ភ្នំពេញ៖ នាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ សហការជាមួយ លោក គង់ វុធ្ធី អនុប្រធានមន្រ្តីកាំកុងត្រូល ចុះប្រតិបត្តិការត្រួតពិនិត្យផ្ទះស្តុកទំនិញខុសច្បាប់ជាច្រើនប្រភេទ នៅចំណុច ក្រុមហ៊ុន អូឡាំពិក អិចប្រេស អ៊ិនធើណេសិនណល ផ្ទះលេខ៤៨ តាមបណ្ដោយផ្លូវ១២៥ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

     លោក ចាន់ វ៉ានធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃបានអោយដឹងថា ផ្ទះដែលស្តុកទុកទំនិញខុសច្បាប់ រួមមាន ទឹកជាតិមេតាណុលចំនួន៦៧ កាន ដែលមានចំណុះក្នុង១កានស្មើនិង៣០លីត្រ សម្រាប់លាយជាមួយទឹកសាបធម្មតា ក្លាយជា ស្រាស, សាច់ចិញ្ច្រាំទុកធ្វើជាសាច់ប៉ាតតេមានលាយជាមួយនិងសារធាតុគីមី, សាច់គោរនិងសាច់ជ្រូកជាច្រើនប្រអប់ដែលនាំមកមិនមានលិខិតបញ្ជាក់ត្រឹមត្រូវ ហើយរួមទាំងទំនិញមួយចំនួនទៀត។ សូមបញ្ជាក់ផងដែរទំនិញខុសច្បាប់ទាំងនេះត្រូបានក្រុមហ៊ុន អូឡាំពិក អិចប្រេស អ៊ិនធើណេសិនណល នាំយកមកពីប្រទេសវៀតណាម។

     លោក គង់ វុធ្ធី អនុប្រធានមន្រ្តីកាំកុងត្រូលបានអោយដឹងផងដែរថា ទំនិញទាំងអស់នេះបានលាយជាមួយនិហសារធាតុគីមីដូច្នេះនៅពេលដែលបងប្អូនប្រជាពលរដ្ឋ បានបរិភោគទៅអាចបង្កអោយ មានជម្ងឺខ្សោយក្រលៀន , ក្រពះ, ពោះវៀន និងបញ្ហាសុខភាពជាច្រើនទៀត។ ចុងក្រោយលោកបានអំពាវនាវដល់ប្រជាពលរដ្ឋ មុននិងទិញទំនិញអ្វីមួយត្រូវពិនិត្យមើលស្លាកនិងថ្ងៃផុតកំណត់អោយបានត្រូវ។

      ក្រោយពេលត្រួតពិនិត្យរួច កម្លាំងនគរបាលបាននាំខ្លួនស្រ្តីម្នាក់ដែលតំណាងអោយក្រុមហ៊ុន អូឡាំពិក អិចប្រេស អិុនធើណេសិនណល មានឈ្មោះ ស៊ីវ បូភ័ណ្ឌ ភេទស្រី អាយុ៣៣ឆ្នាំ រួមទាំងទំនិញទាំងអស់ទៅឃ្លាំងស្តុកទុកនៅនាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ រួចនិងនាំយកទៅកំទិចចោលព្រោះទំនិញទាំងនេះអាចប៉ះដល់សុខភាពមិនទុកយូបានឡើយ៕

• នាយកដ្ឋាន
• បទល្មើស