គួររំលឹកផងដែរកាលពីព្រឹកថ្ងៃទី១០ ខែកុម្ភៈ ឆ្នាំ២០១៦នេះ សម្តេចក្រឡាហោម ស ខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានបើកកិច្ចប្រជុំក្រុមការងារគណកម្មាធិការសុវត្ថិភាពចរាចរណ៍ផ្លូវគោគនៅទីស្តីការក្រសួងមហាផ្ទៃដែលនៅក្នុងកិច្ចប្រជុំនោះសម្តេចក្រឡាហោម ស ខេង បានមានប្រសាសន៍ថា ការប្រើប្រាស់យន្តការមន្ត្រីថ្នាក់ជាតិចុះជួយមូលដ្ឋានដើម្បីផ្សព្វផ្សាយច្បាប់ចរាចរណ៍នេះ បានធ្វើឡើងខណៈការផ្សព្វផ្សាយច្បាប់ចរាចរណ៍កន្លងមកនេះ គឺឲ្យតែក្រុមការងារថ្នាក់ខេត្ត រាជធានីចុះផ្សព្វផ្សាយហើយហាក់ធ្វើឲ្យប្រជាពលរដ្ឋនៅតាមមូលដ្ឋានមិនទាន់មានការយល់ជ្រាបពីច្បាប់ទាំងនោះ។

សម្តេចក្រឡាហោម ស ខេង បានស្នើឲ្យបណ្តាក្រុមការងារថ្នាក់ជាតិចុះមូលដ្ឋានទាំងអស់ ត្រូវរួមគ្នាចុះមូលដ្ឋានបើកយុទ្ធនាការផ្សព្វផ្សាយច្បាប់ចរាចរណ៍ផ្លូវគោគថ្មីឡើងវិញ ខណៈក្នុងរយៈពេលប៉ុន្មានថ្ងៃចុងក្រោយចំនួនអ្នកស្លាប់ដោយសារគ្រោះថ្នាក់ចរាចរណ៍បានកើនឡើងខ្លាំង។សម្រាប់ខ្លឹមសារផ្សព្វផ្សាយច្បាប់ចរាចរណ៍ ក្រុមការងារក្រសួងមហាផ្ទៃ គឺត្រូវសហការជាមួយក្រសួងសាធារណការ និងដឹកជញ្ជូនរៀបចំសង្ខេបខ្លឹមសារផ្សព្វផ្សាយឲ្យបានត្រឹមត្រូវដើម្បីមហាជនងាយស្រួលយល់ទទួលយកបាននិងចូលរួមអនុវត្តទាំងអស់គ្នា។សម្តេចក្រឡាហោម បន្តថា ការដាក់ចេញយុទ្ធនាការថ្មីឲ្យក្រុមការងារថ្នាក់ជាតិចុះផ្សព្វផ្សាយនោះ គឺនឹងត្រូវស្នើប្រធានការងារទាំងនោះធ្វើសកម្មភាពចុះឃោសនា នៅតាមប្រជុំជន នៅតាមទីផ្សារជាដើម។ ដោយឡែកនៅតាមសាលារៀនវិញ សម្តេចក្រឡាហោម ថានឹងមានការកំណត់យកមួយថ្ងៃនៅទូទាំងប្រទេស នៅគ្រប់បណ្តាសាលារៀនរដ្ឋទាំងអស់ គឺត្រូវមានយុទ្ធនាការផ្សព្វផ្សាយច្បាប់ចរាចរណ៍នេះមួយដើម្បីសិស្សានុសិស្សទាំងអស់មានការយល់ជ្រាប។

• សម្តេចក្រឡាហោម សខេង
• មន្ត្រីនគបាល