រាជធានីភ្នំពេញ៖   ដោយយល់ថារបរលក់អយស្ទ័រជារបរកំពុងពេញនិយមបានធ្វើឲតារាចម្រៀងអេន ជីមានការចាប់អារម្មណ៍រហូតសម្រេចយកធ្វើជាមុខរបររកស៊ីប្រចាំថ្ងៃដោយបើកលក់លក្ខណៈធំដុំមួយសម្រាប់តម្រូវការអតិថិជន។

តារាចម្រៀងដែលមានយុវវ័យជាច្រើនស្គាល់ច្បាស់កញ្ញាអេន ជីបានបញ្ចេញកញ្ចប់ថវិកាជាច្រើនងាកមករកសុីដែលរំពឹងថាបានផលចំណេញបន្តទៀតបន្ទាប់គិតគូច្បាស់លើរបរថ្មី។ខំរកស៊ីឲ្យល្អតារាល្បីរូបនេះក៍ផ្អាកសិល្បៈមួយរយៈខ្លីមិនចោលជំនួញបាន។

កាលពីថ្ងៃទី៧ខែមេសានេះតារាចម្រៀង អេន ជី បានប្រកាសបើកមុខជំនួញថ្មីគឺហាងផឹកស៊ីមួយកន្លែងនៅតាមបណ្តោយផ្លូវវ៉េងស្រេងម្តុំសួនឧស្សាហកម្មកាណាឌីយ៉ាដែលចំណាយដើមទុនប្រមាណជាង១០ម៉ឺនដុល្លារបើបូកទាំងតម្លៃផ្ទះដែលបានទិញ។ 

ក្រោយពីចេញពីផលិតកម្មអឹម(M)ទៅកាន់ផលិតកម្មសាន់ដេ តារាចម្រៀងអេន ជីបានបន្តការងារសិល្បៈជាច្រើនឆ្នាំ ប៉ុន្តែកាលពីចុងឆ្នាំ២០១៦តារាស្រីរូបនេះបានសម្រេចចិត្តភ្ជាប់ពាក្យជាមួយប្អូនប្រុលតារាសម្តែង គង់ ចំរ៉ុង និងត្រូវជាប្អូនថ្លៃតារាចម្រៀងផាន់ ម៉ូនីកា។តារាស្រីរូបនេះបញ្ជាក់ថា ហាងថ្មីរបស់នាងយីហោ”Mr. Oyster “ដែលជាប្រភេទហាងបម្រើអាហារសមុទ្រ និងគ្រឿងក្លែមជាច្រើនប្រភេទ។

នាងថា ការសម្រេចចិត្តបើកដំណើរការហាងថ្មីនេះព្រោះតែចង់ដកពិសោធន៍ទៅលើមុខជំនួញថ្មីពិសេសហាងផឹកស៊ីបែបសាមញ្ញ និងមានតម្លៃសមរម្យ។ នាងថា អាជីវកម្មនេះគឺថ្មីសម្រាប់នាងនិងគូដណ្តឹងបន្ទាប់ពីហាងលក់សំលៀកបំពាក់”អេន ជី”នៅផ្លូវទឹករាំផ្ការាំ និងហាងលក់សំលៀកបំពាក់រ៉ាយុទ្ធ។ នាងថាហាងនេះបានចាយដើមទុនប្រមាណជាង២ម៉ឺនដុល្លារអាមេរិក ហើយផ្ទះនេះគឺជាផ្ទះផ្ទាល់របស់គូដណ្តឹងនាងដោយគិតតម្លៃប្រមាណ១២ម៉ឺនដុល្លារអាមេរិក។ នាងបញ្ជាក់ដែរថា ការបើកដំណើរការហាងថ្មីនេះមិនមានការចូលហ៊ុនជាមួយអ្នកណាទេ ហើយនាងសង្ឃឹមថាមុខជំនួញនេះគឺជាបទពិសោធន៍ថ្មីសម្រាប់នាងមុនពេលចូលរោងការក្នុងឆ្នាំនេះ។ តារាស្រីរូបនេះលើកឡើងដែរថាក្រោយរៀបការនិងរវល់ច្រើននឹងមុខជំនួញផ្ទាល់ខ្លួននាងអាចដកឃ្លាខ្លះពីសិល្បៈ ព្រោះតែនាងចង់សាងសុភមង្គលក្រុមគ្រួសារនិងការមើលខុសត្រូវមុខជំនួញឲ្យបានដិតដល់ប៉ុន្តែសម្រាប់ឱកាសចូលឆ្នាំថ្មីនេះនាងក៏មានបទចម្រៀងខ្លះជូនទស្សនិកជនដែរ។ ក្រៅពីហាងនេះនាងនិងគូដណ្តឹងក៏គ្រោងនឹងបើកដំណើរការអាជីវកម្មថ្មីបន្ថែមទៀតផងដែរ៕                       

• អេន ជី
• តារាចម្រៀង
• អយស្ទ័រ