|
 |
MENU
|
|
|
|
MENU
|
រាជធានីភ្នំពេញ ៖ ក្រុមចោរប្លន់ប្រដាប់អាវុធ ៣នាក់ ប្រដាប់ដោយកាំភ្លើងខ្លី១ដើម បានធ្វើដំណើរដោយថ្មើរជើង មកស្ទាក់ពីមុខម៉ូតូរបស់មន្ត្រីនគរបាលយាមកាមម្នាក់ រួចធ្វើសកម្មភាពបាញ់ប្លន់យកម៉ូតូបានសម្រេចដោយសុវត្ថិភាពកាលពីវេលាម៉ោង ២០ និង ១៥នាទីយប់ថ្ងៃទី២៦ ខែមករា ឆ្នាំ២០១៦ នៅតាមបណ្តោយផ្លូវប្រលាយទឹក ក្នុងភូមិត្រពាំងរំចេក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។បុរសជាមន្ត្រីនគរបាលរងគ្រោះមានឈ្មោះ ឡេង ឡា ភេទប្រុស អាយុ៣៣ឆ្នាំ ចំណែកម៉ូតូដែលត្រូវក្រុមចោរដៃឆើតប្លន់ ម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ភ្នំពេញ 1BR-5389 ។
យោងតាមការរៀបរាប់របស់ជនរងគ្រោះ បានអោយដឹងថា នៅមុនពេលកើតហេតុរូបខ្លួនបានជិះម៉ូតូចេញពីម្តុំទួលពង្រមកយាមប្រចាំការនៅការដ្ឋានមួយកន្លែងក្បែរកន្លែងកើតហេតុដោយ មានស្ពាយកាំភ្លើង១ដើមផង ខណៈមកដល់កន្លែងកើតហេតុជិតការដ្ឋាន ស្រាប់តែលេចមុខជនសង្ស័យ៣នាក់ប្រដាប់ដោយកាំភ្លើងចេញមកស្ទាក់ភ្ជង់ ហើយបាញ់គំរាមជាច្រើនគ្រាប់ ប្លន់យកម៉ូតូទៅបាត់ដោយសុវត្ថិភាព ។ មន្ត្រីនគរបាលរងគ្រោះបន្តថា ក្រោយពេលជនល្មើសបាញ់គំរាមហើយនោះ រូបគាត់ បានរត់បានជាង ១០០ម៉ែត្រ ក៏បានបាញ់តបតគ្នា អស់ ជាច្រើនគ្រាប់ទៀតផងដែរ ។ តែទោះបីជាយ៉ាងណា ក្រុមជនល្មើសនៅតែអាចយកម៉ូតូជិះរត់គេចខ្លួនដោយសុវត្ថិភាពដដែល ។ភ្លាមៗ បន្ទាប់ពីកើតហេតុ កម្លាំងសមត្ថកិច្ចមូលដ្ឋាន ក៏ដូចជាកម្លាំងកងរាជអាវុធហត្ថ បានចុះអន្តរាគមន៍ដល់កន្លែងកើតហេតុ ប៉ុន្តែបានត្រឹមតែធ្វើការសាកសួរនាំតែប៉ុណ្ណោះ ដោយឡែកជនល្មើសរត់គេចបាត់ស្រមោលសូន្យឈឹង គ្មានតម្រុយតាមរកឃើញ ៕
