រាជធានីភ្នំពេញ ៖ ចោរប្លន់ប្រដាប់អាវុធមួយក្រុម មានគ្នា ៧នាក់ ប្រដាប់ដោយកាភ្លើងខ្លី ២ដើម ជិះម៉ូតូមិនចាំម៉ាក៣គ្រឿង បានជិះមកធ្វើសកម្មភាពភ្ជង់ប្លន់យកម៉ូតូមួយគ្រឿង ម៉ាក Zoomer ពីយុវជន ២នាក់ បានសម្រេចដោយសុវត្ថិភាព កាលពីវេលាម៉ោង ២២ និង ១៥ នាទីយប់ថ្ងៃទី ១០ ខែកុម្ភះ ឆ្នាំ២០១៦ នៅចំណុចផ្លូវលេខ១៨៤ កែវផ្លូវលេខ៥១ ខាងក្រោយវិទ្យាល័យព្រះស៊ីសុវត្ថិ ស្ថិតក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។

តាមចម្លើយឆ្លើយរៀបរាប់របស់ជនរងគ្រោះ បានអោយដឹងថា នៅមុនពេលកើតហេតុ គឺរូបខ្លួននិងមិត្តិភក្តិម្នាក់ទៀតដែលរួមដំណើរជាមួយ ទើបតែចេញមកពីកម្មវិធីហូបចុកបន្តិចបន្តួច នៅក្បែរព្រះបរមរាជវាំង តាំងពីល្ងាចមកម្លេះ ។ រហូតកម្មវិធី ត្រូវបានបញ្ចប់ អ្នកទាំង២ក៏បានជិះម៉ូតូមួយគ្រឿងម៉ាក Zoomer ឌុបគ្នាបំណងត្រឡប់ទៅកាន់លំនៅឋានវិញ ដោយធ្វើដំណើរតាមបណ្តោយផ្លូវលេខ ១៨៤ ក្នុងទិសដៅពីលិចទៅកើត ។ លុះមកដល់ចំណុចផ្លូវលេខ ៥១ ខាងក្រោយនឹងវិទ្យាល័យស៊ីសុវត្ថិ ស្រាប់តែមានជនសង្ស័យ៧នាក់ ជិះម៉ូតូ មិនចាំម៉ាក ៣គ្រឿង ប្រដាប់ដោយកាំភ្លើងខ្លី២ដើម និងដំបង បានជិះមកស្ទាក់ពីមុខ រួចដកកាំភ្លើងភ្ជង់គំរាមប្លន់យកម៉ូតូពីជនរងគ្រោះតែម្តង ។ ភ្លាមនោះដោយសភាពភ័យស្លន់ស្លោរខ្លាំង ជនរងគ្រោះទាំង ២នាក់ ក៏បានចុះពីលើម៉ូតូ រួចប្រគល់សោរទៅអោយជនសង្ស័យ រួចជនសង្ស័យ ក៏ជិះចេញទៅបាត់ដោយសុវត្ថិភាពតែម្តងទៅ ។ ភ្លាមៗ បន្ទាប់ពីកើតហេតុ សមត្ថកិច្ចមូលដ្ឋាន បានចុះអន្តរាគមន៍ និងនាំជនគ្រោះទាំង ២នាក់ទៅដាក់ពាក្យណ្តឹងនៅប៉ុស្តិ៍រដ្ឋបាលនគរបាលបឹងរាំង ដើម្បីមុខសញ្ញា ស្រាវជ្រាវតាមចាប់ជនល្មើសយកមកផ្តន្ទាទោសតាមផ្លូវច្បាប់ ៕

• ចោរប្លន់
• ភ្ជង់ប្លន់យកម៉ូតូ Zoomer