រាជធានីភ្នំពេញ ៖ ស្ត្រីម្នាក់បានស្លាប់បាត់បង់ជីវិតភ្លាមនៅនឹងកន្លែង បន្ទាប់ពីរូបនាងជិះម៉ូតូមួយគ្រឿងម៉ាកគុបជ្រុង តាមបណ្តោយផ្លូវជាតិលេខ ៤ ហើយត្រូវរថយន្តប៉ែនដឹកដីធុនធំ មិនចាំស្លាកលេខមួយគ្រឿង បើកបុកពីក្រោយពេញទំហឹង កាលពីវេលាម៉ោង ១២ និង ៤៥នាទីថ្ងៃទី១៨ ខែមករា ឆ្នាំ២០១៦ ត្រង់ចំណុចផ្លូវជាតិលេខ៤ កែវនឹងផ្លូវច្រកចូលទៅទំនប់កប់ស្រូវ ក្នុងសង្កាត់ចោមចៅ ខណ្ឌពោធិ៍សែនជ័យ ។ស្ត្រីដែលបានស្លាប់មានឈ្មោះ ទី ​ចន្នី អាយុ៤២ មុខរបរលក់ដូរ មានទីលំនៅក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ។

យោងតាមប្រភពព័ត៌មានពីសាក្សីដែលបានឃើញហេតុការណ៍បានរៀបរាប់អោយដឹងថា មុនពេលកើតហេតុ គេសង្គេតឃើញ ស្ត្រីរងគ្រោះជិះម៉ូតូមួយគ្រឿងម៉ាកគុបជ្រុង ពណ៌ទឹកប៊ិច ពាក់ស្លាកលេខភ្នំពេញ 1BC-7147 ជិះតែម្នាក់ឯងធ្វើដំណើរតាមបណ្តោយផ្លូវជាតិលេខ ៤ ទិសដៅពីកើតទៅលិច ក្នុងល្បឿនធម្មតា ។ ខណៈមកដល់ចំណុចកើតហេតុ ស្រាប់តែមានរថយន្តប៉ែនដឹកដីធុនធំមិនចាំស្លាកលេខមួយគ្រឿង បើកបរដោយបុរសម្នាក់ តាមបណ្តោយផ្លូវជាតិលេខ៤ ក្នុងទិសដៅស្របគ្នា បានបើកមកបុកចំពីក្រោយម៉ូតូស្ត្រីរងគ្រោះពេញទំហឹង បណ្តាលអោយស្ត្រីជាម្ចាស់ម៉ូតូដួលបោកផ្ទប់ទៅនឹងថ្នល់ស្លាប់ភ្លាមមួយរំពេច នៅនឹងកន្លែង ។ រីឯរថយន្តបង្កបានព្យាយាម បើករត់គេចបាត់ស្រមោលសូន្យឈឹងតែម្តង ។ 

ក្រោយកើតហេតុ សមត្ថកិច្ចមូលដ្ឋាន និងជំនាញ បានចុះវាស់វែង លើកយកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យ រងចាំសាច់ញាតិយកឯកសារមកទទួលយកទៅវិញ ដោយឡែកសពស្ត្រីរងគ្រោះត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យទៅតាមប្រពៃណី ៕

• រថយន្តប៉ែន
• ម៉ូតូគុប