ខេត្តប៉ៃលិន៖ បើតាមការឲ្យដឹងពីមន្ត្រីសាលាខេត្តប៉ៃលិននៅព្រឹកថ្ងៃទី២៩ ខែមេសា នេះថា កាលថ្ងៃទី២៨ ខែមេសា ២០១៧  លោក ម៉ៅ សំបុណ្យ អគ្គនាយករងនៃអគ្គនាយកដ្ឋានពន្ធនាគារបានពិភាក្សាគ្នាជាមួយលោក ភី ឡងឌី ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តប៉ៃលិនមានគំរោងបង្កើតជំនាញវិជ្ជាជីវៈ នៅពន្ធនាគារខេត្តប៉ៃលិនក្នុងគោលបំណងដើម្បីឲ្យអ្នកទោសទាំងអស់ចេះនូវជំនាញវិជ្ជាជីវស្របច្បាប់ខណៈពេលខ្លួនកំពុងជាប់ទោសក្នុងពន្ធនាគារ ។

លោក ពេជ្រ សំបូរ នាយការិយាល័យកិច្ចការច្បាប់ សាលាខេត្តប៉ៃលិនបានប្រាប់VOKC តាមទូរស័ព្ធថា ដោយសារពន្ធនាគារខេត្តប៉ៃលិនមិនទាន់មានកម្មវិធីបង្រៀន និងអប់រំនូវវិជ្ជាជីវៈដូចជាផ្នែកសិប្បកម្ម កសិកម្ម និងជាងសំណង់នោះទើបកាលពីប៉ុន្មានថ្ងៃមុននេះលោក ម៉ៅ សំបុណ្យ អគ្គនាយករងនៃអគ្គនាយកដ្ឋានពន្ធនាគារបានចុះមកពិនិត្យមើលហើយនៅថ្ងៃទី២៨ ខែមេសា លោកអគ្គនាយករងបានអញ្ជើញជួបលោក ភី ឡងឌី ប្រធានមន្ទីរការងារនិងបណ្តុះបណ្តាលវិជ្ជាជីវិៈខេត្តប៉ៃលិនដើម្បីពិភាក្សាគ្នាបង្កើតគំរោងជួយដល់អ្នកទោសដែលជាប់ឃុំក្នុងពន្ធនាគារឲ្យពួកគាត់ចេះនូវជំនាញផ្សេងៗដែលជាជំនាញស្របច្បាប់ ។ លោកបន្តទៀតថា អ្នកទោសទាំងអស់ក្រោយពីចេះនូវជំនាញទាំងនេះហើយពួកគាត់និងទទួលបានវិញ្ញាប័ត្របញ្ជាក់ការសិក្សាដែលទទួលស្គាល់ពីមន្ទីរការងារខេត្ត ហើយបន្ទាប់ពីមានការលើកលែងទោស(រួចទោស)ពួកគាត់និងយកជំនាញដែលចេះទៅធ្វើការងារនូវកន្លែងផ្សេងៗបានដោយស្របច្បាប់ទៀតផង ។

ចំណែកលោកឧត្តមសេនីយ៍ត្រី នៅ ធឿង ប្រធានពន្ធនាគារខេត្តប៉ៃលិន បានឲ្យដឹងតាមទូរស័ព្ទនៅព្រឹកថ្ងៃទី២៩ ខែមេសានេះថា  លោកមានចិត្តត្រេកអរយ៉ាងខ្លាំងដែលអគ្គនាយកដ្ឋានពន្ធនាគាសហការជាមួយមន្ទីរការងារនិងបណ្តុះបណ្តាលវិជ្ជាជីវៈខេត្ត បានរៀបចំបង្កើតឲ្យទណ្ទឹតដែលជាប់ឃុំនៅពន្ធនាគារខេត្តប៉ៃលិន ចេះនូវជំនាញផ្សេងៗដែលស្របច្បាប់ ។ លោកបានបន្តថា កន្លងមកនៅពន្ធនាគារខេត្តក៍បានបង្កើតកម្មវិធីនេះដែលតែមិនទាន់មានគ្រប់គ្រាន់នោះទេហើយយើងបានបង្កើតឲ្យមានបណ្ណាល័យសំរាប់ឲ្យអ្នកទោសដែលជាប់ឃុំទាំងអស់ចូលអានសៀវភៅការអប់រំសីលធម៌សូត្រធម៌ជាដើម។ជាងនេះទៅទៀតខាងពន្ធនាគារក៍មានកម្មវិធីកសិកម្មដើម្បីឲ្យអ្នកទោសទាំងអស់ចេះដូចជាការដាំស្ពៃ ត្រកូន ខាត់ណាជាដើមហើយលោកក៍បានឲ្យដឹងដែរថាសព្វថ្ងៃទណ្ទឹតដែលជាប់ឃុំទាំងអស់មានចំនួន១៩៣នាក់ផងដែរ ។

ពាក់ព័ន្ធករណីខាងលើលោក ភី ឡងឌី ប្រធានមន្ទីរការងារ និងបណ្តុះបណ្តាលវិជ្ជាជីវិខេត្តប៉ៃលិនបានឲ្យដឹងតាមទូរស័ព្ទនៅព្រឹកថ្ងៃទី២៩ ខែមេសានេះដែរថា ជាការល្អណាស់ដែលលោកអគ្គនាយករងមានគំនិតល្អក្នុងការដែលលោកចង់ឲ្យអ្នកជាប់ទោសក្នុងពន្ធនាគារខេត្តប៉ៃលិនមានជំនាញផ្ទាល់ខ្លួន ដើម្បីប្រកបមុខរបរចិញ្ចឹមជីវិតក្រោយពីពួកគាត់រួចពីទោសនោះ។ ជាមួយគ្នានេះដែរយើងក៍បានបង្កើតឲ្យមានគណៈកម្មាធិការដើម្បីត្រួតពិនិត្យការសិក្សាលើអ្នកដែលចេះជំនាញពិតប្រាកដ ចំណែកគណៈកម្មការត្រួតពិនិត្យគឺយើងមានលោកអគ្គនាយករងជាប្រធានខាងប្រធានពន្ធនាគារជាអនុប្រធាន ហើយនិងលោកជាអនុប្រធានផងដែរ។

លោកបានបន្តទៀតថា កន្លងមកយើងមិនដែលមានការបង្កើតកម្មវិធីនេះទេសំរាប់អ្នកជាប់ឃុំក្នុងពន្ធនាគារខេត្តគឺមានតែនៅនិងមន្ទីរដូច្នោះនេះគឺជាបំណងល្អបំផុតរបស់លោកអគ្គនាយករងនៃអគ្គនាយកដ្ឋានពន្ធនាគារ។ ជាងនេះទៅទៀតអ្នកទោស ទាំងអស់ដែលបានរៀននូវជំនាញដែលខ្លួនពេញចិត្តហើយចេះខាងមន្ទីរការងារនិងចេញវិញ្ញាប័ត្រជូនដើម្បីឲ្យពួកគាត់យកទៅប្រើប្រាស់ក្រោយពីពួកគាត់រួចទោសផងដែរ៕អត្ថបទ សេង សុវណ្ណារិទ្ធ                       

• អគ្គនាយកដ្ឋាន
• ពន្ធនាគារ
• មន្ទីរការងារ