ពលករខ្មែរ ២៤នាក់ត្រូវបានមន្រ្តីកុងស៊ុលកម្ពុជាខេត្តសាកែវថៃ ជួយអន្តរាគមន៍ឲ្យបានធ្វើការស្របច្បាប់

ព័ត៌មានជាតិ | ថ្ងៃព្រហស្បតិ៍ ទី០៧ មេសា ២០១៦, ១២:៣៧ | ៥២២ ដង | ចុចបញ្ចេញមតិ (០)

រាជធានីភ្នំពេញ៖ សេចក្តីប្រកាសព័ត៌មានពីក្រសួងការបរទេសកម្ពុជាចេញផ្សាយកាលពីថ្ងៃទី៦ខែមេសាឆ្នាំ២០១៦បានបញ្ជាក់ថានៅចុងខែមិនាឆ្នាំ២០១៦អាជ្ញាធរចំរុះថៃខេត្តសាកែវ បានចុះត្រួតពិនិត្យពលករនៅទីតាំងចិញ្ចឹមជ្រូកចំនួន២កន្លែងនៅស្រុកវឌ្ឍនាណាខន(មានពលករកម្ពុជាចំនួន ១០៥នាក់ក្នុងនោះស្រី ៣៥នាក់) និងស្រុកសាកែវ (មានពលករកម្ពុជាចំនួន៧៥នាក់ក្នុងនោះស្រី ២៥នាក់) ។

លោកជុំ សុន្ទរី អ្នកនាំពាក្យក្រសួងការបរទេសបានបញ្ជាក់ថា ហើយបានរកឃើញថាក្នុងចំណោមពលករកម្ពុជាសរុបចំនួន១៨០នាក់នោះពលករចំនួន១៥៦នាក់ប្រើប្រាស់Border Pass ដែលមានវាយត្រា អនុញ្ញាតឲ្យធ្វើការតាមរដូវនៅក្នុងខេត្តសាកែវស្របច្បាប់។

លោកបន្តថា ពលករចំនួន២៤នាក់(ស្រី៤នាក់)ប្រើប្រាស់BorderPass ប៉ុន្តែមិនមានសញ្ញាសំគាល់សំរាប់អនុញ្ញាតឲ្យធ្វើការគឺមានតែត្រាចេញ ចូលសំរាប់ធ្វើដំណើរធម្មតា និងអាចស្នាក់នៅបានត្រឹមរយៈពេល៧ថ្ងៃប៉ុណ្ណោះ ។

លោកជុំសុន្ទរី បានអះអាងថាបន្ទាប់ពីទទួលបានព័ត៌មាននេះ ស្ថានអគ្គកុងស៊ុលកម្ពុជា ប្រចាំនៅខេត្តសាកែវ បានជួបជាមួយអាជ្ញាធរមានសមត្ថកិច្ចថៃនៃខេត្តសាកែវ ស្នើសុំឲ្យជួយសម្រួលផ្តល់ភាពស្របច្បាប់ដល់ពលករខ្មែរទាំង២៤នាក់នោះ។អាជ្ញាធរថៃ បានយល់ព្រមតាមសំណើសុំរបស់ស្ថានអគ្គកុងស៊ុល ហើយបានណែនាំឲ្យស្នងការនគរបាលអន្តោប្រវេសន៍ខេត្តរៀបចំតាមនីតិវិធី ដើម្បីឲ្យពលករទាំង២៤រូបអាចធ្វើការងារតាមរដូវនៅក្នុងខេត្តសាកែវបានដោយស្របច្បាប់៕