រាជធានីភ្នំពេញ៖សម្តេចតេជោហ៊ុនសែននាយករដ្ឋមន្រ្តីនៅថ្ងៃទី៤ខែឧសភាឆ្នាំ២០១៧នេះបានប្រកាសតាមបណ្តាញសង្គមហ្វេសប៊ុកផ្ទាល់របស់សម្តេចថា៖”ខ្ញុំសុំការយោគយល់ពីសំណាក់ មន្ត្រី រាជការ កងកម្លាំងប្រដាប់ អាវុធនៅខេត្តកំពង់ស្ពឺដែលខ្ញុំត្រូវ ជួបនៅព្រឹកនេះតែត្រូវអាក់ខាន។ សុំការយោគយល់ពីមិត្តភក្ដិ បរទេសពិសេសជប៉ុន ឥណ្ឌា បារាំងដែលកម្មវិធីគ្រោងទុក សំរាប់ការជួបត្រូវបានលុបចោលទៅវិញ”។ សម្តេចតេជោបានលើកឡើងថា៖”ដោយការហត់នឿយខ្លាំងពេកខ្ញុំធ្លាក់ខ្លួនមានជម្ងឺដែលចាំបាច់ត្រូវមកពេទ្យបន្ទាន់ដើម្បីពិនិត្យនិង ព្យាបាល។ ខ្ញុំស្ថិតក្នុងមន្ទីរពេទ្យនៅសិង្ហបុរី តាំងពីម៉ោង២ល្ងាចថ្ងៃទី៣ខែឧសភាឆ្នាំ២០១៧ និងអាចវិលត្រឡប់ទៅកម្ពុជាវិញ នៅថ្ងៃអាទិត្យ៧ឧសភាដើម្បី បន្តរការងារជាធម្មតាឡើងវិញ។ សូមជូនពរបងប្អូនជនរួមជាតិជួប តែសេចក្តីសុខ។

សម្តេចតេជោហ៊ុនសែនមិនបានបញ្ជាក់ថាសម្តេចត្រូវបានវេជ្ជបណ្ឌិតពិនិត្យថាមានជម្ងឺអ្វីនោះទេ។សម្តេចតេជោត្រូវបានគេមើលឃើញថាសម្តេចបានបំពេញការងារមមាញឹកខ្លាំងណាស់មិនសូវមានពេលសម្រាកក្រៅពីការវាយកូនហ្គោល។សម្តេចតេជោមានអាយុជាង៦០ឆ្នាំនិងមិនសូវមានជម្ងឺនោះទេដោយសារសុខភាពរបស់សម្តេចល្អ៕

• ហ៊ុនសែន
• នាយករដ្ឋមន្រ្តី
• ព្យាបាល
• សិង្ហបូរី