MENU
|
រាជធានីភ្នំពេញ៖ កំណាត់ផ្លូវលេខ៧៧BTមានប្រវែងជិត៣គីឡូម៉ែត្រស្ថិតក្នុងសង្កាត់ស្ទឹងមានជ័យ និងសង្កាត់បឹងទំពុន ខណ្ឌមានជ័យ ដែលប្រជាពលរដ្ឋលំបាកក្នុងការធ្វើដំណើរ ជាយូរមកហើយនោះ ពេលនេះត្រូវបានរដ្ឋបាលរាជធានីភ្នំពេញ សម្រេចបើកការដ្ឋានស្ថាបនាផ្លូវ និងដាក់លូ បន្ទាប់ពីមានការស្នើសុំយ៉ាងទទូចពីប្រជាពលរដ្ឋ ។ពីធីបើកការដ្ឋាន បានធ្វើឡើង នៅព្រឹកថ្ងៃទី៣០ មិថុនា២០១៦ ស្ថិតក្នុងអធិបតីភាព លោក ប៉ា សុជាតិវង្ស អភិបាលរាជធានីភ្នំពេញ ដោយមានការចូលរួមពីមន្ត្រីក្រោមឱវាទ និងប្រជាពលរដ្ឋជាច្រើនយ៉ាងកុះករ ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា កំណាត់ផ្លូវដែលត្រូវស្ថាបនាពេលនេះ ជាប្រភេទផ្លូវបេតុងមានប្រវែង២៧៥០ម៉ែត្រកំរាស់២តឹក មានទទឹង៧ម៉ែត្រ ដោយចាប់ពីផ្លូវ២៧១ដល់ផ្លូវ៣៧១ ក្នុងនោះ រដ្ឋបាលរាជធានីភ្នំពេញបានដាក់លូទំហំ១ម៉ែត្រផងដែរ ។ លោកបន្តថា កំណាត់ផ្លូវ៧៧BTនេះមានសារៈសំខាន់ក្នុងការដោះស្រាយចរាចរពីផ្លូវ២៧១ភ្ជាប់ទៅផ្លូវលេខ៣៧១ កាត់តាមក្លោងទ្វាវត្តពោធិញាណ និងស្ពានមុខមន្ទីរពេទ្យរុស្ស៊ី ជាពិសេសបំរើឲ្យប្រជាពលរដ្ឋរស់នៅតំបន់បឹងទំពុន ភូមិចំរើនផល និងភូមិត្នោតជ្រុំ និងមួយផ្នែកនៅតំបន់ស្ទឹងមានជ័យតែម្តង ។ លោកសាំ ពិសិដ្ឋ បានបញ្ជាក់ថា ពិធីបើកការដ្ឋានខាងលើនេះ ធ្វើឡើងតាមការស្នើសុំរបស់ប្រជាពលរដ្ឋទៅសាលាសង្កាត់ សាលាខណ្ឌមានជ័យ និងតាមសាព័ត៌មាន និងប្រព័ន្ធសង្គមហ្វេសបុកជាដើម ។
លោកប៉ា សុជាតិវង្ស អភិបាលរាជធានីភ្នំពេញ បានលើកឡើងថា យើងពិតជាពិបាកណាស់ក្នុងការរកលុយ មកធ្វើការស្ថាបនាផ្លូវ លូឬហេដ្ឋារចនាសម្ព័ន្ធនានានៅក្នុងរាជធានីភ្នំពេញ ការស្ថាបនាអ្វីមួយត្រូវការជ្រើសរើស មិនអាចធ្វើទាំងអស់ព្រមគ្នានោះទេ ដូច្នេះសុំប្រជាពលរដ្ឋមេត្តាយោគយល់ ។លោកបានស្នើឲ្យក្រុមហ៊ុនទទួលម៉ៅការស្ថាបនាផ្លូវនោះ ត្រូវពង្រឹងគុណភាព ចំពោះការស្ថាបនាលូវិញត្រូវធ្វើតាមជុំហ៊ានៗ មិនឲ្យជីកហើយទុកចោលយូនោះទេ និងសុំឲ្យមានការយោគយល់ពីប្រជាពលរដ្ឋផងដែរ ។
លោកប៉ា សុជាតិវង្ស បានបញ្ជាក់ថា កំណាត់ផ្លូវ៧៧BTនេះត្រូវតែមានចិញ្វើម ដូច្នេះប្រជាពលរដ្ឋត្រូវចូលរួម មិនត្រូវរំលោភយកចិញ្ចើមផ្លូវនោះទេ បើប្រជាពលរដ្ឋចូលរួមទុកចិញ្វើមផ្លូវ រដ្ឋបាលរាជធានីភ្នំពេញនឹងដាក់ភ្លើងបំភ្លឺសាលាធារណៈនៅតាមបណ្តោយផ្លូវនេះតែម្តង ៕