រាជធានីភ្នំពេញ៖ បុរសម្នាក់បានរងរបួសយ៉ាងធ្ងន់ធ្ងរ ហើយត្រូវបានរថយន្តសង្គ្រោះបន្ទាន់ដឹកយកទៅមន្ទីពេទ្យភ្លាមៗ ខណះដែរបុរសរូបនោះទំនងជាស្រវឹងស្រា ហើយបើករថយន្តកាមរីបាឡែនក្នុងល្បឿនយ៉ាងលឿនដូចហោះ  ពេលដល់ផ្លូវកោងមិនបន្ថយល្បឿនក៏រ៉េចង្កូតជ្រុលទៅបុកបង្គោលភ្លើងបាក់អស់មួយដើម និងដើមឈើមួយដើម ឯរថយន្តបង្កបានក្រឡាប់ជាច្រើនជុំផ្ងារជើងឡើងលើ។ ហេតុការណ៍នេះកើតឡើងនៅវេលាម៉ោង ២និង៤០នាទីរំលងអាធ្រាត្រ ឈានចូលថ្ងៃទី ២៧ ខែមិនា ឆ្នាំ២០១៧ ដែលស្ថិតនៅតាមបណ្តោយផ្លូវ ២៧១ ទល់មុខវិទ្យាល័យ ជា ស៊ីម សាមគ្គី ស្ថិតនៅក្នុងភូមិ១ សង្កាត់ស្ទឹងមានជ័យ១ ខណ្ឌមានជ័យ ។     

តាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើបានឲ្យដឹងថា នៅមុនពេលកើតហេតុនោះគឺ រថយន្តបង្កម៉ាកកាមរីបាឡែន ពណ៌ស្ក ពាក់ស្លាកលេខភ្នំពេញ2AA.7135 ដែលបើកបរដោយបុរសម្នាក់ទំនងជាស្រវឹង ហើយបើកតាមបណ្ដោយផ្លូវ២៧១ ក្នុងទិសដៅពីជើងទៅត្បួងក្នុងល្បឿនយ៉ាងលឿន ខណះមកដល់ចំណុចកើតហេតុខាងលើ ដោយសាតែផ្លូវកោង ហើយអ្នកបើកបរមិនព្រមបន្ថយល្បឿនផងនោះ ក៏បានជ្រុលចង្កូតទៅបុកនិងបង្គោលភ្លើងបាក់អស់១ដើម និងដើមឈើបាក់អស់១ដើម ធ្វើឲ្យរថយន្តបង្កក្រឡាប់កាប់ផ្ងារជាច្រើនជុំ ខ្ទៀតចូលផ្ទះលក់ទឹកដោះគោ បណ្ដាលឲ្យរថយន្តរងការខូចខាត ។ ចំណែកឯអ្នកបើកបរបានរងរបួសយ៉ាងធ្ងន់ធ្ងរ ។   

ក្រោយពេលកើតហេតុ បុរសដែលរងរបួសធ្ងន់នោះ ត្រូវបានរថយន្តសង្គ្រោះបន្ទាន់ដឹកយកទៅមន្ទីពេទ្យឯកជនជួយសង្គ្រោះភ្លាមៗ បន្ទាប់មកសមត្ថកិច្ចមូលដ្ឋានបានចុះដល់កន្លែងកើតហេតុ និងទំនាក់ទំនងទៅជំនាញចរាចរណ៍ជើងគោករាជធានីភ្នំពេញ ឲ្យចុះមកធ្វើការវាស់វែងយករថយន្តបង្កខាងលើទៅរក្សាទុក នៅការិយាល័យចរាចរណ៍រាជធានីភ្នំពេញរងចាំដោះស្រាយគ្នាទៅតាមនីតិវិធីច្បាប់៕,

• រថយន្ដ
• បង្គោលភ្លើង
• រងរបួសធ្ងន់