ខេត្តកំពង់ឆ្នាំង៖ សមត្ថកិច្ចបាននិយាយថាឈើហ៊ុបផ្ចឹកធំៗចំនួន១៤គោ យន្តដែលបានកាប់ចេញពី ដែនជម្រកសត្វព្រៃភ្នំឱរ៉ាល់ខេត្តពោធិសាត់ សម្ងំលាក់ខ្លួនពេលថ្ងៃនៅក្នុងភូមិដំណាក់ខ្លុង ឃុំក្តុលសែនជ័យ ស្រុកទឹកផុស  ត្រូវបានក្រុមអ្នកកាសែតប្រទះឃើញនៅម៉ោង២រសៀលថ្ងៃទី១៩ ខែមិនា ឆ្នាំ២០១៧ ហើយបានរាយការណ៍ជូនលោកប្រធានមន្ទីរកសិកម្មខេត្ត បញ្ជាអោយ ស ង្កាត់រដ្ឋបាលព្រៃឈើគ្រាំងស្គារចុះបង្ក្រាប ប៉ុន្តែដោយសារតែភាពអសកម្មយឺតយ៉ាវយូរម៉ោងពេ កគោយន្តដឹកឈើល្មើសច្បាប់ ទាំងអស់នោះបាននាំគ្នាបើកគេចចូលព្រៃអស់។

អ្នកបើកគោយន្តដឹកឈើហ៊ុបផ្ចឹកធំៗខាងលើនេះបាននិយាយអោយដឹងថា៖ ពួកគេរស់នៅក្នុងស្រុកសាមគ្គីមានជ័យបាននាំគ្នាឡើងកាប់ឈើទាំងនេះនៅក្នុងដែនជម្រកសត្វព្រៃភ្នំឱរ៉ាល់ខេត្តពោធិសាត់ដោយត្រូវបង់លុយអោយមន្ត្រីការពារដែនជម្រកសត្វព្រៃក្នុង១គោយន្ត៦ម៉ឺនរៀលទើបចូលកាប់ឈើលើភ្នំបាន។ នៅពេលដឹកឈើត្រឡប់មកវិញត្រូវបង់លុយអោយមេព្រៃស្រុកភ្នំក្រវាញក្នុង១គោយន្ត៦ម៉ឺនរៀល  បង់អោយនគរបាលនិងប៉េអឹមក្នុងមួយស្ថាប័ន២ម៉ឺនរៀល  ពេលចូលដល់ដីស្រុកទឹកផុស ត្រូវបង់អោយមេព្រៃក្តុលក្នុង១គោយន្ត១០ម៉ឺនរៀល  មេព្រៃរមាស១០ម៉ឺនរៀល  ពេលជួបនគរបាលស្រុក និងប៉េអឹមស្រុកត្រូវបង់អោយគេក្នុង១គោយន្ត២ម៉ឺនរៀលទៀតគឺបង់អោយហូរហែរហូតអោយតែជួបសមត្ថកិច្ច  ទើបអាចដឹកឈើទៅដល់ផ្ទះបាន។

អ្នកដឹកទាំងអស់នោះបានអោយដឹងទៀតថា ក្នុងមួយជើងពួកគាត់ត្រូវចំណាយពេលឡើងកាប់ឈើនិងដឹកឈើមកវិញរយះពេល១ខែ  និងក្នុង១គោយន្តដឹកឈើបាន២ម៉ែត្រគូប យកទៅលក់បានលុយ១៥០ម៉ឺនរៀល តែត្រូវចំណាយរត់ការតាមផ្លូវអស់ពាក់កណ្តាលនៅសល់ពាក់កណ្តាលដែរ  ដោយឡែកសមត្ថកិច្ចមេព្រៃបានប្រាប់ថា មិនត្រូវដឹកឈើពេលថ្ងៃឡើយ គឺចាំពេលយប់ចាំដឹកចេញ។

ទាក់ទងនិងបទល្មើសព្រៃឈើខាងលើនេះ ក្រុមអ្នកកាសែតយើងដែលបានប្រទះឃើញករណីនេះក៏បានរាយការណ៍ជូនលោក ងិន ហ៊ុន ប្រធានមន្ទីរកសិកម្មខេត្ត  បន្ទាប់មកលោក ងិន ហ៊ុន បានប្រាប់ថាលោកបានបញ្ជារអោយ លោក សឹង ហាត នាយសង្កាត់ព្រៃឈើគ្រាំងស្គារដឹកនាំកម្លាំងចុះបង្ក្រាប ប៉ុន្តែជាង២ម៉ោងក្រោយមកគេមិនឃើញសមត្ថកិច្ចចុះមកបង្ក្រាបឡើយគឺគេទុកឱកាសអោយគោយន្តដឹកឈើបើកគេចអស់តែម្តង។

ករណីនេះប្រជាពលរដ្ឋសំណូមពរលោកប្រធានមន្ទីរកសិកម្មខេត្ត និងលោកអភិបាលខេត្តមេត្តាជួយចាត់វិធានការណ៍ក្តៅចំពោះមន្ត្រីអសកម្មទាំងអស់ខាងលើដែលពាក់ពន្ធ័បទល្មើសនេះផងបើពុំនោះទេព្រៃឈើជាតិពិតជាវិនាសអស់ហើយ៕     

• ឈើហ៊ុប
• គោយន្ត
• កសិកម្ម
• បង្ក្រាប