រាជធានីភ្នំពេញ ៖ នៅវេលាម៉ោង ១៨ និង ២០នាទីល្ងាចថ្ងៃទី០៩ ខែមករា ឆ្នាំ២០១៦ មានគ្រោះអគ្គីភ័យមួយបានឡេបត្របាក់ទីតាំងហាង លក់ត្នោតជូរ និងគ្រឿងផឹកស៊ី ២ទីតាំង ដែលសង់ឡើងពីឈើប្រក់ស្បូវ យ៉ាងខ្លាំងខ្លា បណ្តាលអោយតូបទាំង២ត្រូវ អណ្តាតភ្លើងឆាបឆេះហ្មត់គ្មានសល់ ។ ហេតុការណ៍នេះកើតឡើងនៅចំណុច ផ្លូវប៉េតុងមួយកន្លែង ក្បែររបងរោងចក្រកាណាឌីយ៉ា ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។

ប្រភពព័ត៌មានពីម្ចាស់ទីតាំង បានរៀបរាប់អោយដឹងថា នៅមុនពេលមានគ្រោះអគ្គីភ័យឆាបឆេះ គឺដំបូងឡើយ នៅវេលាម៉ោង ប្រមាណ ៤ ទៅ ៥ មានភ្ញៀវជាច្រើនកំពុងអង្គុយហូបចុកធម្មតាទេ ។ លុះមកទល់នឹងវេលាកើតហេតុ ស្រាប់តែភ្ញៀវម្នាក់បានដើរទៅបត់ជើងតូច នៅខាងក្រោយរោងហាង ដោយក្នុងដៃរបស់គាត់ មានបារីជាប់កំពុងជក់ ។ លុះបត់ជើងហើយគាត់ក៏បានដើរមកអង្គុយហូបចុកវិញ ដោយពុំមានបារីជាប់នឹងដៃមកវិញនោះទេ ។  ស្រាប់តែមួយសន្ទុះក្រោយមក ក៏កើតមានជាអណ្តាតភ្លើងឆាបឆេះ យ៉ាងខ្លាំងខ្លាមកពីក្រោយរោង ធ្វើអោយម្ចាស់ទីតាំង និងភ្ញៀវជាច្រើននាក់ដែលកំពុងអង្គុយហូបចុកយ៉ាងសប្បាយនោះ នាំគ្នារត់ជាន់ជើងគ្នាប្រសាយ បង្កអោយមានការភ្ញាក់ផ្អើលដល់ប្រជាពលរដ្ឋ នៅក្បែរនោះ នាំគ្នាចោមរោមមើលយ៉ាងកុះកុញ និងរាយការណ៍ដល់សមត្ថកិច្ខចុះអន្តរាគមន៍ ។

ភ្លាមនោះក្រុមរថយន្តពន្លត់អគ្គីភ័យ នៃស្នងការដ្ឋានគរបាលរាជធានីភ្នំពេញ បានចុះអន្តរាគមន៍ដល់កន្លែងកើតហេតុ នឹងធ្វើការបាញ់ទឹកទប់ស្កាត់អណ្តាតភ្លើងមិនអោយមានការឆាបឆេះរាលដាលបន្ត ។ ប៉ុន្តែយ៉ាងណាមិញ ហាងចំនួន២ទីតាំង សង់ឡើងពីឈើប្រក់ស្បូវ ទំហំ សរុបប្រមាណ ១៥ គុណ ១៥ម៉ែត្រ ត្រូវអគ្គីភ័យឆេះអស់ហ្មត់ទាំងស្រុង រួមជាមួយទ្រព្យសម្បត្តិផងដែរ ។ ក្នុងនោះ សមត្ថកិច្ចប្រើប្រាស់រថយន្តពន្លត់អគ្គីភ័យអស់ ២គ្រឿង ទើបអាចគ្រប់គ្រងស្ថានការណ៍ បាន១០០ភាគរយ ។

ជាជំហានដំបូង សមត្ថកិច្ចសន្និដ្ឋាន អគ្គីភ័យខាងលើនេះ គឺឆាបឆេះដោយសារ ភ្ញៀវដុតកន្ទុយបារី ហើយបោះចោលទៅលើស្បូវ ( ដែលជាសម្ភារះងាយបង្ករការឆាបឆេះ ) ដោយមិនមានការប្រុងប្រយ័ត្នទើបបណ្តាលអោយកើតឡើងបែបនេះតែម្តងទៅ ដូចអ្វីដែលម្ចាស់ទីតាំងបានរៀបរាប់ពីខាងលើ ។ ហើយករណីនេះ សំណាងហើយដែរ ដែលសមត្ថកិច្ចជំនាញអគ្គីភ័យ ចុះអន្តរាគមន៍ទាន់ពេលវេលា បើពុំដូច្នោះទេ មិនដឹងថា មានមហន្តរាយអគ្គីភ័យកើតឡើងធំបែបណានោះទេ ព្រោះទីតាំងជាច្រើនទៀតនៅក្បែរនោះ សុទ្ធសឹងតែសង់ឡើងពីឈើប្រក់ស្បូវដូចគ្នា ងាយស្រួលសម្រាវ់អណ្តាតភ្លើង ឆាបឆេះបានលឿនរហ័សណាស់ ៕

• បោះកន្ទុយបារី
• អណ្តាតភ្លើង