ខេត្តប៉ៃលិន៖ រាត្រីថ្ងៃទី២៥ ខែមេសា ឆ្នាំ២០១៧ ស្ថិតក្នុងភូមិភ្នំដំបង សង្កាត់អូរតាវៅ មានរៀបចំការសម្តែងសិល្បៈអប់រំសុខភាពតាមសហគមន៍ ដើម្បីគាំទ្រការលុបបំបាត់ជម្ងឺគ្រុនចាញ់ និងផលប្រយោជន៍នៃការចាក់វ៉ាក់សាំងបង្ការដល់កុមារ ក្នុងខេត្តប៉ៃលិន ដែលពិធីនេះមានការសហការរវាងមន្ទីរសុខាភិបាលខេត្តប៉ៃលិន ជាមួយអង្គការម៉ូរូ ស្ថិតក្រោមអធិបតីភាពលោក ហែម ឬទ្ធី នាយករដ្ឋបាលសាលាខេត្តប៉ៃលិន តំណាងដ៏ខ្ពង់ខ្ពស់ លោក កើត សុធា អភិបាលនៃគណៈអភិបាលខេត្តប៉ៃលិន ព្រមទាំងមានការអញ្ជើញចូលរួមពីលោក ឡូ លុយ អភិបាលរងក្រុងប៉ៃលិន លោកវេជ្ជបណ្ទិត  យក់ សុវណ្ណ អនុប្រធានមន្ទីរសុខាភិបាលខេត្ត លោកស្រី នូ សាណាន់ អ្នកសម្របសម្រួលកម្មវិធីជម្ងឺគ្រុនចាញ់របស់អង្គការម៉ូរូ និងមានការចូលរួមពីលោកមេភូមិ ប្រជាពលរដ្ឋយ៉ាងច្រើនកុះករ ។

បើតាមលោកវេជ្ជបណ្ឌិត យក់ សុវណ្ណ អនុប្រធានមន្ទីរសុខាភិបាលខេត្តប៉ៃលិនបានឱ្យដឹងថា  នៅឆ្នាំ២០១៦ ប្រជាពលរដ្ឋក្នុងខេត្តប៉ៃលិន បានកើតជម្ងឺគ្រុនចាញ់ ចំនួន ១៣២នាក់ ស្រី ២០% ហើយបានធ្វើការព្យាបាលតាមរយៈ អ្នកស័្មគ្រចិត្តភូមិ តាមមណ្ឌលសុខភាព និងមន្ទីរពេទ្យបង្អែកខេត្តប៉ៃលិន ។

លោកស្រី នូ សាណាន់ អ្នកសម្របសម្រួលកម្មវិធីជម្ងឺគ្រុនចាញ់របស់អង្គការម៉ូរូបានឱ្យដឹងដែរថា  ដោយមានកិច្ចសហការជាមួយមន្ទីរសុខាភិបាលខេត្តប៉ៃលិន និងអាជ្ញាធរដែនដី អង្គការម៉ូរូបានរៀបចំពិធីសម្តែងសិល្បៈដើម្បី ផ្សព្វផ្សាយជម្ងឺគ្រុនចាញ់នេះ នៅតាមសហគមន៍ ក្នុងគោលបំណងលុបបំបាត់ជម្ងឺគ្រុនចាញ់អោយស្របតាមគោលនយោបាយរបស់រាជរដ្ឋាភិបាលកម្ពុជា ក្នុងការលុបបំបាត់ជម្ងឺគ្រុនចាញ់អោយអស់ក្នុងឆ្នាំ២០២៥ និងដើម្បីលើកកំពស់សុខមាលភាពជូន បងប្អូនប្រជាពលរដ្ឋ និងឱ្យមានការយល់ដឹងពីអត្ថប្រយោជន៍នៃការចាក់វ៉ាក់សាំងបង្ការជម្ងឺគ្រុនចាញ់ និងការចាក់បង្ការជម្ងឺដល់កុមារ និងស្រ្តីក្នុងវ័យបន្តពូជន៍។

ក្នុងឪកាសនោះដែរលោក ហែម ឬទ្ធី នាយករដ្ឋបាលសាលាខេត្តប៉ៃលិន តំណាងដ៏ខ្ពង់ខ្ពស់លោក កើត សុធា អភិបាលនៃគណៈអភិបាលខេត្តប៉ៃលិន បានមានប្រសាសន៍ ថ្លែងអំណរគុណដល់អង្គការម៉ូរូ ដែលបានរួមសហការជាមន្ទីរសុខាភិបាលខេត្តប៉ៃលិន បានរៀបចំកម្មវិធីសំដែងសិល្បៈអប់រំសុខភាពស្តីពីការលុបបំបាត់ជម្ងឺគ្រុនចាញ់នេះឡើង ដើម្បីអោយបងប្អូនប្រជាពលរដ្ឋក្នុងមូលដ្ឋានបានយល់ដឹងកាន់តែច្បាស់ ពីគ្រោះថ្នាក់ និងការបង្ការ ជម្ងឺគ្រុនចាញ់ និងជម្ងឺផ្សេងៗទៀតព្រោះរដូវនេះជារដូវមានភ្លៀងធ្លាក់ ដែលងាយឱ្យកើតជម្ងឺដម្កាត់ផ្សេងៗ។ លោកមានប្រសាសន៍បន្តថា ជាមួយគ្នានេះដែរលោកបានពាំនាំកាផ្តាំផ្ញើរសួរសុខទុក្ខពីសំណាក់លោក កើត សុធា អភិបាលខេត្តប៉ៃលិន ដោយសូមឲ្យបងប្អួនគិតគូឲ្យបានខ្ពស់ចំពោះបញ្ហាគ្រោះថ្នាក់ចរាចរណ៍ បញ្ហាគ្រឿងញៀន បញ្ហាការកាប់បំផ្លាញព្រៃឈើក្នុងតំបន់អភិរក្ស ហើយជាមួយគ្នានេះដែរ យើងនៅសល់ពេលតែជាង៣០ថ្ងៃប៉ុណ្ណោះ និងត្រួវបោះឆ្នោតជ្រើសរើសក្រុមប្រឹក្សាឃុំ សង្កាត់ ដូច្នោះសូមអញ្ជើញបងប្អួនទៅចូលរួមបោះឆ្នោតទាំងអស់គ្នា ហើយក៍សូមអំពាវនាវដល់បងប្អូនប្រជាពលរដ្ឋយើង ត្រូវចេះថែរក្សាសុខភាពអោយបានល្អត្រូវគេងក្នុងមុងជ្រលក់ថ្នាំឱ្យបានគ្រប់ៗគ្នាផងដែរ ៕អត្ថបទ សេង សុវណ្ណារិទ្ធ                                           

• មន្ទីរ
• សុខាភិបាល
• វ៉ាក់សាំង