រាជធានីភ្នំពេញ ៖ លោកអាំង មាលតី អតីតប្រធានសាលាដំបូងរាជធានីភ្នំពេញ បានឆ្លើយសារភាពថា លោកពិតជាបានប្រព្រឹត្តិនូវទង្វើពុករលួយ ដូចដែលតុលាការធ្វើការចោទប្រកាន់ពិតមែន ។ ការឆ្លើយសារភាពនៅពេលនេះ គឺធ្វើឡើង នៅក្នុងសវនាការជំនុំជម្រះរឿងក្តីពុករលួយរបស់លោក កាលពីព្រឹកថ្ងៃទី២៨ ខែមករា ឆ្នាំ២០១៦ ដែលសវនាការនេះ ដឹកនាំដោយអនុប្រធានសាលាដំបូងខេត្តកណ្ដាល លោក ងួន វុទ្ធី និង លោកព្រះរាជអាជ្ញារង ឯក សុនរស្មី ។

សូមបញ្ជាក់អង្គសវនាការ ត្រូវបានបញ្ចប់ទៅវិញនៅវេលាម៉ោង ១១ និង ០០នាទីព្រឹកថ្ងៃខែដដែល ដោយតុលាការសម្រេចលើកការប្រកាសសាលក្រមទៅពេលក្រោយ ដោយមិនកំណត់ពេលច្បាស់លាស់ ។ នៅក្នុងអង្គសវនាការដដែលនោះលោកអាំង មាលតី បានស្នើរអោយតុលាការប្តូរបទចោទប្រកាន់ និងសុំបន្ធូរបន្ថយទោសទណ្ឌរបស់លោកផង ។ ក្នុងនោះលោក​ ឯក​ សុន​រស្មី​ ជា​តំណាង​អយ្យការ​ ក៏យល់​ស្រប​តាម​សំណើរស្នើរសុំរបស់ជនជាប់ចោទផងដែរ ។លោកអាំង មាលតី ត្រូវបានតុលាការ ចោទប្រកាន់ពីបទ បំផ្លាញដោយចេតនា និង គៃបំបាត់ដោយទុច្ចរិត ពាក់ព័ន្ធការដោះលែងមេខ្លោងជួញដូរគ្រឿងញៀន ឈ្មោះ ថាវ ថាវី ជាថ្នូរនឹងរថយន្តម៉ាកអូឌីមួយគ្រឿងតម្លៃជិត ១០ម៉ឺនដុល្លារ កាលពីពេលកន្លងទៅ។ យោងតាមមាត្រ៦០១ នៃក្រមព្រហ្មទណ្ឌ ជនជាប់ចោទអាចប្រឈមមុខនឹងការជាប់ពន្ធនាគារពី ៥ឆ្នាំ ទៅ១០ឆ្នាំ ។

សូមបញ្ជាក់បន្ថែមថា ក្រោយកើតរឿងមិនប្រក្រតី ក្នុងការដោះលែង មេឃ្លោងគ្រឿងញៀនថាវ ថាវី រួចមក លោកអាំង មាលតី ត្រូវបានក្រសួងយុត្តិធម៌ កាលពីពាក់កណ្តាលខែកុម្ភះ ឆ្នាំ២០១៥ បានសម្រេច ដកចេញពីតំណែង ប្រធានសាលាដំបូងរាជធានីភ្នំពេញ ដោយដាក់លោកតាំង ស៊ុនឡាយ ពីអតីតអនុប្រធាន មកកាន់ជាប្រធានជំនួសវិញ ។

គួររំលឹកថា លោក អាំង មាលតី ត្រូវបានអង្គភាពប្រឆាំងអំពើពុករលួយចាប់ឃាត់ខ្លួនកាលពីថ្ងៃទី១៤ ខែសីហា ឆ្នាំ២០១៥ ។ ក្រោយការឃាត់ខ្លួនរូបលោមត្រូវបានបញ្ចូនមកកាន់តុលាការសាលាដំបូងខេត្តកណ្តាល នៅវេលារសៀលថ្ងៃទី ១៦ ខែឆ្នាំដដែល ដើម្បីធ្វើការ កាត់ទោសតាមច្បាប់ ៕

• អាំង មាលតី
• ពុករលួយ