ខេត្តព្រះសីហនុ៖ ជនសង្ស័យជាមុខសញ្ញាលួច និងកាច់.កម៉ូតូយ៉ាងសកម្ម ចំនួន៥នាក់ ត្រូវបានកម្លាំងសមត្ថកិច្ចខេត្តព្រះសីហនុ ធ្វើការបង្ក្រាបបានជាបន្តបន្ទាប់ កាលពីវេលារសៀលថ្ងៃទី១៩ បន្តមកទល់ព្រឹកថ្ងៃទី ១៩ ខែកុម្ភះ ឆ្នាំ២០១៧ ។

មុខសញ្ញាទាំង៥នាក់ ទី១ឈ្មោះម៉េង ឈាង ( ហៅ វ៉ាង ) ភេទប្រុស អាយុ២៦ឆ្នាំ មានទីលំនៅភូមិអណ្តូងថ្ម ឃុំអណ្តូងថ្ម ស្រុកព្រៃនប់ ខេត្តព្រះសីហនុ មុខរបរមិនពិតប្រាកដ។ ទី២ឈ្មោះ ១.ឈ្មោះ ជូវ សំណាង ហៅ ខ្នាង ភេទប្រុស អាយុ ២៧ឆ្នាំ មុខរបរមិនពិតប្រាកដ។ ទី៣ឈ្មោះលី សុភ័ក្រ្ត ហៅតួ ភេទប្រុស អាយុ១៨ឆ្នាំ មុខរបរ រត់តុការ ។ ទី៤ឈ្មោះ ជូវ ឌីណា ភេទប្រុស អាយុ២៨ឆ្នាំមុខរបរ កម្មករសំណង់ ។ ទី៥ឈ្មោះ សុខ ចំរើន ហៅដូច  ភេទប្រុស អាយុ២៥ឆ្នាំ មុខរបរ មិនពិតប្រាកដ ។ ជនទាំង៥នាក់សុទ្ធតែមានស្រុកកំណើតនិងទីលំនៅ ក្នុងភូមិ,ឃុំអណ្ដូងថ្ម ស្រុកព្រៃនប់។

លោកវរសេនីយ៍ទោ ស៊ុត សំអុននាយការិយាល័យនគរបាលព្រហ្មទណ្ឌកម្រិតស្រាលខេត្តបានឲ្យដឹងថា នៅវេលាម៉ោង ២១ៈ ៣០នាទីយប់ ថ្ងៃទី១៦ ខែកុម្ភៈកន្លងទៅនេះ នៅផ្ទះល្វែងក្នុងសង្កាត់លេខ២មានចោរ១ក្រុមបានគាស់ទម្លុះទម្លាយ លួចយកម៉ូតូ ហើយត្រូវបានកម្លាំងនគរបាល ដេញប្រផាប់ប្រភីងចាប់បានម្នាក់ ឈ្មោះ ម៉េង ឈាង (ហៅ វ៉ាង) ភេទប្រុស អាយុ២៦ឆ្នាំ មានទីលំនៅភូមិអណ្តូងថ្ម ឃុំអណ្តូងថ្ម ស្រុកព្រៃនប់ ខេត្តព្រះសីហនុ មុខរបរមិនពិតប្រាកដ។  

លោកស៊ុត សំអុនបានបន្តថា ដោយមើលឃើញ រូបភាពវីដេអូ តាមកាមេរ៉ាសុវត្ថិភាព ព្រមទាំងមានការបញ្ជា ណែនាំផ្ទាល់ ពីឯកឧត្តមឧត្តមសេនីយ៍ទោ ជួន ណារិន្ទស្នងការនគរបាលខេត្ត ដោយមានកិច្ច សហការ ជាមួយនគរបាលបាលមូលដ្ឋាន កម្លាំងអធិការដ្ឋាននគរបាលក្រុង និង ស្រុកព្រៃនប់ផង នៅព្រឹកថ្ងៃទី១៩ខែកុម្ភៈនេះ សមត្ថកិច្ចបានបន្តទៅចាប់ខ្លួន មុខសញ្ញាពាក់ព័ន្ធបានចំនួន៤នាក់បន្ថែមទៀតនៅក្នុងភូមិឃុំអណ្ដូងថ្មស្រុកព្រៃនប់ក្នុងការបង្ក្រាបពួកគេទាំង៥នាក់សមត្ថកិច្ចដកហូតបាន១.សោរសម្រាប់កាច់បំបែកសោរកម៉ូតូ០១ ២.ដង្កាប់អូតូម៉ាទិច០១ ៣.ម៉ូតូ ស្កុបពីពណ៌ស០១គ្រឿង ៤.ម៉ូតូ អ៊ែរប្លែដ០២គ្រឿង ៥.ម៉ូតូ ហ្វីនណូ ០១គ្រឿង ៦.ម៉ូតូ វីសិន ០១គ្រឿង ៧.ម៉ូតូ ZOOMER X ០១គ្រឿង ៨.ដង្កាប់កាត់ដែក ០១ ។   

តាមចម្លើយសារភាពមុខសញ្ញានេះធ្លាប់ធ្វើសកម្មភាពលួចម៉ូតូ ជាច្រើនលើកមកហើយមិនធ្លាប់ត្រូវបានសមត្ថកិច្ចចាប់ខ្លួនពួកវាបានឡើយ។ លោកស៊ុត សំអុន នាយការិយាល័យនគរបាលព្រហ្មទណ្ឌកម្រិតស្រាលបានអំពាវនាវឲ្យប្រជាពលរដ្ឋដែលធ្លាប់បាត់ម៉ូតូកន្លងមកសូមយកឯកសារអត្តសញ្ញាណមកផ្ទៀងផ្ទាត់នៅស្នងការដ្ឋាននគរបាលខេត្តព្រះសីហនុ ៕                      

• មុខសញ្ញា
• ចោរកម្ម
• ខេត្តព្រះសីហនុ