រាជធានីភ្នំពេញ៖ លោក មេធាវីគី តិច ជាមេធាវីការពារក្តីសម្តេចហ៊ុន សែននៅព្រឹកថ្ងៃទី១៨ខែមករាឆ្នាំ២០១៧នេះបានចូលទៅកាន់តុលាការក្រុងភ្នំពេញដើម្បីដាក់ពាក្យបណ្តឹងប្តឹងលោកសម រង្ស៊ីពីបទបរិហារកេរ្តិ៍ដែលថាបានចោទថាសម្តេចតេជោសូកកញ្ញា ធី សុវណ្ណ១លានដុល្លារអាមេរិកក្នុងការដាក់ពាក្យប្តឹងក្នុងនាមមេធាវីសម្តេចតេជោនាយករដ្ឋមន្រ្តី។

យោងតាមពាក្យបណ្តឹងបានលើកឡើងថា៖លោកសម រង្ស៊ីបាននិយាយកាលពីថ្ងៃទី១៤ខែមករាឆ្នាំ២០១៧នៅក្នុងវេទិកាសាធារណៈមួយនៅក្នុងក្រុងប៉ារីសប្រទេសបារាំងថា"ចុះលោកហ៊ុន សែន សូក ធី សុវណ្ណាថា ១លានដុល្លារមេចអាណាមិនធ្វីអីលោកហ៊ុនសែនផង?...១លានដុល្លារនិយាយលុយនោះលុយពុករលួយ ..សូកឲ្យមនុស្សធ្វើអាក្រក់ ឲ្យរករឿងគណបក្សសង្រ្គោះជាតិ ឲ្យធ្វើបាតុកម្ម ជួលនេះ ជួលនោះ ប្រើ១លានដុល្លារ ពុករលួយ.."។

ពាក្យបណ្តឹងបានលើកឡើងថាវីដេអូដែលមានសំដីលោកសម រង្ស៊ីដូចខាងលើត្រូវបានផ្សព្វផ្សាយយ៉ាងទូលំទូលាយជាសាធារណៈតាមហ្វេសប៊ុក។វីដេអូនេះក៍ត្រូវបានទទួលស្គាល់ផងដែរក្នុងទំព័រហ្វេសប៊ុកផ្លូវការឈ្មោះSamRainsy។

លោកមេធាវីបានជម្រាបលោកប្រធានតុលាការថាអំពើដែលឈ្មោះសម រង្ស៊ីបានប្រព្រឹត្តគឺជាការអះអាងបំផ្លើសនិងការទម្លាក់កំហុសដោយអសុទ្ធចិត្តដោយបានចោទប្រកាន់មួលបង្កាច់ផ្ទុយពីការពិតក្នុងចេតនាទុចរិតបំភាន់សាធារណៈមតិជាតិនិងអន្តរជាតិដែលប៉ះពាល់យ៉ាងធ្ងន់ធ្ងរបំផុតដល់កិត្តិយសនិងកិត្តិស័ព្ទរបស់សម្តេចតេជោហ៊ុន សែន។

លោកមេធាវីបានលើកឡើងក្នុងពាក្យបណ្តឹងទៀតថាអំពើខាងលើនេះក៍ត្រូវបានផ្សព្វផ្សាយបន្តក្នុងសាធារណជនតាមបណ្តាញទំនាក់ទំនងសង្គមហ្វេសប៊ុក។អំពើនេះមានធាតុផ្សំគ្រប់គ្រាន់ ដើម្បីកំណត់ជាបទបរិហារកេរ្តិ៍ជាសាធារណៈតាមបញ្ញតិមាត្រា៣០៥នៃក្រមព្រហ្មទណ្ឌ។

មាត្រា៣០៥បានចែងថាគ្រប់ការអះអាងបំផ្លើសឬការទម្លាក់កំហុសដោយអសុទ្ធចិត្តលើអំពើណាមួយដែលធ្វើឲ្យប៉ះពាល់ដល់កិត្តិយសឬកិត្តិស័ព្ទបុគ្គលឬស្ថាប័នគឺជាការបរិហារកេរ្តិ៍ត្រូវផ្តន្ទាទោសពិន័យពី១០០.០០០ដល់១០.០០០.០០០លានរៀល៕

• មេធាវីរដ្ឋាភិបាល
• ប្តឹង
• សម រង្ស៊ី
• បរិហារកេរ្តិ៍
• ហ៊ុនសែន
• ធី សុវណ្ណថា
• សូក