកផ្តន្ទាទោសតាមផ្លូវ ច្បាប់ ៕

• ប្លន់អ្នកលក់ពូក
• ឫស្សីកែវ